မောင်တောတိုက်ခိုက်မှု ဦးဆောင်သူမှာ တာလီဘန် စစ်သွေးကြွသင်တန်းဆင်း ဖြစ်

မောင်တောဒေသရှိ အစိုးရ၀န်ထမ်းနှင့် ဒေသခံများအား လုံခြုံစိတ်ချရာနေရာသို့ တပ်မတော်လေယာဉ်ဖြင့် ပို့ဆောင်ပေးနေစဉ်
ဓာတ်ပုံ - တပ်မတော်ကာကွယ်ရေးဦးစီးချုပ်ရုံး

ရန်ကုန်၊ အောက်တိုဘာလ ၁၄

ရခိုင်ပြည်နယ်၊ မောင်တောဒေသ အကြမ်းဖက် တိုက်ခိုက်မှုများအား ဦးဆောင်ခဲ့သူမှာ မောင်တောဒေသတွင် လှုပ်ရှားသည့် အကာလ်မူလ် မူဂျာဒီဟင်န် (Aqu Mul Mujahidin) အဖွဲ့မှ ဆောင်ရွက်ခြင်းဖြစ်ပြီး ယင်းအဖွဲ့အား ဦးဆောင်နေသူမှာ ပါကစ္စတန်နိုင်ငံရှိ စစ်သွေးကြွအဖွဲ့အစည်းဖြစ်သည့် တာလီဘန်များထံတွင် ခြောက်လသင်တန်း တက်ရောက်ခဲ့ဖူးသူ ဟာဗစ်တူဟာရပ်ဖြစ်ကြောင်း အောက်တိုဘာလ ၁၄ ရက်တွင် နိုင်ငံတော်သမ္မတရုံးက ထုတ်ပြန်လိုက်သည်။

အကြမ်းဖက်တိုက်ခိုက်ခဲ့သူများအား တပ်မတော်က ရှင်းလင်းမှုများ ပြုလုပ်ရာတွင် ဖမ်းဆီးရမိသူများအား စစ်ဆေးချက်များအပေါ် အခြေခံ၍ ထုတ်ပြန်ခဲ့ခြင်းဖြစ်ကာ ယင်းအကြမ်းဖက်တိုက်ခိုက်မှုသည် ပြည်ပမှ ငွေကြေးထောက်ပံ့မှု၊ ပြည်ပအကြမ်းဖက် အဖွဲ့အစည်းဝင်များ၏ ပံ့ပိုးကူညီမှုဖြင့် အချိန်ယူကာ စနစ်တကျ ကြိုတင်ဆောင်ရွက်ခဲ့သော အကြမ်းဖက် တိုက်ခိုက်မှု ဖြစ်သည်။

“ဦးဆောင်သူမှာ မောင်တောမြို့နယ်၊ ကျောက်ပြင်ဆိပ်ကျေးရွာနေ ဘာသာရေး၊ လူမျိုးရေး အစွန်းရောက် တစ်ဦးဖြစ်သည့် ဟာဗစ်တူဟာရ် ဖြစ်ကြောင်း၊ အသက် ၄၅ နှစ်ခန့်ရှိသည့် ဟာဗစ်တူဟာရ်သည် ပါကစ္စတန်နိုင်ငံရှိ တာလီဘန်များထံ ၆ လ သင်တန်းတက်ရောက်ခဲ့သူဖြစ်ပြီး ၄င်း၏အစ်မ ၄ ဦးနှင့် အစ်ကို ၁ ဦးတို့မှာ ဆော်ဒီအာရေးဗီးယားနိုင်ငံတွင် နေထိုင်လျက်ရှိကြောင်း၊ ဟာဗစ်တူဟာရ်သည် ဘင်္ဂလားဒေ့ရ်ှနိုင်ငံ၊ တက္ကနာ့ဖ်အနီးရှိ ကျေးရွာတစ်ရွာတွင်လည်း သွားရောက် နေထိုင်လေ့ရှိပြီး ဒုက္ခသည်အမည်ခံ၍ အရှေ့အလယ်ပိုင်းနိုင်ငံများရှိ အဖွဲ့အစည်းများထံမှ ငွေကြေး ထောက်ပံ့မှုများ ရယူလျက်ရှိကြောင်း” အောက်တိုဘာလ ၁၄ ရက်က မောင်တောကိစ္စနှင့် ပတ်သက်သည့် သမ္မတရုံး၏ ထုတ်ပြန်ချက်တွင် ဖော်ပြထားသည်။

