2016

ကလေး၊ ဒီဇင်ဘာ ၄

အကြောင်းအမျိုးမျိုးကြောင့် မူးယစ်ဆေးဝါး သုံးစွဲသူများအား မိမိစိတ်ဆန္ဒဖြင့် ဆေးဖြတ်လိုပါက ဆေးဖြတ်နိုင်ရန်အတွက် စတုတ္ထမြောက် ကိုယ်ထူကိုယ်ထ ဆေးဖြတ်စခန်းကို စစ်ကိုင်းတိုင်း၊ ကလေးခရိုင်၊ ကလေးမြို့၊ ကံကြီးကျေးရွာ ဘုန်းတော်ကြီးကျောင်းဝင်းအတွင်း ဒီဇင်ဘာလ ၄ ရက်က ဖွင့်လှစ်လိုက်သည်။

ယခင်က ကလေးခရိုင်၊ ကလေးမြို့အတွင်းရှိ သက်ကယ်ကျင်း၊ ဒိုးနွယ်နှင့် ထိုမာကျေးရွာတို့တွင်လည်း ဖွင့်လှစ်ခဲ့ရာ ယခု ဖွင့်လှစ်သော ကိုယ်ထူကိုယ်ထ ဆေးဖြတ်စခန်းမှာ စတုတ္ထမြောက် ဖြစ်သည်။

“ကိုယ့်မိသားစု၊ ကိုယ့်ပတ်ဝန်းကျင်၊ ကိုယ့်ရပ်ရွာမှာ မူးယစ်ဆေးတွေက များပြားလာတယ်။ လူငယ်တွေ အများဆုံးက မူးယစ်ဆေးကို အပျော်သဘော သုံးစွဲလာတယ်။ လူငယ်တွေမှာဆို ၁၇၊ ၁၈ လောက်တွေ ပိုများတယ်။ သူတို့တွေဟာဆို ပညာလည်း မသင်ကြတော့ဘူး။ မူးယစ်ဆေးရှိတဲ့နေရာမှာပဲ ရောက်နေတယ်။ သူတို့တွေရဲ့ ဘ၀ဆို တိုးတက်စရာလမ်းကို မရှိတော့ပါဘူး။ သူတို့တွေက ရှစ်တန်းလောက်ဆို ကျောင်းထွက်တယ်၊ လယ်လုပ်တယ်။ လယ်လုပ်ရင်းနဲ့ဘဲ မူးယစ်ဆေးဝါးထဲကို ရောက်ရှိသွားတယ်။ ပထမကတော့ အပျော်လုပ်တယ်၊ အပျော်ကနေတစ်ဆင့် စွဲသွားပါတယ်။ စွဲသွားတာနဲ့ မိဘဆီမှာ ပိုက်ဆံတောင်းတယ်၊ မရရင် ခိုးတယ်။ နောက်တော့ စာရိတ္တတွေ ပျက်စီးလာတယ်။ ဒါကြောင့် ကျွန်မတို့အနေနဲ့ ရွာဦးဘုန်းတော်ကြီးနဲ့တကွ အုပ်ချုပ်ရေးပူးပေါင်းပြီး ဆေးဖြတ်စခန်းကို ဖွင့်လှစ်ခဲ့ပါတယ် ” ဟု ဆေးဖြတ်စခန်း ဖွင့်လှစ်ရေးတွင် ပါဝင်ဆောင်ရွက်လျက်သည့် ကံကြီးကျေးလက် မူးယစ်ဆန့်ကျင်ရေးအဖွဲ့ MANA ဥက္ကဋ္ဌ ဒေါ်သီတာထွေးက အောက်ချင်းသစ္စာ သတင်းအေဂျင်စီသို့ ပြောသည်။

အဆိုပါ ဆေးဖြတ်စခန်းကို မူးယစ်ဆန့်ကျင်ရေးအဖွဲ့ MANA ၏ အကူအညီဖြင့် ဖွင့်လှစ်ခဲ့ခြင်းဖြစ်ကာ ကံကြီး၊ ရာဇဂြိုဟ်၊ ခုံသာ၊ ညောင်ကုန်း၊ အောင်ရွာတို့မှ မိမိစိတ်ဆန္ဒဖြင့် မူးယစ်ဆေးဖြတ်လိုသူ ၇၁ ဦး တက်ရောက် ဆေးဖြတ်လျက် ရှိသည်။ ကံကြီးကျေးရွာတွင် ယခင်ကလည်း MANA အကူအညီ မယူဘဲ လူမှုအဖွဲ့အစည်း၊ NGO အဖွဲ့များ ကူညီမှုဖြင့် မူးယစ်ဆေးဖြတ်စခန်း နှစ်ကြိမ် ဖွင့်လှစ်ခဲ့ဖူးသေးသည်။

ဆေးဖြတ်သူများထဲတွင် အသက် အငယ်ဆုံး ၂၀ နှစ်မှ အကြီးဆုံး ၇၈ နှစ်အထိ ပါဝင်ပြီး ၎င်းတို့အား မက်သဒုန်း အစားထိုးဆေး ပေးခြင်း နည်းစနစ်ဖြင့် ကလေးမြို့ ပြည်သူ့ဆေးရုံမှ ဆရာဝန်များက ကိုယ်တိုင်စောင့်ရှောက် ကုသပေးမည် ဖြစ်သည်။

“စီးပွားရေးလည်း ပျက်ပြားတယ်၊ မိသားစုအနေနဲ့လည်း ဒုက္ခရောက်တယ်။ မိမိကလည်း အသက်က တဖြည်းဖြည်း ကြီးလာပြီ။ နောက်နောင် များစွာ ခက်လာနိုင်တယ်။ ဒါကြောင့်မို့ ဒီဆေးကို မဖြစ်မနေ ဖြတ်ကို ဖြတ်ရမယ်လို့ ရည်ရွယ်ထားခဲ့တာပါ။ ဒီဆေးကို သုံးစွဲလာတာဆို ၂၃ နှစ်သားကတည်းက သုံးစွဲလာတာ။ သုံးတာကတော့ ဘိန်းမဲပါ။ ဘိန်းမဲစားတာပါ”ဟု မိမိဆန္ဒဖြင့် မူးယစ်ဆေးသုံးစွဲမှု ဖြတ်ရန် ပြင်ဆင်ထားသည့် ကံကြီးရွာသား အသက် ၅၆ နှစ်အရွယ် ဦးခင်မောင်ဝင်းက ဆိုသည်။


ခုံသာကျေးရွာမှ ကိုကျော်ဝင်းဆန်းကလည်း “ကျွန်တော် သုံးခါစကတော့ အပျော်လို့ သုံးခဲ့တာပါ။ အခုတော့ လိုက်မမီတော့ဘူးဗျ။ ငွေကလည်း ရသမျှ ဒီထဲချည်း ရောက်နေတယ်။ ဒါကြောင့်မို့ အချိန်မီ ကျွန်တော့်ဘ၀ပြုပြင်ဖို့ ဆုံးဖြတ်တာပါ။ ကျွန်တော် ဆေးသုံးစွဲတာကတော့ တစ်နှစ်လောက် ရှိပါပြီ။ ပထမဆုံး သုံးတာက အရက်သောက်ရင်း မူးပြီး ခေါင်းကိုက်လို့ သူငယ်ချင်းက ဒီဆေးသုံးရင် သက်သာတယ်ဆိုလို့ သုံးလိုက်တာကနေ သုံးခဲ့တာပဲ။ အခုဆို တစ်ခါသုံးရင် ၅၀၀၀ ဖိုးလောက် သုံးတယ်။ ကျွန်တော် ဒီဆေးဖြတ်စခန်း ပြီးတာနဲ့ မသုံးစွဲတော့ဘူးဗျာ။ ကျွန်တော့်မှာ မိသားစုဆိုလို့ အမေပဲ ရှိတာပါ။ အမေ စိတ်ချမ်းသာအောင် ထားတော့မှာပါ” ဟု ပြောသည်။

မိမိစိတ်ဆန္ဒဖြင့် မူးယစ်ဆေးဖြတ်လိုသူများအား ကူညီသည့်အနေဖြင့် ခရိုင်နှင့် မြို့နယ် MANA အဖွဲ့က ကိုယ်ထူကိုယ်ထ ဆေးဖြတ်စခန်းများကို ဖွင့်လှစ်ခဲ့ရာ သက်ကယ်ကျင်းရွာ၌ ကျား ၈၃ ဦးနှင့် မ ၃ ဦး၊ စုစုပေါင်း ၈၆ ဦး၊ ဒိုးနွယ်ရွာတွင် ကျား ၃၇ ဦး၊ ထိုမာရွာတွင် ၁၀ ဦးတို့ကိုလည်း ဆေးဖြတ်ပေးခဲ့ပြီး ဖြစ်သည်။

သန့်ဇင်ဆွေ (အောက်ချင်းသစ္စာ သတင်းအေဂျင်စီ)
Read more »

ကလေး၊ နိုဝင်ဘာ ၃၀

အမျိုးသမီးများ တွေ့ကြုံနေရသည့် အိမ်တွင်း အကြမ်းဖက်မှုများ ဆန့်ကျင်သည့်အနေဖြင့် စစ်ကိုင်းတိုင်း၊ ကလေးမြို့၊ ချမ်းမြအောင်စည်ရပ်ကွက်ရှိ အေးရိပ်မွန်ဂေဟာတွင် 16 Days of Activism 2016 အမည်ဖြင့် နိုဝင်ဘာလ ၃၀ ရက်က ပြုလုပ်ခဲ့ရာ လူဦးရေ ၁၀၀ ကျော် တက်ရောက်ခဲ့သည်။

အဆိုပါ လှုပ်ရှားမှုကို အမျိုးသမီးများ အကြမ်းဖက်မှုဆန့်ကျင်ရေးနေ့ ဖြစ်ပေါ်လာပုံ၊ အိမ်တွင်း အကြမ်းဖက်မှု ဟူသည့် စကားရပ်၏ အဓိပ္ပာယ်ဖွင့်ဆိုချက်ကို နားလည်စေရန်နှင့် အကြမ်းဖက်မှုအား ဆန့်ကျင်လှုံ့ဆော်မှုများအား လုပ်ဆောင်လာကြစေရန်အတွက် ရည်ရွယ်၍ ပြုလုပ်ခဲ့ခြင်းဖြစ်သည်။

“အိမ်တွင်း ငြိမ်းချမ်းရေးမှသည် ငြိမ်းချမ်းသော ကမ္ဘာဆီသို့” “အမျိုးသမီးများအား အကြမ်းဖက်မှု ပပျောက်ဖို့ အမျိုးသားများလည်းပါဝင်စို့” ဟု ဦးတည်ရည်ရွယ်ထားသည့် အဆိုပါ လှုပ်ရှားမှု အခမ်းအနားကို Dawn Action on Women’s Network အဖွဲ့က ဦးဆောင်ခြင်းဖြစ်ပြီး အိမ်တွင်း အကြမ်းဖက်မှုအပါအ၀င် အလုပ်ခွင်များတွင် ကြုံတွေ့ရတတ်သော အကြမ်းဖက်မှုများအား ဆရာ စိုင်းအားတီက ရှင်းလင်းခဲ့သည်။

ထို့ပြင် ယခုကာလအပိုင်းအခြားအတွင်း မကြာခဏဆိုသလို ဖြစ်ပေါ်နေသည့် သက်ငယ်မုဒိန်းမှုနှင့် ကလေးငယ်များအား မုဒိန်းပြုကျင့်မှုနှင့် ဆက်စပ်သည့် ကိစ္စရပ်များကိုလည်း ထည့်သွင်းရှင်းလင်းခဲ့ပြီး တက်ရောက်လာသူများက မေးခွန်းများ မေးမြန်းခဲ့ကြသည်။

“ဒီပွဲတက်ရတဲ့အတွက် သက်ငယ်မုဒိန်းမှုတွေမှာဆိုလို့ရှိရင် သက်ငယ်မုဒိန်းကျင့်ခံရသူတွေအတွက် ဥပဒေအရ ဘယ်လို အကာအကွယ်ပေးထားတယ်ပေါ့နော်။ နောက်ပြီး လူကြီးတွေမှာလည်း အလိုမတူဘဲ အဓမ္မပြုကျင့်တဲ့အခါတွေမှာ ဘယ်လိုတိုင်တန်းလို့ ရတယ်၊ အဲဒီလိုမျိုးတွေ သိရတယ်။ ပြီးတော့ ကိုယ်ကိုယ်တိုင် ဒီ ပွဲလေးကို တက်လာတဲ့အခါမှာ ကိုယ့်ရဲ့ ပတ်ဝန်းကျင်ကလည်း ဘယ်လို ဖြစ်ရင် ဘယ်လိုလုပ်၊ ဘယ်ကို သွားစေတာမျိုးတွေ ပြန်ပြီး ရှယ်ပေးနိုင်တာပေါ့။ အဲဒါမျိုးတွေ သိခဲ့ရတယ်” ဟု ပွဲတက်ရောက်ခဲ့သူ ဒေါ်နီနီလှိုင်က အောက်ချင်းသစ္စာ သတင်းအေဂျင်စီသို့ ပြောသည်။

၁၆ ရက်တာ ကြာမြင့်မည့် အဆိုပါ လှုပ်ရှားမှုကို ဦးဆုံးရက်အနေဖြင့် ကလေးမြို့တွင် ပြုလုပ်ခဲ့ခြင်းဖြစ်ပြီး ကျန်ရက်များတွင် ချင်းပြည်နယ်တွင်းရှိ တီးတိန်၊ တွန်းဇံ၊ ကျီခါး အပါအ၀င် အခြား မြို့များတွင်ပါ ဆက်လက်ပြုလုပ်သွားမည်ဖြစ်သည်။