ဟာဗစ်တူဟာရ်နှင့် ပူးပေါင်းလုပ်ဆောင်သူများထဲတွင် ပါကစ္စတန်နိုင်ငံတွင် အကြမ်းဖက်သင်တန်း တက်ရောက်ထားသူ တစ်ဦးဖြစ်သည့် ပါကစ္စတန်နိုင်ငံသား ခါလစ် ဆိုသူလည်း ပါဝင်ကာ ယင်းမှာ မြန်မာ၊ ဘင်္ဂါလီ၊ မလေး၊ ပါကစ္စတန်နှင့် အင်္ဂလိပ် ဘာသာစကားများအား ကျွမ်းကျင်စွာ ပြောဆိုနိုင်သူ တစ်ဦးဖြစ်သည်။ ထို့ပြင် ဘင်္ဂလားဒေ့ရ်ှနိုင်ငံရှိ ကူတာပါလောင် ဒုက္ခသည်စခန်းတွင် နေထိုင်သည့် အီဗရာဟိန်း၊ အဇာ၊ အာရပ်တူလာ၊ နီလာဒုက္ခစခန်းတွင် နေထိုင်သည့် ဇူဘိုင်၊ အစ္စလာမ် ဆိုသူ အပါအ၀င် ၁၂ ဦးရှိကြောင်း မြန်မာအစိုးရဘက်မှ ထုတ်ပြန်ထားသည်။

၎င်းတို့မှာ ဟာဗစ်တူဟာရ်၏ အစီအစဉ်ဖြင့် မောင်တောဒေသသို့ ၀င်ရောက်ခဲ့ကာ ဟာဗစ်တူဟာရ် စည်းရုံးထားသည့် ဒေသနေ အစွန်းရောက်လူငယ်များအား အကြမ်းဖက်သင်တန်းများ ပေးခဲ့ကြောင်းလည်း သမ္မတရုံး၏ ထုတ်ပြန်ချက်တွင် ပါရှိသည်။

အောက်တိုဘာလ ၉ ရက်က ဖြစ်ပွားခဲ့သည့် ရခိုင်ပြည်နယ်၊ မောင်တောမြို့ နယ်ခြားစောင့်စခန်း တိုက်ခိုက်ခံရမှုတွင် မြန်မာနိုင်ငံ ရဲတပ်ဖွဲ့ဝင် ကိုးဦးကျဆုံးခဲ့ပြီး အကြမ်းဖက်သမားများဘက်မှ ရှစ်ဦး သေဆုံးကာ နှစ်ဦးအား အရှင် ဖမ်းမိခဲ့သည်။

ထို့ပြင် အကြမ်းဖက်သမားများအား လိုက်လံရှင်းလင်းမှုတွင် ထိတွေ့မှုများ ဖြစ်ပွားခဲ့ကာ အောက်တိုဘာလ ၁၄ ရက်အထိ တပ်မတော်သားငါးဦး ကျဆုံးခဲ့ရသည်။