အောက်ချင်းသစ္စာ သတင်းအေဂျင်စီ
Read more »

Photo : www.boell.de
ရန်ကုန်၊ နိုဝင်ဘာ ၂၆

၂၀၁၇ ခုနှစ် ဧပြီလ ၁ ရက်တွင် ပြုလုပ်မည့် ကြားဖြတ်ရွေးကောက်ပွဲတွင် ပါဝင်ယှဉ်ပြိုင်ကြမည့် အမျိုးသားဒီမိုကရေစီအဖွဲ့ချုပ် NLD မှ ကိုယ်စားလှယ်လောင်းများအား ဗဟိုအလုပ်အမှုဆောင်အဖွဲ့ အစည်းအဝေးဆုံးဖြတ်ချက်ဖြင့် နုိုဝင်ဘာလ ၂၆ ရက်က ထုတ်ပြန်လိုက်ပြီ ဖြစ်သည်။

နိုဝင်ဘာလ ၂၅ ရက် အစည်းအဝေးဆုံးဖြတ်ချက်ဖြင့် ထုတ်ပြန်ခဲ့သော အဆိုပါလူစာရင်းတွင် အမျိုးသား ၁၆ ဦးနှင့် အမျိုးသမီး နှစ်ဦးတို့ ပါဝင်ပြီး အမျိုးသမီးနှစ်ဦးမှာ နန်းစင့်ခမ်းနှင့် ဒေါ်စန်းစန်းမြင့်တို့ ဖြစ်သည်။

နိုဝင်ဘာ ၂၅ ရက် ဗဟိုအလုပ်အမှုဆောင် အစည်းအဝေးဆုံးဖြတ်ချက်အရ ထုတ်ပြန်လိုက်သည့် ပါတီကိုယ်စားလှယ်လောင်းများ စာရင်း

NLD အနေဖြင့် လာမည့် ကြားဖြတ်ရွေးကောက်ပွဲတွင် လစ်လဲမဲဆန္ဒနယ်အားလုံး အနိုင်ရရမည်ဖြစ်ကြောင်း ပါတီဥက္ကဋ္ဌ ဒေါ်အောင်ဆန်းစုကြည်က ညွှန်ကြားထားကြောင်း ရန်ကုန်မြို့ ဗဟန်းမြို့နယ်၊ ပါတီရုံးချုပ်တွင် အောက်တိုဘာလ ၂၆ ရက်က ပြုလုပ်သည့် ပါတီဗဟိုအလုပ်အမှုဆောင်များနှင့် ရန်ကုန်တိုင်းဒေသကြီးမှ တိုင်းဒေသကြီး လွှတ်တော်ကိုယ်စားလှယ်များနှင့် တွေ့ဆုံပွဲတွင် ပါတီနာယက သူရဦးတင်ဦးက ပြောဆိုထားသေးသည်။

"ကျွန်တော်ခေါင်းဆောင်ဟာ ပြောခဲစေ ဆိုခဲစေ။ ဒါပေမဲ့ ပြောရင်ဆိုရင် တကယ်ဖြစ်အောင်လုပ်တယ်၊ ကြားဖြတ်ရွေးကောက်ပွဲမှာလည်း အခုပြောပြန်ပြီ၊ အကုန်လုံးရအောင်လုပ်ရမယ်လို့ ပြောတာပဲ။ ဒါကြောင့်မို့ ကျွန်တော်တို့ အကုန်လုံးရအောင် ကြိုးစားဖို့လိုလာတယ်၊ အကုန်လုံးရအောင် လုပ်မယ်ဆိုခဲ့ရင်လည်း ကျွန်တော်တို့ဟာ စည်းလုံးညီညွှတ်မှုကို ပြနိုင်မှ ပြည်သူလူထုက ယုံကြည်မှာဖြစ်ပါတယ်" ဟု သူရဦးတင်ဦးက ပြောဆိုခဲ့ခြင်း ဖြစ်သည်။

အောက်ချင်းသစ္စာ သတင်းအေဂျင်စီ
Read more »

ရန်ကုန်၊ နိုဝင်ဘာ ၂၆

မည်သည့်အတွက်ကြောင့်ဟု သေချာစွာ ဖော်ပြထားခြင်းမရှိဘဲ ဗဟိုအလုပ်အမှုဆောင်အဖွဲ့၏ အစည်းအဝေးဆုံးဖြတ်ချက်အရ အမျိုးသားဒီမိုကရေစီအဖွဲ့ချုပ်ပါတီ NL မှ ပြည်သူ့လွှတ်တော်ကိုယ်စားလှယ် သုံးဦးအား ပါတီ၏ တာဝန်အသီးသီးမှ ရုပ်သိမ်းလိုက်ပြီဖြစ်ကြောင်း ဗဟိုအလုပ်အမှုဆောင်အဖွဲ့က နိုဝင်ဘာလ ၂၆ ရက်က ကြေညာချက်ထုတ်လိုက်သည်။

ကြေညာချက်အမှတ် ၃/၁၀/၂၀၁၆ အရ တာဝန်အသီးသီးမှ ရုပ်သိမ်းခံရသည့် NLD ပြည်သူ့လွှတ်တော်ကိုယ်စားလှယ် သုံးဦးမှာ ဦးစိန်ဝင်း (မအူပင်မြို့နယ်)၊ ဒေါက်တာစိုးမိုးသူ (မြောင်းမြမြို့နယ်) နှင့် ဦးဥာဏ်လင်း (ရွှေပြည်သာမြို့နယ်) တို့ ဖြစ်သည်။

ဒေါက်တာစိုးမိုးသူမှာ လူမှုရေးပြဿနာများကြောင့် လူအများ အာရုံစိုက်ခံခဲ့ရသော ကိုယ်စားလှယ်တစ်ဦးဖြစ်ပြီး ဦးဥာဏ်လင်းမှာ ရွှေပြည်သာမြို့နယ်အတွင်းရှိ မိုတယ်တစ်ခုအတွင်း မိုတယ်ဝန်ထမ်းများနှင့် အချင်းပွားမှု ဖြစ်ပွားခဲ့သည့်ကိစ္စနှင့် ပတ်သက်၍ အာရုံစိုက်ခံခဲ့ရသည့် ကိုယ်စားလှယ် ဖြစ်သည်။

ထို့ပြင် တာဝန်အသီးသီးမှ ရုပ်သိမ်းခံရသူ မအူပင်မြို့နယ် ပြည်သူ့လွှတ်တော် ကိုယ်စားလှယ် ဦးစိန်ဝင်းမှာ ပြည်သူ့လွှတ်တော် တောင်သူလယ်သမား၊ အလုပ်သမားနှင့် လူငယ်ရေးရာကော်မတီဥက္ကဋ္ဌ ဖြစ်သည်။

အောက်ချင်းသစ္စာ သတင်းအေဂျင်စီ
Read more »

ကလေး၊ နိုဝင်ဘာ ၂၅

အမျိုးသမီးများအပေါ် အကြမ်းဖက်မှုများ ပပျောက်စေလိုသည့် ရည်ရွယ်ချက်ဖြင့် “နိုင်ငံတကာ အမျိုးသမီးများအပေါ် နည်းမျိုးစုံဖြင့် အကြမ်းဖက်မှု ပပျောက်ရေးနေ့” အထိမ်းအမှတ်ပွဲကို စစ်ကိုင်းတိုင်း၊ ကလေးမြို့၊ သိမ့်ခန်းမတွင် နိုဝင်ဘာလ ၂၅ ရက်က ပြုလုပ်ခဲ့သည်။

နေ့လယ် ၁ နာရီခွဲတွင် စတင်ပြုလုပ်ခဲ့သည့် အဆိုပါ အထိမ်းအမှတ် အခမ်းအနားပွဲကို Women for Justice (တရားမျှတမှုအတွက် အမျိုးသမီးများ) အဖွဲ့က ဦးဆောင်ပြုလုပ်ခဲ့ခြင်းဖြစ်ကာ တိုင်းဒေသကြီး လွှတ်တော်ကိုယ်စားလှယ် ဒေါ်သန့်ဝေကျော်၊ မြို့နယ်အာဏာပိုင်အဖွဲ့အစည်းများဖြစ်သည့် ခရိုင်အုပ်ချုပ်ရေးအဖွဲ့နှင့် ရဲတပ်ဖွဲ့ဝင်များ၊ အဖွဲ့အစည်းအသီးသီးမှ ပုဂ္ဂိုလ်များ၊ စုစုပေါင်း ၂၀၀ ကျော် တက်ရောက်ခဲ့ကြသည်။

ယင်းအခမ်းအနားကို အစီအစဉ် ၁၈ ခုဖြင့် ပြုလုပ်ခဲ့ခြင်းဖြစ်ကာ အဓိကအားဖြင့် အမျိုးသမီးတွေအပေါ် အကြမ်းဖက်မှုများအား ဥပဒေပိုင်းဆိုင်ရာရှုထောင့်မှ သုံးသပ်ချက်၊ အုပ်ချုပ်ရေးပိုင်းက သုံးသပ်ချက်၊ အမျိုးသမီးကဏ္ဍမှ သုံးသပ်ချက် စသည့်ကဏ္ဍများ ပါဝင်သည်။

“အဓိက က အမျိုးသမီးတွေအပေါ်မှာ အကြမ်းဖက်မှုတွေဖြစ်နေတာကို တရားဥပဒေ အနေနဲ့ ပုဒ်မတွေသာ ရှိနေပြီး အသက် မဝင်ဖြစ်နေတာတွေကို အသက်ဝင်လာဖို့ တွန်းအားပေးတာပါ” ဟု Women for Justice အဖွဲ့ဝင် မငြိမ်းငြိမ်းထွန်းက အောက်ချင်းသစ္စာ သတင်းအေဂျင်စီသို့ ပြောသည်။

ထို့ပြင် သက်ငယ်မုဒိန်းမှုများ ဖြစ်ပေါ်နေမှုပတ်သက်၍ ဖြစ်ပေါ်ရသည့် အကြောင်းအရင်းများအား သုံးသပ်ကြခြင်းနှင့် မည်ကဲ့သို့ အရေးယူသင့်သည်ဆိုသည့် ကိစ္စရပ်နှင့် ပတ်သက်၍လည်း ထည့်သွင်းဆွေးနွေးခဲ့ကြသေးသည်။

“အခု အဖြစ်များနေတဲ့ သက်ငယ်မုဒိမ်းမှုတွေမှာလည်း တရားဥပဒေအရ တချို့ကို အရေးယူပေမယ့် တရားမျှတမှု မရှိတာတွေကို ချပြတဲ့ပွဲပါ”ဟုလည်း မငြိမ်းငြိမ်းထွန်းက ဆိုသည်။

သန့်ဇင်ဆွေ
Read more »

(ထွဏ်းမောင်၊ လွဏ်းမောင် ဆွေးနွေးခန်း)


ထွဏ်းမောင် - ဗျို့ ကိုလွဏ်းမောင်။ ငြိမ်ချက်သား ကောင်းနေပါလားဗျ။

လွဏ်းမောင် - ငြိမ်ဆို ငါက ဗိုလ်အောင်ဒင်နဲ့ ငြိမ့်နေတာ မဟုတ်ဘူးဗျ။ အခုက အတွေးနယ်ချဲ့တယ်ပဲ ပြောမလား၊ ဒါမှမဟုတ် စိတ်ပျက်လက်ပျက် ထိုင်နေတယ်လို့ပဲ ပြောရမလား မသိတော့ပါဘူးဗျာ။

ထွဏ်းမောင် - ဟ ဘာဖြစ်လို့တုန်းဗျ။ ဘာတွေများ အတွေးနယ်ချဲ့နေလို့တုန်း။ ဒါမှမဟုတ် ခင်ဗျားစကားအရ ဘာ့ဇာကြောင့် စိတ်ပျက်လက်ပျက် ထိုင်နေတာတုန်းလို့ပဲ မေးရတော့မယ်။

လွဏ်းမောင် - ပြောရရင်လည်း မကောင်းပေဘူးလို့ပဲ ကြိုစကားခံရတော့မယ်ဗျာ။ ခင်ဗျားကော ဒီကနေ့ လွှတ်တော်သတင်းတွေ မကြည့်ဘူးလားဗျ။ ဘာတဲ့ ကုန်ဈေးနှုန်း တက်တာနဲ့ ပတ်သက်ပြီး ပြည်ထောင်စုဝန်ကြီး ဖြေသွားတဲ့ကိစ္စလေ။

ထွဏ်းမောင် - သဲ့သဲ့တော့ ကြားသားဗျ။ ညတုန်းက MNTV ရုပ်သံလိုင်းမှာတောင် အဲဒီသတင်း လွှင့်သေးတယ်လေ။ ကုန်ဈေးနှုန်း မြင့်တက်မှုကို အစိုးရက ၀င်ရောက်ကိုင်တွယ် ဖြေရှင်းမှာ မဟုတ်ဘူး ဆိုလားပဲ။ တွေ့တော့ တွေ့လိုက်တယ်ဗျ။ မှန်တာပဲလေဗျာ။ အခုက ဈေးကွက်စီးပွားရေးစနစ်သွားတဲ့ကိစ္စမှာ အစိုးရက ၀င်ရောက်ကိုင်တွယ်စရာမှ မလိုတာဗျ။

လွဏ်းမောင် - အေးဆို အဲဒါပဲ ပြောတာဗျ။

ထွဏ်းမောင် - မှန်နေတာပဲလေဗျာ။ အဲဒါကို ခင်ဗျားက ဘာများ အတွေးနယ်ချဲ့ပြီး စိတ်ပျက်လက်ပျက် ဖြစ်ရတာတုန်း။

လွဏ်းမောင် - သြော် မေးလာတော့လည်း ဖြေရတော့မယ်။ အခု NLD အစိုးရလက်ထက်မှာ ဈေးကွက်စီးပွားရေးစနစ် သုံးတာ ခင်ဗျား သိတယ်နော်။

ထွဏ်းမောင် - ဟုတ်တယ်လေဗျာ။

လွဏ်းမောင် - ဒါဆို ဈေးကွက်စီးပွားရေးစနစ်မှာ အစိ်ုးရက ၀င်ရောက်စွက်ဖက်ဖို့ မလိုတဲ့အကြောင်းကိုလည်း ခင်ဗျား သိတယ်နော်။

ထွဏ်းမောင် - သြော် သိပါတယ်ဆိုဗျာ။
ပန်းတောင်မဲဆန္ဒနယ်က ဒေါ်ခင်နှင်းသစ် တင်တဲ့ “အရပ်ရပ်ကုန်ဈေးနှုန်း တရိပ်ရိပ်တက်နေမှုအား ထိန်းချုပ်မည့်အစီအစဉ် ရှိ၊ မရှိ” အဆိုက လွှတ်တော်မှာ လက်ခံသင့်လား…၊ ကဲ ပြော...
လွဏ်းမောင် - ကဲ…ဒါဆို ခင်ဗျားကို မေးမယ်။ ပန်းတောင်မဲဆန္ဒနယ်က ဒေါ်ခင်နှင်းသစ် တင်တဲ့ “အရပ်ရပ်ကုန်ဈေးနှုန်း တရိပ်ရိပ်တက်နေမှုအား ထိန်းချုပ်မည့်အစီအစဉ် ရှိ၊ မရှိ” အဆိုက လွှတ်တော်မှာ လက်ခံသင့်လား…၊ ကဲ ပြော။

ထွဏ်းမောင် - အဲ…အဲဒီလိုတော့ ပြောလို့ မရဘူးဗျ။ အဒမ်စမ်ကတော့ သူ့ရဲ့ နိုင်ငံများရဲ့ဓနဆိုတဲ့ The Wealth of Nation မှာတော့ ကိုယ်ပျောက်လက်လို့ နာမည်ကျော်တဲ့ Invisible Hand အယူအဆကို ရှင်းထားတယ်ဗျာ။ အဲဒီအယူအဆမှာ သူက ရောင်းကုန်ပစ္စည်းများ အားလုံးမှာ သဘာဝဈေးနှုန်း (Natural Price) နဲ့ ဈေးကွက်ဈေးနှုန်း (Market Price) ဆိုပြီး နှစ်မျိုးရှိတယ်။ အဲဒီနှစ်ခု တစ်ထပ်တည်းကျနေတဲ့ ဈေးနှုန်းကို အားမျှခြေဈေးနှုန်း (Equilibrium Price) လို့ သုံးတယ်။ တကယ့် လက်တွေ့မှာ ဈေးကွက်ပေါက်ဈေးက အဲဒီအားမျှခြေဈေးနှုန်းရဲ့ အထက်မှာ ဖြစ်ဖြစ်၊ အောက်မှာ ဖြစ်ဖြစ် ရှိနိုင်တယ်။ ဒါပေမဲ့ ကိစ္စ မရှိဘူး။ ဈေးကွက်အင်အားစုဖြစ်တဲ့ ၀ယ်လိုအား၊ ရောင်းလိုအားရဲ့ ကိုယ်ပျောက်လက်က အဲဒီ အားမျှခြေအနေအထားကို အမြဲ ဦးတည်ဖို့ သူ့ဘာသာသူ မောင်းနှင်လိမ့်မယ်လို့ ဆိုတယ်။ ဒီနေရာမှာ စီးပွားရေးကို အစိုးရ အပါအ၀င် ဘယ်အင်အားစုကမှ ၀င်ရောက်စွက်ဖက်ဖို့ မသင့်ဘူး။ လွတ်လွတ်လပ်လပ် လွှတ်ထားလိုက်တာကသာ အကောင်းဆုံးလို့ စမစ်က ဆိုထားတယ်ဗျာ။

လွဏ်းမောင် - ဟုတ်တယ်လေ။

ထွဏ်းမောင် - အဲဒီအယူအဆအရဆိုရင်တော့ ဒေါ်ခင်နှင်းသစ်ရဲ့ အဆိုကို ဆွေးနွေးဖို့ လွှတ်တော်တင်ကတည်းက လက်မခံသင့်ဘူးဗျာ။ ဒါပေမဲ့ တစ်ခုရှိတာက ဗြိတိသျှလူမျိုး ဂျွန်မေးနက်ကိန်းရဲ့ သဘောတရားအမြင်တွေကိုလည်း ထည့်တွက်ဖို့တော့ လိုမယ်ထင်တယ်ဗျ။

လွဏ်းမောင် - သူရဲ့ ဘောဂဗေဒဆိုင်ရာ ဖွင့်ဆိုချက်ကကောဗျ။
သူက စီးပွားရေးကို အစိုးရက ၀င်ရောက်ထိန်းသိမ်းဖို့ လိုမယ်လို့ ဆိုထားသူဗျ။ သူ့အဆိုအရဆိုရင် စုဆောင်းမှုက ရင်းနှီးမြှုပ်နှံမှုထက် များနေသမျှ ကာလပတ်လုံး စီးပွားပျက်ကပ် သက်ဆိုးရှည်နေလိမ့်မယ်။ ဒါကြောင့် စုဆောင်းမှုနဲ့ ရင်းနှီးမြှုပ်နှံမှုပမာဏကို တတ်နိုင်သမျှ မကွာစေဖို့ အစိုးရက တာဝန်ယူဖြေရှင်းရမယ်လို့ ဆိုထားတယ်ဗျ။ ဒါပေမဲ့ အစိုးရရဲ့ ရင်းနှီးမြှုပ်နှံမှုဟာ လူထုဝင်ငွေနဲ့ ၀ယ်လိုအားကို တိုးပွားစေမယ့် လုပ်ငန်းမျိုး ဖြစ်ဖို့တော့ လိုအပ်တယ်လို့ ဆိုထား...
ထွဏ်းမောင် - သူက စီးပွားရေးကို အစိုးရက ၀င်ရောက်ထိန်းသိမ်းဖို့ လိုမယ်လို့ ဆိုထားသူဗျ။ သူ့အဆိုအရဆိုရင် စုဆောင်းမှုက ရင်းနှီးမြှုပ်နှံမှုထက် များနေသမျှ ကာလပတ်လုံး စီးပွားပျက်ကပ် သက်ဆိုးရှည်နေလိမ့်မယ်။ ဒါကြောင့် စုဆောင်းမှုနဲ့ ရင်းနှီးမြှုပ်နှံမှုပမာဏကို တတ်နိုင်သမျှ မကွာစေဖို့ အစိုးရက တာဝန်ယူဖြေရှင်းရမယ်လို့ ဆိုထားတယ်ဗျ။ ဒါပေမဲ့ အစိုးရရဲ့ ရင်းနှီးမြှုပ်နှံမှုဟာ လူထုဝင်ငွေနဲ့ ၀ယ်လိုအားကို တိုးပွားစေမယ့် လုပ်ငန်းမျိုး ဖြစ်ဖို့တော့ လိုအပ်တယ်လို့ ဆိုထားပြီး လိုအပ်တဲ့ အရင်းအနှီးကို အခွန် ဒါမှမဟုတ် လူထုဆီကို ဘွန်းတွေ ထုတ်ရောင်းပြီး လုပ်နိုင်တယ်လို့ ပြောထားတယ်။

လွဏ်းမောင် - ခင်ဗျား ပြောတဲ့ ကိန်းရဲ့ သီအိုရီက ဒုတိယကမ္ဘာစစ်ပြီးနောက်ပိုင်း အစိုးရတော်တော်များများ သုံးခဲ့တဲ့ စနစ် မဟုတ်လား။

ထွဏ်းမောင် - ဟုတ်တယ်။ သူ ပြောခဲ့တဲ့အဆိုအရဆိုရင်တော့ အစိုးရက ဈေးကွက်မှာ ၀င်ပါသင့်တယ်။ ဒါကြောင့် ဒေါ်ခင်နှင်းသစ်ရဲ့ အဲဒီဆိုကို လွှတ်တော်က လက်ခံတာ မှန်တယ်လို့ သုံးသပ်ရမှာပဲ။

လွဏ်းမောင် - ဒီနေရာမှာ တစ်ခုရှိတာက NLD အစိုးရက ဈေးကွက်စီးပွားရေးစနစ် သွားနေပြီလို့ ဆိုထားတဲ့အတွက် ကိန်းရဲ့ သီအိုရီကို ထည့်ပြောတာကတော့ တဆိတ် မလွန်ဘူးလားဗျ။ ခင်ဗျား ပြောလိုက်မှ ဒေါ်ခင်နှင်းသစ် တင်တဲ့အဆိုဟာ အစိုးရရဲ့ မူဝါဒဖြစ်တဲ့ ဈေးကွက်စီးပွားရေးစနစ် သွားနေပုံနဲ့ အံချော်နေတာကို လိုက်ကာပေးသလို ဖြစ်မနေပေဘူးလား။

ထွဏ်းမောင် - တစ်ခုတော့ ရှိတယ်ဗျ။ ဒေါ်ခင်နှင်းသစ်က လူထုက ကုန်ဈေးနှုန်းမြင့်တက်နေတာကို အစိုးရ သိအောင် ပြောလိုတာကြောင့်လည်း အဆိုတင်တာ ဖြစ်နိုင်သလို၊ သူကိုယ်တိုင်ကလည်း ဈေးကွက်စီးပွားရေးစနစ်ရဲ့ သဘောသဘာဝကို မတီးခေါက်မတာလည်း ဖြစ်နိုင်တယ်လေဗျာ။ ဒါပေသိ အစိုးရကတော့ လူထုဟာ ကုန်ဈေးနှုန်းမြင့်တက်မှုဒဏ်ကို ခံနေရပြီဆိုတာ အစိုးရ သိသွားတာပေါ့ဗျာ။ ဒီလိုပဲ ဖြေတွေးရမှာ မဟုတ်ဘူးလားဗျ။

လွဏ်းမောင် - ဖြေတွေးတာတော့ ဟုတ်ပါရဲ့။ ဒါပေမဲ့ ဒီအဆိုကို လွှတ်တော်ထဲ ဆွေးနွေးဖို့ ရောက်လာတဲ့အခါ ဒါဟာ ဖြေသင့်တဲ့ မေးခွန်းလား၊ မဖြေသင့်တဲ့ မေးခွန်းလားဆိုတာကို ပြည်ထောင်စုဝန်ကြီးကကော မသိဘူးလားဗျ။ ကျုပ် သဘောအရဆိုရင်တော့ နဂိုကတည်းက ဈေးကွက်စီးပွားရေးစနစ် သွားလို့ အစိုးရက ၀င်ပါလို့ မရပါဘူးဆိုတာကို ရှင်းရှင်းလင်းလင်း ပြောလိုက်ရင် ပြီးကောပေါ့ဗျာ။ အခုတော့ အဲဒီလို မဟုတ်ဘဲ ငွေကြေးဖောင်းပွမှုတွေ၊ ကုန်ဈေးနှုန်း တက်ရတဲ့ အကြောင်းတွေ၊ နှုန်းထားတွေ လာရှင်းပြတော့ ခက်မကုန်ပေဘူးလား။ ဟိုက မေးတာ ရှင်းရှင်းလေး။ ထိန်းချုပ်မယ့် အစီအစဉ် ရှိ၊ မရှိပဲလေ။

ထွဏ်းမောင် - အဲ…ဒီလူတော့ ခက်ပြီ။
လွှတ်တော်မှာ မေးဖို့ဆိုတာ အဆိုနဲ့ ဆက်စပ်တဲ့ မေးခွန်းကို ကြိုပို့ရတာဗျ။ ဒါကို ၀န်ကြီးဌာနကလည်း သိပြီးသား။ ဒါတောင် တကယ်တမ်း လွှတ်တော်ထဲလည်း ရောက်ရော ကွဲကော မဟုတ်ပေလား...
လွဏ်းမောင် - မခက်ဘူးဗျ။ သူက ရှင်းရှင်းလင်းလင်း မပြောတော့ လွှတ်တော်ဥက္ကဋ္ဌက ဒီကိစ္စက ကျယ်ပြန့်တယ်၊ ကျယ်ကျယ်ပြန့်ပြန့် ဖြေဖို့ ၀န်ကြီးဌာနက အဆင်သင့်ဖြစ်ရင် ကိုယ်စားလှယ်ထံ အဖြေလွှာပို့လို့ ရတယ်ဆိုပြီး ကြားဝင်ကကောလေ။ နောက်ပြီး လွှတ်တော်မှာ မေးဖို့ဆိုတာ အဆိုနဲ့ ဆက်စပ်တဲ့ မေးခွန်းကို ကြိုပို့ရတာဗျ။ ဒါကို ၀န်ကြီးဌာနကလည်း သိပြီးသား။ ဒါတောင် တကယ်တမ်း လွှတ်တော်ထဲလည်း ရောက်ရော ကွဲကော မဟုတ်ပေလား။