ငါးခူရအလယ်ရွာတွင် အဓိက စည်းရုံးလှုပ်ရှားခဲ့သူများဖြစ်သည့် ငါးခူရကျေးရွာနေ အဒူရာမန်၊ မူနက်၊ ကာဖိုက်တူလာ၊ အာကစ်တို့ (၄) ဦး သည်လည်း RSO စစ်သင်တန်းတက်ရောက်ပြီးသူများဖြစ် ကြောင်း၊ ဟာဗစ်တူဟာရ်၊ ခါလစ်နှင့်ကျီးကန်းပြင်စခန်းအား တိုက်ခိုက်ရာတွင် ဦးဆောင်သူ မောင်နှမ ကျေးရွာနေ မာဘူယာတို့သည် ဘင်္ဂလားဒေ့ရ်ှနိုင်ငံ၊ ဒုက္ခသည်စခန်းမှ ဝင်ရောက်လာသည့် အကြမ်းဖက် အဖွဲ့ဝင် ၁၂ ဦးနှင့်ပေါင်း၍ မောင်တောမြို့နယ်၊ ဖားဝပ်ချောင်းကျေးရွာ၊ အလယ် သံကျော်ကျေးရွာနှင့် ငန်းချောင်းကျေးရွာတို့တွင် ဓါးပြတိုက်ခဲ့ဘူးကြောင်း၊ ဟာဗစ်တူဟာရ်နှင့် အဖွဲ့သည် မောင်တောဒေသအတွင်းရှိ အစွန်းရောက်လူငယ်များကို စည်းရုံး သိမ်းသွင်း ကာ တောတွင်းနှင့် တောင်ပေါ်လူသူအရောက်အပေါက်နည်းသည့် နေရာများတွင် လည်းကောင်း၊ ငါးခူရအလယ်ကျေးရွာရှိ အဒူရာမန်၏ နေအိမ်ခြံဝင်းအတွင်းတွင် လည်းကောင်း၊ ကျောက်ပြင် ဆိပ်ကျေးရွာအနီး တောတွင်းတွင်လည်းကောင်း သေနတ်ပစ်သင်တန်းနှင့် ကိုယ်ခံပညာ သင်တန်းများကို တိတ်တဆိတ်သင်ကြားပေးခဲ့ကြောင်း၊ ၄င်းနောက် အကြမ်းဖက် တိုက်ခိုက်မှုများ ဆောင်ရွက်ရန် စီစဉ်ဆောင်ရွက်ခဲ့ခြင်းဖြစ်ကြောင်း စစ်ဆေးဖော်ထုတ်ရရှိခဲ့သည်ဟု မြန်မာအစိုးရဘက်မှ ထုတ်ပြန်ထားသည်။

တိုက်ခိုက်မှုများအား ဦးဆောင်ခဲ့သူ ဟာဗစ်တူဟာရ်က နယ်ခြားစောင့် ရဲစခန်းများအား တိုက်ခိုက်ရန်နှင့် လက်နက်နှင့် ပစ္စည်းများ ရယူရန်၊ ရရှိသည့် လက်နက်များဖြင့် အခြား တပ်မတော်နှင့် ရဲတပ်ဖွဲ့စခန်းများအား ဆက်လက်တိုက်ခိုက်ရန် ညွှန်ကြားထားကြောင်း၊ အစ္စလာမ်ဘာသာဝင် အများစုနေထိုင်သည့် ဘူးသီးတောင်၊ မောင်တောဒေသကို သိမ်းပိုက်၍ ပြည်ပထောက်ခံမှု၊ ငွေကြေးပံ့ပိုးမှုများ မြင့်တက်လာစေရန်၊ ပြည်တွင်း၊ ပြည်ပမှဘာသာရေးအစွန်းရောက်များ ပူးပေါင်းပါဝင်လာစေရန်အတွက် တာလီဘန်၊ အယ်လ်ကိုင်းဒါး၊ ISIS စသည့် အကြမ်းဖက် အဖွဲ့အစည်းများ၏ နည်းနာအတိုင်း အင်တာနက်နှင့် လူမှု ကွန်ရက်များတွင် ဗီဒီယိုဖိုင်များလွှင့်တင်ကာ ဝါဒဖြန့်ချိလျက်ရှိကြောင်းလည်း ဖမ်းဆီးရမိခဲ့သည့် အကြမ်းဖက်သမားများကို စစ်ဆေးချက်များအရ မြန်မာအစိုးရက ထုတ်ပြန်ထားသည်။

အကြမ်းဖက်တိုက်ခိုက်မှုများနှင့် ပတ်သက်၍ တည်ဆဲဥပဒေများအရ ထိထိရောက်ရောက်၊ ကာကွယ် တုံ့ပြန်ချေမှုန်းတိုက်ဖျက်သွားမည်ဖြစ်ကာ နောက်ကွယ်မှ ကြိုးကိုင်စီစဉ်သူများ၊ ပံ့ပိုးကူညီသူများ၊ အကြမ်းဖက်မှုကို အားပေးသည့် အဖွဲ့အစည်းနှင့် လူပုဂ္ဂိုလ်များအား ဆက်လက်ဖော်ထုတ်၍ ထိရောက်စွာ အရေးယူသွားမည်ဟုလည်း သမ္မတရုံးက ပြောဆိုထားသည်။

အောက်ချင်းသစ္စာ သတင်းအေဂျင်စီ