ထွဏ်းမောင် - ဟဟဟ ခင်ဗျားက ငြိမ်နေ၊ စိတ်ပျက်နေလို့ ကျုပ်က မေးမိပါတယ် ကိုလွဏ်းမောင်ရယ်။ ခင်ဗျား ထောက်ပြဆွေးနွေးတာ မှန်နေတော့လည်း ကျုပ်လည်း ဘာပြောရမှန်း မသိတော့ဘူးဗျ။

လွဏ်းမောင် - အေးလေ၊ အဲဒါ ပြောတာ။ မေးခွန်းကိုလည်း ကြိုသိထားတယ်ဗျာ။ ဖြေဖို့ အချိန်လည်း ရထားပြီးသားဗျာ။ နောက်ပြီး အစိုးရရဲ့ မူဝါဒကလည်း ထွက်ပြီးပြီဗျာ။ ဒါကိုတောင်မှ တကယ်တမ်း လာရှင်းတော့ မေးတဲ့ မေးခွန်းကိုလည်း ရိတ်ပတ်လည်အောင် မရှင်းနိုင်၊ မေးခွန်းနဲ့ အဖြေကလည်း တလွဲဆိုတော့ လွှတ်တော်ဥက္ကဋ္ဌသာ မကယ်ရင် သေဖွယ်ရာပဲ မဟုတ်လား။

အောက်ချင်းသစ္စာ သတင်းအေဂျင်စီ
Read more »

မြန်မာအထူးစီးပွားရေးဇုန်ဗဟိုအဖွဲ့ဝင်များ နှင့်တွေ့ဆုံနေသည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်
ရန်ကုန်၊ နိုဝင်ဘာ ၁၆

ရခိုင်ပြည်နယ်တွင်း ဖြစ်ပေါ်နေသည့် ဖြစ်စဉ်များနှင့် ပတ်သက်၍ အချိန်နှင့်တစ်ပြေးညီ သတင်းထုတ်ပြန်နိုင်ရေးအတွက် နိုင်ငံတော် အတိုင်ပင်ခံရုံး သတင်းထုတ်ပြန်ရေးကော်မတီကို နိုဝင်ဘာလ ၁၆ ရက်က ဖွဲ့စည်းလိုက်ကြောင်း အတိုင်ပင်ခံရုံးက သတင်းထုတ်ပြန်လိုက်သည်။

ယင်းကော်မတီကို နိုင်ငံတော်အတိုင်ပင်ခံရုံးဝန်ကြီးဌာန ဒုတိယ၀န်ကြီး ဦးခင်မောင်တင်က ဥက္ကဋ္ဌအဖြစ် တာဝန်ယူမည်ဖြစ်ကာ ဒုတိယဥက္ကဋ္ဌအဖြစ် ကာကွယ်ရေးဦးစီးချုပ်ရုံး (ကြည်း) မှ ဗိုလ်ချုပ်စိုးနိုင်ဦးက တာဝန်ယူ ဆောင်ရွက်မည် ဖြစ်သည်။

အဖွဲ့ဝင်များအဖြစ် ပြန်ကြားရေးဝန်ကြီးဌာန၊ သတင်းနှင့် စာနယ်ဇင်းလုပ်ငန်း ဦးဆောင်ညွှန်ကြားရေးမှူး ဦးကျော်စိုး၊ နိုင်ငံခြားရေးဝန်ကြီးဌာန ဒုတိယညွှန်ကြားရေးမှူးချုပ် ဒေါ်အေးအေးစိုး၊ ပြည်ထဲရေးဝန်ကြီးဌာန ရဲမှူးကြီး မျိုးသူရစိုး၊ နယ်စပ်ရေးရာဝန်ကြီှးဌာန ညွှန်ကြားရေးမှူး ဦးဇော်ဝင်းအောင်နှင့် အတွင်းရေးမှူးအဖြစ် နိုင်ငံတော်သမ္မတရုံး ဒုတိယညွှန်ကြားရေးမှူးချုပ် ဦးဇော်ဌေးတို့က ဆောင်ရွက်ကြမည် ဖြစ်သည်။

ရခိုင်ပြည်တွင်း ဖြစ်ပျက်နေသည့် ဖြစ်စဉ်များနှင့် ပတ်သက်၍ ပြန်ကြားရေးဝန်ကြီးဌာနပိုင် သတင်းစာများနှင့် ရုပ်သံလိုင်းများ၊ စစ်တပ်ပိုင် မြ၀တီသတင်းစာနှင့် မြ၀တီ ရုပ်သံလိုင်းတို့မှလည်း ဖော်ပြလျက် ရှိသည်။

အောက်ချင်းသစ္စာ သတင်းအေဂျင်စီ
Read more »

(ထွဏ်းမောင်၊ လွဏ်းမောင် ဆွေးနွေးခန်း)


ရန်ကုန်၊ အောက်တိုဘာ ၂၉

လွဏ်းမောင် - ဗျို့ ကိုထွဏ်းမောင်…။ ပြီးခဲ့တဲ့ တစ်ပတ် ဆွေးနွေးမှုလေး လုပ်ပြီးကတည်းက ပျောက်သွားလိုက်တာ ဘာတွေများ အလုပ်များနေသတုန်းဗျ။

ထွဏ်းမောင် - သြော်…များဆို တစ်ပူးလို့ ခေါ်တဲ့ အီလဲဗင်းနဲ့ ရန်ကုန်တိုင်းဝန်ကြီးချုပ် ဦးဖြိုးမင်းသိန်းတို့ ကိစ္စလေ။ အဲဒါလေးတွေ စောင့်ကြည့်နေတာနဲ့ပဲ အချိန်ကုန်ပြီး ပျောက်နေတယ်ပဲ ဆိုပါတော့ဗျာ။

လွဏ်းမောင် - ဟုတ်လားဗျ။ ဒါနဲ့ နောက်ဆုံး အက်ပ်ဒိတ်လေး ပြောပါဦးဗျ။

ထွဏ်းမောင် - အခုတော့ တိုင်းအစိုးရဘက်က ဆက်သွယ်ရေးဥပဒေ ပုဒ်မ ၆၆ (ဃ) နဲ့ အမှုဖွင့်ထားပြီး ဒီကနေ့ (နိုဝင်ဘာ ၁၀ ရက်) ညနေ လေးနာရီမှ ရဲစခန်းမလာရင် ဖမ်းမယ်ဆိုလို့ မီဒီယာသမားတွေလည်း တစ်ပူးရုံးရှေ့ ခြေချင်းလိမ်နေကြတာပါပဲဗျာ။ ခုထိတော့ မထူးသေးပါဘူးဗျ။

လွဏ်းမောင် - အင်း ခက်တော့ ခက်တယ်ပဲ ပြောရမယ်ဗျ။

ထွဏ်းမောင် - ဘာများ ခင်ဗျားက ခက်နေတာတုန်းဗျ။ သူတို့ဟာ သူတို့ ဖြစ်နေတဲ့ဟာ။ ခင်ဗျားနဲ့ဗျာ ဘာဆိုင်လို့တုန်း။

လွဏ်းမောင် - သြော် ကိုထွဏ်းမောင်ရယ်။ ဆိုင်ပါပကောလား။ ကျုပ်နေတာက ရန်ကုန်၊ ရန်ကုန်တိုင်း ၀န်ကြီးချုပ်က ဒီကိစ္စနဲ့ အလုပ်များနေရင် တခြားကိစ္စတွေ ဘယ်လှည့်နိုင်တော့မလဲဗျာ။ သိတဲ့အတိုင်းလေ။ ရန်ကုန်မြို့က မြို့ပျက်ကြီး ဖြစ်လာပြီလို့တောင် ပြောနေကြတာ မဟုတ်ပေဘူးလား။

ထွဏ်းမောင် - ဒါတော့ ဒါပေါ့ဗျာ။
ရန်ကုန်တိုင်းမှာ လုပ်စရာတွေက အပြည့်ရယ်။ မပြီးသေးတဲ့ လမ်းဘေးဈေးသည်နဲ့ စည်ပင်ကိစ္စ၊ တရိပ်ရိပ်တက်လာတဲ့ မှုခင်းတွေ၊ အများကြီးရယ်...
လွဏ်းမောင် - ဒါတော့ ဒါပါပဲလို့ ထားရမယ်ဆိုတာကိုတော့ လက်မခံချင်ဘူးဗျ။ အခုက ရန်ကုန်တိုင်းမှာ လုပ်စရာတွေက အပြည့်ရယ်။ မပြီးသေးတဲ့ လမ်းဘေးဈေးသည်နဲ့ စည်ပင်ကိစ္စ၊ တရိပ်ရိပ်တက်လာတဲ့ မှုခင်းတွေ၊ အများကြီးရယ်ဗျ။ ကျုပ် လူမှုကွန်ရက် ဖေ့ဘုတ်စာမျက်နှာမှာ လူတစ်ယောက်က ရေးထားတဲ့ ကိစ္စတွေဆို အများကြီးရယ်။

Photo : http://www.an-unexpected-journey.de
၁။ ကျုးကျော်ကိစ္စ

၂။ ယာဉ်ကြောပိတ်ဆို့မှုကိစ္စ

၃။ လမ်းဘေးဈေးသည်တွေကိစ္စ

၎။ လိုင်းကားသမားတွေမင်းမဲ့စရိုက်ဆန်စွာဖြစ်နေတဲ့ကိစ္စ

၅။ ကလေးသူငယ်တွေ မုဒိမ်းကျင့်ခံနေရတဲ့ကိစ္စ

၆။ မြကျွန်းသာစီမံကိန်းကိစ္စ

၇။ လွှတ်တော်အမတ် နေဘုန်းလတ် မေးထားတဲ့ မြေကွက် ၂၃၂ ကွက်ချပေးတဲ့ကိစ္စ

၈။ လွှတ်တော်အမတ်ဒေါ်စန္ဒာမင်း ပြောတဲ့ ရန်ကုန်မြို့ပျက်ကြီးဖြစ်နေပြီလို့ပြောတဲ့ကိစ္စ

၉။ လွှတ်တော်ကိုယ်စားလှယ် ဦးဝေဖြိုးဟန်တင်သွင်းခဲ့တဲ့ ရန်ကုန်တိုင်းအတွင်းက မူးယစ်ဆေးဝါး ပြဿနာ

၁၀။ လေးလောင်းပြိုင်ကိစ္စအပါအ၀င် လုယက်လူသတ်မှုတွေဖြစ်နေတဲ့ကိစ္စ

၁၁။ ၅ ဘီလီလျံပျောက်သွားတဲ့ တင်ဒါကိစ္စ

၁၂။ မြေသိမ်းယာသိမ်းကိစ္စ

၁၃။ ကုန်ဈေးနှုန်းကြီးမြှင့်နေတဲ့ကိစ္စ

၁၄။ အလုပ်သမားပြဿနာတွေ

၁၅။ အထပ်မြင့်အဆောက်အအုံကိစ္စ

၁၆။ လောင်းကစားလုပ်ငန်းတွေကိစ္စ

၁၇။ မူးယစ်ဆေးဝါးကိစ္စ

၁၈။ ကန်တော်ကြီးထဲမှာလုပ်မယ့် လူစီးလို့ရတဲ့ဓာတ်ငွေ့ပူပေါင်းကိစ္စ

၁၉။ လိုင်းကားတွေကိစ္စ

၂၀။ ဒေါ်စန္ဒာမင်းမေးထားတဲ့ အမှိုက်ပြဿနာ

၂၁။ လျှပ်စစ်မီးပြဿနာ

၂၂။ ဘာယူယူ ၅၀၀၀ ကျပ်ဆိုင်တွေက တရားမ၀င်တရုတ်တွေကိစ္စ

၂၃။ … ဆိုပြီး အစဉ်လိုက်ရေးထားတာဗျ။ နောက်ပြီး ဒါဟာ ပြည်သူတွေ လက်တွေ့ခံစားနေရတဲ့ အဓိကပြဿနာတွေဗျလို့ ရေးထားသဗျ။

ထွဏ်းမောင် - ဒီလိုဟာတွေ ရှိတာနဲ့ အခုလိုမျိုး မဖြစ်ရတော့ဘူးလို့ ခင်ဗျားက ဆိုလိုတာလားဗျ။

လွဏ်းမောင် - မဟုတ်ရပေါင်ဗျာ။ ပြောချင်တာက ကျုပ်တို့ ရန်ကုန်နေ ပြည်သူတွေမှာ နိစ္စဓူဝ ရင်ဆိုင်နေရတဲ့ ကားလမ်းပြဿနာ၊ မီးမမှန်တဲ့ ပြဿနာ၊ လုံခြုံရေးဆိုင်ရာ ပြဿနာတွေက တပုံတပင် ဖြစ်နေချိန် ၀န်ကြီးချုပ်ကို ပြည်သူတွေအတွက် အချိန်ပြည့် လုပ်ပေးစေချင်တာပါဗျာ။ ကျုပ်တစ်ဦးတည်း အမြင်က အခု အီလဲဗင်းနဲ့ဖြစ်တဲ့ကိစ္စကြောင့် ၀န်ကြီးချုပ်အပါအ၀င် တခြားသော ၀န်ကြီးတွေပါ သတင်းစာရှင်းလင်းပွဲတက်ရ၊ ဘာရနဲ့ ပြည်သူ့ဘက်ကို မလှည့်နိုင်ဘူးလေ။

ထွဏ်းမောင် - ဟ…ဒီလိုတော့ ဘယ်ဟုတ်မလဲဗျ။ သူက တိုင်းအစိုးရအဖွဲ့ရဲ့ အကြီးအကဲလေဗျာ။
တချို့နိုင်ငံတွေမှာဆိုရင် ဒီလိုကိစ္စမျိုးက ပုဂ္ဂိုလ်ရေးနဲ့သာ ဆိုင်တဲ့အတွက် အစိုးရက ၀င်ပါစရာ မလိုဘူးလေဗျာ။ ဒီလိုတော့ ခွဲခြားမြင်သင့်တာပေါ့...
လွဏ်းမောင် - အကြီးအကဲဆိုတာကိုလည်း လက်ခံပါတယ်။ ဒါပေမဲ့လည်း သေသေချာချာ ကြည့်မယ်ဆိုရင်တော့ အီလဲဗင်းရဲ့ ရေးသားချက်ကြောင့် ထိခိုက်မယ်ဆိုရင် ပုဂ္ဂိုလ်ရေး ထိခိုက်မှုလေဗျာ။ တိုင်းအစိုးရတစ်ဖွဲ့လုံး လုပ်နေတယ်လို့ဆိုရင်တော့ တစ်မျိုးပေါ့ဗျာ။ တချို့နိုင်ငံတွေမှာဆိုရင် ဒီလိုကိစ္စမျိုးက ပုဂ္ဂိုလ်ရေးနဲ့သာ ဆိုင်တဲ့အတွက် အစိုးရက ၀င်ပါစရာ မလိုဘူးလေဗျာ။ ဒီလိုတော့ ခွဲခြားမြင်သင့်တာပေါ့။ ဒါကြောင့် ပြောတာပါဗျာ။

လွဏ်းမောင် - အေးဗျာ။ ခင်ဗျားပြောသလိုဆိုရင်တော့ မှန်ပါတယ်။ ခက်တာက ဒါနဲ့ ပတ်သက်ပြီး တရားဝင် ဥပဒေပြဋ္ဌာန်းထားရင်တော့ ရနိုင်တယ်လေဗျာ။ အခုက ဒါမျိုးမှ မရှိတာ။

ထွဏ်းမောင် - အဲဒါ ပြောတာပေါ့ဗျာ။ တကယ်တမ်းက ရန်ကုန်မြို့နဲ့ ပတ်သက်ပြီး ရှင်းလင်းစရာတွေက တပုံတပင်။ ဒီကြားထဲက ၀န်ကြီးချုပ်ကပါ ပုဂ္ဂိုလ်ရေးအရ ထိခိုက်စေတဲ့ အရေးအသား ပါတာနဲ့ ပတ်သက်ပြီး တိုင်းအစိုးရကို ထိသလိုမျိုး တရားစွဲတာ ဘာညာ လုပ်လာတော့ ကျန်တဲ့ အစိုးရတာဝန်ရှိသူတွေပါ ဒီကိစ္စထဲ ၀င်ပါလာတော့ မြို့ပျက်ကြီးကို မျက်နှာလွှဲထားသလို ဖြစ်နေပေဘူးလားဗျာ။ ဒါကြောင့် မြို့ပျက်ထဲက ပြည်သူတွေဘက်ကို လှည့်ကြည့်ပါဦးလို့ပဲ ပြောဆိုလိုက်တာပါ။

အောက်ချင်းသစ္စာ သတင်းအေဂျင်စီ
Read more »

၄၅ ဆက်မြောက် အမေရိကန်သမ္မတအဖြစ် ရွေးချယ်ခံရသူ ဒေါ်နယ်ထရမ့်ပ်
Photo : Chicago Tribune

ရန်ကုန်၊ နိုဝင်ဘာ ၁၀

အမေရိကန် ပြည်ထောင်စု၏ ၄၅ ဆက်မြောက် သမ္မတအဖြစ် ရွေးချယ်ခံခဲ့ရသူ စီးပွားရေးလုပ်ငန်းရှင်နှင့် ရီပက်ဘလီကန် ကိုယ်စားလှယ် ဒေါ်နယ်ထရမ့်ပ်ထံ မြန်မာနိုင်ငံ သမ္မတ ဦးထင်ကျော်နှင့် နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်တို့က နိုဝင်ဘာလ ၁၀ ရက်တွင် ဂုဏ်ပြုဝမ်းမြောက်ကြောင်း သ၀ဏ်လွှာများ ပေးပို့ခဲ့သည်။

နိုဝင်ဘာလ ၉ ရက် နေ့စွဲတပ်ထားသည့် အဆိုပါ သ၀ဏ်လွှာများ၌ ဒေါ်နယ်ထရမ့်ပ်အနေဖြင့် ယခုကဲ့သို့ အမေရိကန်သမ္မတအဖြစ် ရွေးချယ်ခံရခြင်းကို ဂုဏ်ယူဝမ်းမြောက်ပါကြောင်းနှင့် နှစ်နိုင်ငံကြား ခိုင်မာသည့် ချစ်ကြည်ရေး၊ ပူးပေါင်းဆောင်ရွက်ရေးကိစ္စများအတွက် နီးကပ်စွာ လုပ်ဆောင်သွားရန် မျှော်လင့်ပါကြောင်း ရေးသားထားကြသည်။

အောက်ချင်းသစ္စာ သတင်းအေဂျင်စီ
Read more »

ကလေး၊ နိုဝင်ဘာ ၃

အစိုးရ၀န်ကြီးဌာနက စီမံကိန်းအလို့ငှာ သိမ်းယူထားသည့် စစ်ကိုင်းတိုင်း၊ ကလေးမြို့နယ်၊ ပင်လုံရပ်ကွက်ရှိ မြေ ၀ ဒသမ ၁၅၀ ဧကအား မူလပိုင်ရှင်ထံ ပြန်လည်ပေးအပ်ပွဲကို နိုဝင်ဘာလ ၃ ရက် နံနက်ပိုင်းက ပြုလုပ်ခဲ့သည်။

အဆိုပါမြေ၏ မူလပိုင်ရှင်မှာ ဦးပေါ်ဇယမ်းဆိုသူဖြစ်ပြီး လွန်ခဲ့သည့် နှစ် ၅၀ ကျော်ကတည်းက သိမ်းယူခဲ့ခြင်းဖြစ်ပြီး ယခုအခါသားဖြစ်သူမှ အထောက်အထား ခိုင်လုံစွာဖြင့် ပြန်လည်ရယူလိုကြောင်း တင်ပြခဲ့သည့်အပေါ် တိုင်းဒေသကြီး လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေးကော်မတီ၏ (၂/၂၀၁၆) အစည်းအဝေး ဆုံးဖြတ်ချက်အရ မူလပိုင်ရှင်ထံ ပေးအပ်ရန် ဆုံးဖြတ်ခဲ့ကြခြင်း ဖြစ်သည်။

သိမ်းဆည်းမြေ ပြန်လည်ပေးအပ်ပွဲကို သိမ်းဆည်းထားသည့် အဆိုပါမြေပေါ်တွင်ပင် ပြုလုပ်ခဲ့ခြင်းဖြစ်ပြီး မူလမြေပိုင်ရှင်၏ မိသားစုဝင်များ၊ တိုင်းဒေသကြီး လွှတ်တော်ကိုယ်စားလှယ် ဒေါ်သန့်ဝေကျော်၊ ခရိုင်အုပ်ချုပ်ရေးမှူး ဦးအောင်ဇော်မိုးနှင့် ဌာနဆိုင်ရာ ၀န်ထမ်းများ၊ စုစုပေါင်း ၄၀ ကျော် တက်ရောက်ခဲ့ကြသည်။

ယင်းနောက် ခရိုင်အုပ်ချုပ်ရေးမှူး ဦးအောင်ဇော်မိုးက မြေပိုင်ဆိုင်ခွင့်နှင့် သက်ဆိုင်သည့် စာရွက်စာတမ်းများအား မူလမြေပိုင်ရှင်သားဖြစ်သူ၏ ကိုယ်စားလှယ်လွှဲခြင်းခံထားရသူ ဦးကမ်လမ်းကျင့်ထံ ပေးအပ်ခဲ့သည်။

ယင်းမြေကို သိမ်းယူပြီးနောက် ဟိုတယ်နှင့် ခရီးသွားလုပ်ငန်းဝန်ကြီးဌာနက အသုံးပြုရန် ရယူထားပြီးနောက် အသုံးပြုရန် မရှိတော့သဖြင့် ပြန်လည်အပ်နှံခဲ့ရာ နိုင်ငံတော်က စီမံခန့်ခွဲပိုင်ခွင့်ရှိသောမြေအဖြစ် ပြည်ထဲရေးဝန်ကြီးဌာနမှ သတ်မှတ်ထားခဲ့သည်။ ယင်းနောက် မူလပိုင်ရှင်များမှ ပြန်လည်ရယူလိုကြောင်း လျှောက်ထားခဲ့ရာ တိုင်းဒေသကြီး လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေးကော်မတီက စစ်ဆေးမှုများ ပြုလုပ်ပြီးနောက် မူလပိုင်ရှင်များထံ ပြန်လည်ပေးအပ်ခိုင်းခဲ့ခြင်းလည်း ဖြစ်သည်။

သန့်ဇင်ဆွေ
Read more »

ကလေးမြို့နယ် ပြည်သူ့လွှတ်တော်ကိုယ်စားလှယ် ဒေါ်အေးအေးမူ (ခ) ဒေါ်ရှားမီးနှင့် တွေ့ဆုံမေးမြန်းခြင်း

ကလေး၊ နိုဝင်ဘာ ၂

စစ်ကိုင်းတိုင်း၊ ကလေးမြို့နယ်အတွင်းရှိ ကျေးရွာ အုပ်စုများအားလုံး မီးလင်းရေးမှာ မဟာာဓာတ်လိုင်းရောက်ရှိခဲ့သည့်တိုင် ၂၀၁၉-၂၀၂၀ ခုနှစ်ကျမှသာလျှင် မီးလင်းနိုင်မည်ဖြစ်ကြောင်း ကလေးမြို့နယ် ပြည်သူ့လွှတ်တော် ကိုယ်စားလှယ် ဒေါ်အေးအေးမူ (ခ) ဒေါ်ရှားမီးက နိုဝင်ဘာလ ၂ ရက်တွင် အောက်ချင်းသစ္စာ သတင်းအေဂျင်စီသို့ ပြောဆိုလိုက်သည်။

ယင်းသို့ ဖြစ်ရခြင်းမှာ ယခင်အစိုးရလက်ထက်က ချမှတ်ထားသည့် စီမံကိန်းလုပ်ငန်းစဉ်အရ လုပ်ဆောင်နေရသည့်အတွက် ဖြစ်ပြီး ကျေးရွာအလိုက် ကိုယ်ပိုင်ထရန်စဖော်မာ တပ်ဆင်ထားနိုင်မှသာလျှင် သတ်မှတ်ထားသည့်အချိန်ထက် မီးဆောလျင်စွာ ရရှိမည် ဖြစ်သည်။

သာယာဝတီ၊ နဂါးပွတ်၊ စီးစန်၊ ရေပြာခြောက်နှင့် ထိုမာကျေးရွာတို့ ပါဝင်သည့် ထိုမာကျေးရွာအုပ်စုတွင်းရှိ ဒေသခံပြည်သူ ၈၀ ကျော်နှင့် နိုဝင်ဘာလ ၂ ရက်က တွေ့ဆုံခဲ့စဉ် အောက်ချင်းသစ္စာ သတင်းအေဂျင်စီက သီးသန့်တွေ့ဆုံခွင့် ရခဲ့စဉ် ယင်းကဲ့သို့ ပြောကြားခဲ့ခြင်းလည်း ဖြစ်သည်။

ကလေးမြို့နယ် ပြည်သူ့လွှတ်တော် ကိုယ်စားလှယ် ဒေါ်အေးအေးမူ (ခ) ဒေါ်ရှားမီးနှင့် အောက်ချင်းသစ္စာ သတင်းအေဂျင်စီ သတင်းထောက် ကိုသန့်ဇင်ဆွေတို့ တွေ့ဆုံမေးမြန်းခဲ့သည်များကိုလည်း ဖော်ပြလိုက်ပါသည်။

----------------------------------------

မေး - ကျွန်တော်က အောက်ချင်းသစ္စာ သတင်းအေဂျင်စီကပါ။ လွှတ်တော်ကိုယ်စားလှယ်အနေနနဲ့ ကိုယ့်ကျေးရွာဒေသ ဖွံ့ဖြိုးရေးအတွက် ဘယ်လိုစီမံကိန်း၊ စီမံချက်တွေ ရှိပါသလဲဗျ။

ဖြေ - အခုလို ထိုမာရောက်တဲ့အခိုက်မှာ သတင်းမီဒီယာနဲ့ အမေးအဖြေ၊ အင်တာဗျူးလုပ်ခွင့်ရတဲ့အတွက်လည်း ကျွန်မ ကျေးဇူးတင်ပါတယ်။ ကျေးရွာဖွံ့ဖြိုးရေးအတွက်က ကျွန်မတို့က တစ်နိုင်ငံလုံးရဲ့ လိုအပ်ချက်ပေါ့နော်။ ကျေးရွာတိုင်း။ ဥပမာ မြန်မာနိုင်ငံ တိုးတက်တယ်၊ ဖွံ့ဖြိုးတယ်ဆိုလို့ရှိရင် ထိုမာတစ်ရွာ ကျန်ခဲ့ရင် ဒါ ဖွံ့ဖြိုးတယ်လို့ မခေါ်ဘူး။ ဒါကြောင့် တစ်နိုင်ငံလုံး ဖွံ့ဖြိုးရေးဟာ ကျေးရွာရဲ့ ဖွံ့ဖြိုးရေးပါပဲ။ အဲဒီစီမံကိန်းအတွက် အခုလက်ရှိ NLD အစိုးရတက်ခဲ့တဲ့နောက်ပိုင်းမှာ ဒီအောက်ခြေထိ ဖွံ့ဖြိုးတိုးတက်မှုဟာ ထင်သာမြင်သာရှိလောက်အောင်တော့ မစွမ်းဆောင်နိုင်သေးဘူး။ အခုမှပဲ ကျွန်မတို့ ဥပဒေပြုတာတို့၊ ကျွန်မတို့ လွှတ်တော်ကိုယ်စားလှယ်ရဲ့ အဓိကလုပ်ငန်းဖြစ်တဲ့ ပြည်သူလူထုအတွက် လုံခြုံမှုပေးတဲ့ ဥပဒေ၊ နောက်ပြီး နိုင်ငံတကာ ရင်းနှီးမြှုပ်နှံမှုဥပဒေတို့၊ ပြီးတော့ နိုင်ငံတော်ကို ဖျက်ဆီးနှောင့်ယှက်လိုသူများ ဘေးအန္တရာယ်မှ ကာကွယ်သော ဥပဒေတွေ ဖျက်သိမ်းတာမျိုးပေါ့။ ပြည်သူကို ချောက်ချားစေတဲ့ဥပဒေမျိုး။ ဒီဥပဒေကို အတည်အကျ ပြုနိုင်မှပဲ ဒီအောက်ခြေ အခြေခံလူမှုဖွံ့ဖြိုးရေးကို ဆက်ပြီးတော့ ဆောင်ရွက်သွားမယ်။

မေး - ဒါဆို အထက်မှာတော့ ဥပဒေတွေ ချမှတ်လုပ်ကိုင်နေပြီ။ ဒါပေမဲ့ အောက်ခြေထိ မရောက်သေးဘူးဆိုတဲ့ သဘောပေါ့။ အောက်ခြေကိုကော ဘယ်တော့လောက် ရောက်မယ်လို့ ခန့်မှန်ထားသလဲ။

ဖြေ - အခု ပထမနဲ့ ဒုတိယ လွှတ်တော်သက်တမ်းမှာ ကျွန်မတုိ့ ဥပဒေပြုတာတို့၊ ပြင်ဆင်တာတို့၊ အသစ်ရေးဆွဲတာတို့ လုပ်ခဲ့တယ်။ ဒါပေမဲ့ အဲဒါ နည်းဥပဒေတွေ ပြန်ပြီးတော့ ရေးရမယ်။ အဲဒါတွေ ရေးပြီးမှ ပြည်သူလူထုထဲကို စိမ့်ဝင်လာမှာပေါ့။

မေး - စစ်ကိုင်းတိုင်းက လူနည်းစုဖြစ်တဲ့ ချင်းလူမျိုးတွေအတွက်ကော ဘာတွေ ဆောင်ရွက်ထားတာ ရှိသလဲ။
တိုင်းရင်းသားလူမျိုးပေါင်းစုံအတွက် ကျွန်မတို့ ရပ်တည်တာဖြစ်တဲ့အတွက် ဗမာတိုင်းရင်းသား ဖွံ့ဖြိုးတိုးတက်ရင် ချင်းလူမျိုးလည်း ဖွံ့ဖြိုးတိုးတက်မယ်။ အားလုံး ညီတူညီမျှ ဖွံ့ဖြိုးမယ့်လမ်းစဉ်ကို ကျွန်မတို့ သွားတာ...
ဖြေ - ချင်းလူမျိုးအတွက်ရယ်လို့ သပ်သပ် ကိုယ်စားလှယ်ဖြစ်တာ မဟုတ်ပါဘူး။ ကျွန်မတို့ NLD ရဲ့ မူဝါဒကလည်း ချင်းလူမျိုးတစ်ခုတည်းကို ဦးတည်တာ မဟုတ်ဘူး။ လူမျိုးပေါင်းစုံရဲ့ ပါတီ။ အဲဒီတော့ တိုင်းရင်းသားလူမျိုးပေါင်းစုံအတွက် ကျွန်မတို့ ရပ်တည်တာဖြစ်တဲ့အတွက် ဗမာတိုင်းရင်းသား ဖွံ့ဖြိုးတိုးတက်ရင် ချင်းလူမျိုးလည်း ဖွံ့ဖြိုးတိုးတက်မယ်။ အားလုံး ညီတူညီမျှ ဖွံ့ဖြိုးမယ့်လမ်းစဉ်ကို ကျွန်မတို့ သွားတာပါ။

မေး - စစ်ကိုင်းတိုင်းမှာက သစ်ခိုးထုတ်မှုနဲ့ ပတ်သက်လို့ မကြာခဏဆိုသလို ဖြစ်နေတာတွေ ကြားနေရပါတယ်။ ဒါနဲ့ ပတ်သက်ပြီးကော။

ဖြေ - အဲဒါ လွှတ်တော်ထဲမှာလည်း တော်တော်လေး ဆွေးနွေးခဲ့ကြပါတယ်။ ဒီ သစ်နဲ့ ပတ်သက်တာတို့၊ သယံဇာတနဲ့ ပတ်သက်တာတို့က ကျွန်မတို့နိုင်ငံမှာ သယံဇာတနဲ့ သဘာဝပတ်ဝန်းကျင် ပေါကြွယ်ဝပေမယ့်လို့ ကျွန်မတုိ့ ပြည်သူမှာ ဘာမှ ခံစားခွင့်မရှိခဲ့ဘူး။ ဒါတွေအတွက် ကျွန်မတို့ ဥပဒေအခိုင်အမာ ပြဋ္ဌာန်းဖို့ လိုတယ်။ လိုတဲ့အခါကျတော့ ကျွန်မ သယံဇာတနဲ့ သဘာဝပတ်ဝန်းကျင်ကော်မတီ တစ်ယောက်ပါ။ ပြည်သူလွှတ်တော်က ဖွဲ့စည်းတဲ့ ၁၅ ဦးထဲမှာ ပါပါတယ်။ အခု အဲဒီဥပဒေတွေက မခိုင်မာခဲ့လို့၊ လတ်တလော လက်တစ်လုံးကြား သုံးနေရတဲ့ဥပဒေတွေက များနေလို့ အခု ကျွန်မတို့ ပြင်ဆင်ချက် ရေးဆွဲပြီးပြီ။ ၀န်ကြီးဌာနနဲ့ ပေါင်းပြီးတော့ ကျွန်မတို့ ကော်မတီမှာ၊ ဥပမာ အရင်က ဥပဒေ၊ ၁၉၉၅ ခုနှစ်က ဥပဒေတို့ ၁၉၇၅ က ရေးဆွဲခဲ့တဲ့ ဥပဒေတို့၊ အဲဒါတွေကို ပြန်ပြီးတော့ ပြင်ဆင်ရေးဆွဲပြီးပြီ။ ဥပဒေကြမ်းကို ဒီလွှတ်တော် ပြန်စတာနဲ့ ကျွန်မတို့ ကော်မတီကနေပြီးတော့ ပြည်ထောင်စုလွှတ်တော်ကို တင်မယ်။ တင်ပြီးမှ၊ အတည်ပြုပြီးမှပဲ ဒီသစ်တောတွေ ထိန်းသိမ်းတာတို့၊ သယံဇာတ ထိန်းသိမ်းတာတို့၊ အဲဒါကို အဓိကကျကျ လုပ်သွားမှာ ဖြစ်ပါတယ်။
ဥပဒေတွေက မခိုင်မာခဲ့လို့၊ လတ်တလော လက်တစ်လုံးကြား သုံးနေရတဲ့ဥပဒေတွေက များနေလို့ အခု ကျွန်မတို့ ပြင်ဆင်ချက် ရေးဆွဲပြီးပြီ...
မေး - ကိုယ်စားလှယ်တစ်ယောက်အနေနဲ့ အခုသက်တမ်းကာလအတွင်း လွှတ်တော်ထဲမှာကော အဆိုတင်သွင်းခဲ့တာတွေနဲ့ နောက်ထပ်တင်သွင်းမယ့်ဟာတွေလည်း သိချင်ပါတယ်ခင်ဗျ။

ဖြေ - ကျွန်မတို့ ဒီအစိုးရသစ် တက်လာပြီးတော့ ဖေဖော်ဝါရီလ ၁ ရက်နေ့ကစပြီးတော့ လွှတ်တော်ဟောင်းက ဆင်းသွားပြီးတော့ လွှတ်တော်သစ် စတယ်။ ဒါပေမဲ့ ကျွန်မတို့ မေးခွန်း မေးခွင့်ရှိတာက မေလ ၂ ရက်နေ့ကမှစပြီးတော့ မေးခွန်းတွေ ဖွင့်ပေးတယ်။ ဒါပေမဲ့ ကျွန်မ မေးခွန်းတင်ထားတာ ဖေဖော်ဝါရီလကတည်းက တင်ထားတယ်။ ဒါပေမဲ့ လွှတ်တော် စတက်တက်ချင်း ကျွန်မ မေးခွန်းတစ်ခါတည်း ယူသွားတယ်။ ငါးခု။ အဲဒီငါးခုထဲက လေးခု ကျွန်မ မေးခွင့်ရခဲ့တယ်ပေါ့။ မေလ ၂ ရက်နေ့မှ မေးခွန်းစဖွင့်ပြီးတော့ မေလ ၁၀ ရက်နေ့မှာ ကျွန်မ မေးခွင့်ရှိခဲ့တယ်။

ပထမဆုံးမေးတာ တစ်နိုင်ငံလုံး၊ တစ်ကမ္ဘာလုံးသိတဲ့ သဘာဝဘေးအန္တရာယ်ကြောင့် ပျက်စီးသွားတဲ့ မြောင်းတွေ၊ ချောင်းတွေ၊ ရေကာတာတွေပေါ့နော်။ အဲဒါကို တိုင်းဒေသကြီးအစိုးရကလည်း ပံ့ပိုးတယ်၊ ဖော်ဆောင်ပေးတယ်။ ဒါပေမဲ့ ဒီတိုင်းဒေသကြီးဘက်ဂျက်နဲ့က ကျွန်မတို့ ပျက်စီးသွားတဲ့အရေအတွက်နဲ့ လုံးဝ မကာမိဘူး။ မကာမိတော့ ကျွန်မ ပြည်ထောင်စုလွှတ်တော်ကနေပြီးတော့ ရေကာတာ အခိုင်အမာဆောက်ပေးဖို့၊ ချောင်းတွေ မြောင်းတွေ၊ လယ်မြေဧကပေါင်းများစွာကို အကျိုးပြုနေတဲ့ မြောင်း၊ ချောင်း၊ ဆည်ပေါ့နော်။ အခိုင်အမာ တည်ဆောက်ပေးဖို့ ရှိ၊ မရှိဆိုပြီး ပထမဆုံး မေးခွန်းအနေနဲ့ ကျွန်မ မေးခဲ့တယ်။ အဲဒီမှာ ၀န်ကြီးဌာနကလည်း ဖြေပေးပါတယ်။ အလှူရလို့ရှိရင်တော့ ၂၀၁၇-၂၀၁၈ ဘက်ဂျက်ကို မစောင့်ဘဲနဲ့ စောင့်ပေးမယ်။ ဥပမာ မြောက်စည်းလိုမျိုး ကမ်းပါးပြိုတဲ့ဟာတွေကို အခိုင်အမာစောင့်ပေးဖို့ ဘယ်လောက်ကုန်ကျမယ်၊ အကုန်လုံး တွက်ပေးတယ်။ ဆောက်လုပ်ရေးဝန်ကြီးဌာနကလည်း ကျွန်မ မေးခွန်းအပေါ်မှာ ၀န်ကြီးဌာန နှစ်ဌာနကနေ ကျွန်မကို ဖြေပေးပါတယ်။

ပြီးတော့ ဒုတိယမေးခွန်းအနေနဲ့ ဟိုးလေးတကြော်ကြော်ဖြစ်နေတဲ့ မဏိပူရ်ဆည်။ မဏိပူရ်ဆည်က ကျွန်မတို့ ပြည်သူလူထုကြားမှာ ဒီလောက် ထုထည်ကြီးမားတဲ့ ဆည်ကို ဆောက်တော့မယ်ဆိုလို့ရှိရင် ကျွန်မတို့ ပြည်သူတွေ မသိဘဲနဲ့ မဆောက်ပါဖို့။ အမှန်ကတော့ သူတို့ ဆက်ဆောက်ဖို့ လုပ်နေပြီ။ ၀န်ကြီးတွေကလည်း ခဏခဏ သွားတယ်။ ကျွန်မတို့ ဧည့်စာရင်းမှတ်တမ်းအရ သိရတာပေါ့နော်။ မဏိပူရ်ဆည်ကို ကျွန်မ လေးခေါက်ရောက်တယ်။ ပြီးတော့ ဆည်မြောင်းဌာနတွေနဲ့လည်း သွားတယ်။ သွားတဲ့အခါကျတော့ မှတ်တမ်းအရ သိရတာ သူတို့ ဆက်ဆောက်ဖို့ လုပ်နေတယ်ဆိုတာကို ကျွန်မတို့ သိရတဲ့အခါမှာ ကျွန်မတို့ ကိုယ်စားလှယ်ရဲ့ အဓိကလုပ်ငန်းက အစိုးရ ဘာလုပ်နေသလဲ၊ ဒါ ဆက်လုပ်ဖို့ ရှိသလား၊ ဆက်လုပ်မယ်ဆိုလို့ရှိရင် ကျွန်မရဲ့ မဲဆန္ဒနယ်လူထုက စိုးရိမ်နေပါတယ်။ ထုထည်ပမာဏကြီးမားတဲ့အတွက် ဒါကို ဆက်ဆောက်မယ်ဆိုရင် ပြည်သူလူထုကို ပွင့်လင်းမြင်သာစွာ ချပြပြီးတော့မှ ကျွန်မတို့ရဲ့ စိုးရိမ်နေတဲ့ပြည်သူတွေ မသိဘဲနဲ့ မလုပ်ဖို့၊ ပြီးတော့ နိုင်ငံတကာရဲ့အကူအညီယူမလား၊ နိုင်ငံတကာက ပညာရှင်တွေ ခေါ်မလားဆိုတာကို ကျွန်မ မေးရတာ ဖြစ်ပါတယ်။

နံပါတ်သုံး မေးခွန်းကျတော့ စီမံကိန်းတွေ ရေးဆွဲတဲ့အခါမှာ စားပွဲပေါ်မှာပဲ ရေးဆွဲတာ မဟုတ်ဘဲနဲ့ ဒီမိုကရေစီနည်းကျ ပြည်သူလူထုတွေ ပါဝင်ဖို့ အခြေအနေတစ်ရပ်ကို မြှင့်တင်ပေးဖုိ့။ ပြည်သူတွေ များများပါဝင်လာနိုင်အောင်၊ ပြည်သူတွေရဲ့ ပါဝင်ခွင့်ကို တိုးမြှင့်ပေးဖို့။ လိုတဲ့နေရာတို့ ပိုတဲ့နေရာတို့ မရှိအောင်၊ ပြည်သူ့ငွေတွေ အလဟဿမဖြစ်အောင်လို့ ပြည်သူတွေကို တစ်ကြိမ်မက မေးပေးပါ။ ဥပမာ ပိုတဲ့နေရာ။ တိုက်နယ်ဆေးရုံနှစ်ရုံကို အနီးကပ်ဆောက်လိုက်တာတို့ပေါ့နော်။ ပြည်သူ့ငွေတွေ အလကား၊ အလဟဿမဖြစ်အောင်လို့ ဆောင်ရွက်ပေးဖို့ ရှိ၊ မရှိပေါ့။ အဲဒီမှာ ဖြေပါတယ် စီမံကိန်းဝန်ကြီးဌာနက။ ပြည်သူတွေ အောက်ခြေကနေ ပါဝင်လာအောင် တိုးမြှင့်ပေးဖို့ အစီအစဉ် ရှိပါတယ်တဲ့ဆိုပြီး ဖြေသွားတယ်။

နံပါတ်လေး မေးခွန်းက လက်ပံချောင်း တိုက်နယ်ဆေးရုံပေါ့နော်။ တိုက်နယ်ဆေးရုံ သုံးရုံပေးပါတယ်၊ ကျွန်မတို့ ကလေးမြို့နယ်ကို။ အစိုးရကလည်း ကျွန်မတို့မြို့နယ်ကို ဂရုစိုက်ပါတယ်။ ဒါပေမဲ့လို့ အနောက်မြောက်ဒေသမှာ၊ လူဦးရေထူထပ်တဲ့ဒေသမှာ တိုက်နယ်ဆေးရုံတစ်ရုံ ပေးသင့်ပါတယ်ဆိုပြီးတော့ မေးတယ်။ စုံစမ်းစစ်ဆေးရေးလည်း သွားပြီးပြီ။ သေချာပါတယ်။ မေးခွန်းလေးခု။ ကလေးတက္ကသိုလ်အတွက် မေးခွန်းကျန်သေးတယ်၊ နောက်ထပ် မြေဂရန်ကိစ္စတွေကော။

မေး - နောက်ထပ်က မြို့ရွာ၊ ကျေးလက်မီးလင်းရေးနဲ့ ပတ်သက်ပြီး မေးချင်တာပါ။ ဒီစီမံကိန်းက အရင်အစိုးရလက်ထက်ကတော့ ပထမတစ်ကြိမ်မှာတော့ သုံးချောင်းထောက်စီမံကိန်းဆိုပြီး ရှိတယ်။ ဒီသုံးချောင်းထောက်စီမံကိန်းက ပြုတ်သွားတဲ့အခါကျတော့ အရပ်သားတစ်ပိုင်း၊ အစိုးရတစ်ပိုင်း ကိုယ်ထူကိုယ်ထ မီးလင်းရေးစနစ်တွေ ရှိခဲ့တယ်လို့ သိရပါတယ်။ အခု ကြားနေရတာက ပိတ်သွားပြီလို့ သိရပါတယ်။ အဲဒါနဲ့ ပတ်သက်ပြီးတော့ပေါ့။
မဟာဓာတ်အားလိုင်း ရောက်တာနဲ့ ကိုယ့်ရွာ မီးအမြန်လင်းချင်လို့ရှိရင် အလှူကောက်ပြီးတော့မှ ထရန်စဖော်မာတပ်ပြီးတော့ မီးကြိုးကျတော့ ကိုယ့်ငွေနဲ့ ကိုယ် တပ်ရမယ်။ သူတို့ စီစဉ်တဲ့အတိုင်း စောင့်မယ်ဆိုရင်တော့ ၂၀၁၉-၂၀၂၀ လောက်မှပဲ တစ်မြို့နယ်လုံး လင်းမယ်...
ဖြေ - မီးလင်းရေးကတော့ ကျွန်မတို့က လွှတ်တော်ကနေ ပြန်လာတာနဲ့ နယ်တွေကို မသွားခင် ကျွန်မတို့က ဌာနဆိုင်ရာတွေကို သွားပါတယ်။ သွားတဲ့အခါကျတော့ လျှပ်စစ်ရုံးလည်း ရောက်ခဲ့တယ်။ ကလေးမြို့နယ် လျှပ်စစ်ရုံးပေါ့နော်။ ဌာနဆိုင်ရာကို စုံအောင်သွားပြီးမှပဲ ကျွန်မတို့ ပြည်သူတွေကို ရှင်းပြနိုင်မှာမို့လို့ သွားတဲ့အခါကျတော့ မီးလင်းရေးကိစ္စကတော့ ဒီ ၂၄ နာရီ မဟာဓာတ်အားလိုင်း ဒီကလေးမြို့ကနေ အခု ရနေပြီ။ တချို့ရွာတော်တော်များများ၊ ရပ်ကွက်တွေလည်း မီးလင်းနေပြီ။ ဒါပေမဲ့ သူတို့ရဲ့ စီမံချက်က တချို့ရွာတွေက မလင်းသေးတဲ့အခါကျတော့ မေးတယ်။ မေးတော့ သူတို့ရဲ့ စီမံချက်စာအုပ်ကိုလည်း ကျွန်မတို့ကို ပေးထားပါတယ်။ အဲဒီ မဟာဓာတ်အားလိုင်း ရောက်တာနဲ့ ကိုယ့်ရွာ မီးအမြန်လင်းချင်လို့ရှိရင် အလှူကောက်ပြီးတော့မှ ထရန်စဖော်မာတပ်ပြီးတော့ မီးကြိုးကျတော့ ကိုယ့်ငွေနဲ့ ကိုယ် တပ်ရမယ်။ သူတို့ စီစဉ်တဲ့အတိုင်း စောင့်မယ်ဆိုရင်တော့ ၂၀၁၉-၂၀၂၀ လောက်မှပဲ တစ်မြို့နယ်လုံး လင်းမယ်။ ရာဇဂြိုဟ်ရဲ့ ဓာတ်အားလိုင်းကောပေါ့နော်။

မေး - အခုလောလောဆယ် လမ်းစဉ်ကကော အရင်အစိုးရလက်ထက်ကလား၊ NLD အစိုးရလက်ထက်မှာ ချမှတ်တဲ့ဟာလား။

ဖြေ - အရင်အစိုးရက လုပ်သွားတဲ့ဟာကို လိုက်လုပ်နေတာပါ။ ဖွံ့ဖြိုးရေးငွေကလည်း အရင်အစိုးရက ဘက်ဂျက်က အတည်ပြု ရေးဆွဲထားတဲ့ဟာကို ကျွန်မတို့က ဆက်လုပ်နေရတာ။ အခု အစိုးရသစ်က ဘက်ဂျက်လုံးဝ မရေးရသေးဘူး။ ၂၀၁၇ မှ ရေးရမှာ။ အရင်လမ်းစဉ်ဆိုတာက ဘက်ဂျက်ဆိုတာ တစ်နှစ်စာ ရေးဆွဲရတာကိုး။ ၂၀၁၆-၁၇ အတွက် အခုလက်ရှိဘက်ဂျက်ဟာ အစိုးရဟောင်းက မရေးဆွဲလို့ မရဘူးလေ။ သူတို့အစိုးရလက်ထက်မှာ စီမံကိန်းက ရေးဆွဲရတာကိုး။ ၂၀၁၇ ဧပြီလ ၁ ရက်နေ့ကျရင် သူတို့ရဲ့ ဘက်ဂျက်နှစ်က ကုန်မှာ။ ဒါကတော့ လမ်းစဉ်အရလည်း မဟုတ်ဘူး၊ ဒီအစိုးရရဲ့ လုပ်ငန်းစဉ်အနေနဲ့ သူတို့က လုပ်ရတာ။ အဲဒါဆိုတော့ ကျွန်မတို့က ၂၀၁၇ ကျမှပဲ အခု ဘက်ဂျက်တွေ တင်နေပြီ။
ဌာနရဲ့ စီမံချက်ကို စောင့်မယ်ဆိုရင်တော့ နှစ်နှစ်၊ သုံးနှစ် ကြာနိုင်တယ်ပေါ့နော်။ တစ်မြို့နယ်လုံးပေါ့...
မေး - ကျွန်တော်တို့ ကြားထားတာက မြို့တွင်းမှာတောင် ထရန်စဖော်မာတွေ မလောက်ဘူးဆိုတော့ ကျေးလက်တွေမှာကျတော့ ဖြစ်နိုင်ခြေ ရှိ၊ မရှိလေး သိချင်ပါတယ်။

ဖြေ - ဖြစ်နိုင်ခြေ ရှိပါတယ်။ ဒါက သူတုိ့ရဲ့ စီမံချက်က ဒီနှစ်ထဲမှာ ဘယ်ရွာ၊ ဘယ်ရွာဆိုတာ ရှိပြီးသားပါ၊ သူတို့ စာအုပ်ထဲမှာ။ အမြန်လိုချင်ရင်တော့ ကိုယ့်ဟာနဲ့ ကိုယ် အလှူကောက်ပြီးတော့ ကိုယ့်ရွာထဲမှာ ထရန်စဖော်မာ တပ်လိုက်တာပေါ့။ မဟာဓာတ်အားလိုင်း ရောက်လာတာနဲ့ ကိုယ့်ဟာနဲ့ ကိုယ် အမြန်လိုချင်ရင်တော့ အမြန်ဝယ်။ ဌာနရဲ့ စီမံချက်ကို စောင့်မယ်ဆိုရင်တော့ နှစ်နှစ်၊ သုံးနှစ် ကြာနိုင်တယ်ပေါ့နော်။ တစ်မြို့နယ်လုံးပေါ့။

မေး - အခုလောလောဆယ်မှာ ကိုယ်ထူကိုယ်ထ မီးလင်းရေးလုပ်မယ်ဆိုရင် ကိုယ့်ငွေစိုက်ပြီးမှ လုပ်ရမယ့် အခြေအနေပေါ့။

ဖြေ - ဟုတ်တယ် ဟုတ်တယ်။ အဲဒါက မဟာဓာတ်အားလိုင်း ရောက်လာမှပဲပေါ့။

မေး - အခုလိုမျိုး ဖြေကြားပေးတဲ့အတွက် ကျေးဇူးတင်ပါတယ် ခင်ဗျာ။

သန့်ဇင်ဆွေ
Read more »

ကြံ့ခိုင်ရေးပါတီဥက္ကဋ္ဌ ဦးသန်းဌေး (Photo : U Than Htay's Facebook)
ရန်ကုန်၊ နိုဝင်ဘာ ၁

၂၀၁၅ ရွေးကောက်ပွဲတွင် မဲဆန္ဒနယ်အချို့တွင်သာ နေရာရရှိခဲ့သည့် ကြံ့ခိုင်ရေးပါတီမှာ လာမည့် ကြားဖြတ်ရွေးကောက်ပွဲအတွက် အဆင်သင့်ဖြစ်ပြီဖြစ်ကြောင်း ပါတီဥက္ကဋ္ဌ ဦးသန်းဌေးက ၎င်း၏ လူမှုကွန်ရက်ပေါ်တွင် အောက်တိုဘာလ ၂၄ ရက်က ရေးသားထားသည်။

စစ်ဗိုလ်ချုပ် အငြိမ်းစားများ အဓိက ဦးဆောင်နေသည့် ကြံ့ခိုင်ရေးပါတီမှာ ပြည်သူ့ပါတီအဖြစ် ခံယူထားကြောင်းကိုလည်း အောက်တိုဘာလ ၃၁ ရက်က ယခုကဲ့သို့ ရေးသားထားပြန်သေးသည်။

“ပြည်သူ့ပါတီခံ အဖြစ် ခံယူထားတာကြောင့် အမျိုးဘာသာ၊ သာသနာနှင့် တိုင်းပြည်လုံခြုံရေး စီးပွားရေး၊ တရား ဥပဒေစိုးမိုးရေး ကဏ္ဍများနှင့် ပြည်သူများအား ထိပါးလာပြီဆိုပါက ပြည်သူလူထု ရှေ့ဆုံးတွင် ရပ်တည်ပြီး ကာကွယ်သွားမည်"

၂၀၁၅ ရွေးကောက်ပွဲတွင် ပါတီအလိုက် ဒုတိယနေရာအများဆုံး ရထားသည့် ကြံ့ခိုင်ရေးပါတီအနေဖြင့် ၎င်းတို့ပါတီအား အတိုက်အခံအနေဖြင့် ခံယူထားမှုကိုလည်း ပါတီဥက္ကဋ္ဌ ဦးသန်းဌေးက အောက်တိုဘာလ ၁၇ ရက်က ပဲခူးတိုင်း၊ ပဲနွယ်ကုန်းမြို့နယ်ရှိ ပါတီဝင်များ၊ ရပ်မိရပ်ဖများနှင့် တွေ့ဆုံစဉ် ယခုကဲ့သို့ ပြောဆိုထားသေးသည်။

"လက်ညှိုးထိုးပြောမယ်၊ အဲ့ဒီ တိုင်းပြည် တစ်စိတ်စီ တစ်စစီ ဖြစ်သွားမလား။ ကျွန်တော်တို့ပြောမယ်၊ ခင်ဗျားတို့ရဲ့ နေ့စဉ်လူမှုဘဝတွေ ခြိမ်းခြောက်ခံ နေရပြီလား။ ကျွန်တော်တို့ပြောမယ်၊ ခင်ဗျားတို့ ထမင်းငတ်တော့မလား၊ အစိုးရဘာလုပ်နေလဲ။ ကျွန်တော်တို့ လက်ညှိုးထိုးပြီးတော့ မေးပြီ"

ထို့ပြင် အောက်တိုဘာလ ၂၁ ရက်ကလည်း ၎င်း၏ လူမှုကွန်ရက် ဖေ့ဘုတ်စာမျက်နှာတွင် “လက်ရှိအချိန်မှာ ကိုယ်တွေက အတိုက်အခံပါတီဆိုပေမယ့် ယခင်အစိုးရလက်ထက်က အတိုက်အခံလို အစိုးရလုပ်သမျှ လက်ညှိုးထိုး ကန့်လန့်တိုက်နေမှာတော့ မဟုတ်ဘူး” ဟုလည်း ရေးသားထားပြန်သည်။
တိုင်းပြည်အတွက်လုပ်တာ၊ ဘာသာသာသနာအတွက်လုပ်တာ ရဲရဲလုပ်။ နိုင်ငံရေးအရ ပါတီကို သစ္စာမဖောက်ရင်ပြီးရော ကိုယ့်ညီတို့...
ကြားဖြတ်ရွေးကောက်ပွဲဝင်မည့် ကြံ့ခိုင်ရေးပါတီအနေဖြင့် လူငယ်များအပေါ် အလေးထားကြောင်းကိုလည်း “မျိုးဆက်သစ်လူငယ်တွေကို ပါတီရဲ့ အနာဂတ်အတွက် အားကိုးတယ်...။ နိုင်ငံရေးအရ ပါတီကို သစ္စာမဖောက်စေချင်ဘူး။ တိုင်းပြည်ရဲ့အနာဂတ်အတွက် အမျိုးသားရေးကို အလေးထားကြပါ” လို့ အောက်တိုဘာလ ၂ ရက်က တိုက်တွန်းထားသလို စက်တင်ဘာလ ၃၀ ကလည်း “ကျွန်တော်တို့ပါတီက အမျိုးသားရေးလုပ်တယ်။ နိုင်ငံရေးဆိုလည်း အမျိုးသားနိုင်ငံရေးပဲ အဓိကထား လုပ်ကြတာပဲ။ ရဲရဲဝံ့ဝံ့ လုပ်ကြရမယ်။ ပုဂံမှာ ကျွန်တော်တို့ ကလေးတွေဆိုလည်း ကြည့်… ပရဟိတလုပ်ငန်းတွေ လုပ်ကြတယ်။ ကောင်းတာလုပ်တာပဲ ဘာကိုမှ စောင့်နေစရာမလိုဘူး။ ကျွန်တော် ရောက်သွားတယ် ဘုရားပြင်ဖို့တောင် ခိုင်းထားခဲ့တယ်။ တိုင်းပြည်အတွက်လုပ်တာ၊ ဘာသာသာသနာအတွက်လုပ်တာ ရဲရဲလုပ်။ နိုင်ငံရေးအရ ပါတီကို သစ္စာမဖောက်ရင်ပြီးရော ကိုယ့်ညီတို့။ လွတ်လပ်စွာ တခြားအဖွဲ့အစည်းတွေနဲ့ ပူးပေါင်းဆောင်ရွက်နိုင်တယ်။ ဒါလေးတွေ ကျွန်တော်ကိုယ်တိုင် ရဲရဲဝံ့ဝံ့ ခွင့်ပြုထားပါတယ်” လို့ ရေးသားထားပြန်သည်။

သို့သော် ပါတီအပေါ် သစ္စာဖောက်ခြင်းဆိုသည့် ကိစ္စရပ်နှင့်မူ မည်သို့သော ကိစ္စရပ်များ ဖြစ်သည်ကိုမူ မရေးသားထားပေ။

၂၀၁၆ ခုနှစ် သြဂုတ်လ တတိယပတ်တွင်းက ပြုလုပ်သည့် ကြံ့ခိုင်ရေး ဒုတိယအကြိမ် ပါတီညီလာခံတွင် ဥက္ကဋ္ဌအဖြစ် ရွေးချယ်ခံခဲ့ရသူ ဦးသန်းဌေးမှာ ရွေးချယ်ခံရပြီး ရက်ပိုင်းအနည်းငယ်အကြာ သြဂုတ်လ ၂၅ ရက်တွင် ယခုကဲ့သို့ ရေးသားထားသည်။
ပါတီရှင်သန် ခိုင်မာရေးအတွက် ပေးလာမယ့် လမ်းညွှန်မှုနဲ့ အကြံဥာဏ်များကိုလည်း လေးစားစွာခံယူလိုပါတယ်...
"စဉ်ဆက်မပြတ် ဦးဆောင်မှုပေးနိုင်ရန်အတွက် ဗဟိုအလုပ်အမှုဆောင် အဖွဲ့နှင့် အမှုဆောင်အဖွဲ့ အဆင့်ဆင့်တို့ကို မျိုးဆက်သစ်အဖြစ်တာဝန်များ လက်ဆင့်ကမ်းလိုက်သော်လည်း ယခင်ဦးဆောင်ခဲ့ကြသည့် လူကြီးများက အသက်အရွယ်၊ ကျန်းမာရေးနှင့် အကြောင်းအမျိုးမျိုးကြောင့် ရှေ့တန်းက တာဝန်မထမ်းဆောင်နိုင်သော်လည်း ပါတီဗဟိုဦးဆောင်ပုဂ္ဂိုလ်ကြီးများ၊ နာယကကြီးများ၊ အတိုင်ပင်ခံပုဂ္ဂိုလ်ကြီးများအဖြစ် ပါတီကို ရင်အုပ်မကွာ စောင့်ရှောက်ပေးကြမှာဖြစ်သည့်အတွက် အားတက်ရသလို၊ စိတ်ဓာတ်ရေးရာ လုံခြုံမှုလည်းဖြစ်ပါတယ်။ ပါတီရှင်သန် ခိုင်မာရေးအတွက် ပေးလာမယ့် လမ်းညွှန်မှုနဲ့ အကြံဥာဏ်များကိုလည်း လေးစားစွာခံယူလိုပါတယ် - သန်းဌေး (ဥက္ကဋ္ဌ)၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ”

ကြံ့ခိုင်ရေးဥက္ကဋ္ဌဖြစ်သူ ဦးသန်းဌေးနှင့် ပတ်သက်၍ မြန်မာသံတော်ဆင့် အပတ်စဉ်သတင်းစာနဲ့ NLD ပြောရေးဆိုခွင့်ရှိသူ ဦးဝင်းထိန်တို့ တွေ့ဆုံမေးမြန်းမှု ပြုလုပ်ခဲ့ရာ ဦးဝင်းထိန်က ၎င်းနှင့် ပတ်သက်၍ မှတ်ချက်ပေးထားသည်ကို မြန်မာသံတော်ဆင့်က ယခုကဲ့သို့ ကောက်နုတ်ဖော်ပြထားသည်။

“ဦးသန်းဌေး။ သူက နိုင်ငံရေးသမား မဟုတ်ဘဲ။ နိုင်ငံရေးမှ နားမလည်တာ။ ပြောချင်တာတွေ လျှောက်ပြောနေတာ။ သနားတော့ သနားပါတယ်။ နိုင်ငံရေးဆိုတာ ပြည်သူလူထု ထောက်ခံမှ ရတာ။ ပြည်သူလူထု ထောက်ခံအောင် သူတို့ မလုပ်တတ်ဘူး။ ဒါပဲ။ သူတို့ ချို့ယွင်းချက်က…”
နိုင်ငံရေးသမားဆိုတာ ထောင်သက်နဲ့ တွက်ရတယ်လို့ ထင်နေရင်တော့ ဘာမှ မပြောလိုတော့ပါဘူး...
ယင်းစကားရပ်နှင့် ပတ်သက်၍ ဦးသန်းဌေးက “နိုင်ငံရေးသမားဆိုတာ ထောင်သက်နဲ့ တွက်ရတယ်လို့ ထင်နေရင်တော့ ဘာမှ မပြောလိုတော့ပါဘူး” ဟု လူမှုကွန်ရက် ဖေ့ဘုတ်ပေါ်တွင် သဘောထားမှတ်ချက် ပေးထားသည်။

ကြံ့ခိုင်ရေးပါတီဥက္ကဋ္ဌ ဦးသန်းဌေးမှာ တပ်ဘက်တွင် ဗိုလ်မှူးချုပ်အဆင့်အထိ တာဝန်ထမ်းဆောင်ခဲ့ပြီး အရပ်ဘက်တွင်မူ စွမ်းအင်ဝန်ကြီးဌာန ဒုဝန်ကြီးနှင့် ပြည်ထောင်စုဝန်ကြီး၊ ရထားပို့ဆောင်ရေး ၀န်ကြီးဌာနတို့တွင် ပြည်ထောင်စုဝန်ကြီးအဖြစ် တာဝန်ထမ်းဆောင်ခဲ့ဖူးသူလည်း ဖြစ်သည်။

အောက်ချင်းသစ္စာ သတင်းအေဂျင်စီ
Read more »

ကလေး၊ နိုဝင်ဘာ ၁

တိုက်ပွဲပြန် တပ်မတော်သားများအား ကြိုဆိုရန်အတွက် ချင်းပြည်နယ်၊ ဟားခါး ခရိုင်အထွေထွေအုပ်ချုပ်ရေးမှူးမှ ကျောင်းသားကျောင်းသူများ၊ ဌာနဆိုင်ရာဝန်ထမ်းများနှင့် ရပ်/ကျေးတာဝန်ရှိသူများအား ဖိအားပေး လုပ်ဆောင်ခိုင်းမှုအပေါ် ရှုတ်ချကြောင်း ဖလမ်းလူငယ်အဖွဲ့က ကြေညာချက် ထုတ်ပြန်လိုက်သည်။

ဖလမ်းမြို့တွင် တပ်စွဲထားသည့် ခလရ (၂၆၈) မှ ရှေ့တန်းပြည် တပ်မတော်သားများအား အောက်တိုဘာလ ၂၉ ရက်မှ ၃၁ ရက်အထိ သုံးရက်တိုင်တိုင် ကြိုဆိုရန်အတွက် ခရိုင်အထွေထွေ အုပ်ချုပ်ရေးဦးစီးဌာနက ခိုင်းစေခဲ့ခြင်းဖြစ်ကြောင်း ယင်းကြေညာချက်တွင် ပါရှိပြီး ယင်းမှာ ဗိုလ်ချုပ်မှူးကြီး မင်းအောင်လှိုင်၏ တရုတ်ပြည်ခရီးစဉ်နှင့် တိုက်ဆိုက်စေရန် အကွက်ကျကျ စီမံဆောင်ရွက်ခဲ့ခြင်းမျှသာ ဖြစ်သည်ဟုလည်း ဖလမ်းလူငယ်အဖွဲ့က သုံးသပ်ထားသည်။

ခမရ ၂၆၈ မှာ ရှေ့တန်းတစ်နေရာသို့ လအတန်ကြာ ထွက်ခွာနေရာမှ မိခင်တပ်ရင်း အခြေစိုက်ရာ ဖလမ်းမြို့သို့ ပြန်လာချိန်တွင် ယင်းကဲ့သို့ ကြိုဆိုခိုင်းခဲ့ခြင်းဖြစ်ကာ ယင်းသို့သော နိုင်ငံရေးလှည့်ကွက်ကို အသုံးချ၍ တပ်မတော်နှင့် ပြည်သူများအကြား အမုန်းပွားစေပြီး တိုင်းရင်းသားစည်းလုံးညီညွတ်မှုကို ပြိုကွဲစေမည့် ဒို့တာဝန်အရေးသုံးပါးကို ထိပါးစေသောလုပ်ရပ်ကို ကျူးလွန်သည့် တာဝန်ရှိသူများအား အပြင်းအထန် ကန့်ကွက်ကြောင်းလည်း ဖလမ်းလူငယ်အဖွဲ့၏ သဘောထားထုတ်ပြန်ချက်တွင် ထည့်သွင်း ဖော်ပြထားသည်။

ပြီးခဲ့သည့် ရက်ပိုင်းအတွင်းများကလည်း ချင်းပြည်နယ်ရှိ မြို့အချို့တွင် ကချင်ပြည်နယ်၌ ဖြစ်ပွားနေသည့် တိုက်ပွဲများ ရပ်စဲရေးအတွက် ဆန္ဒထုတ်ဖော်မှုများ ပြုလုပ်ပြီးနောက်တွင် ယင်းကဲ့သို့ ရှေ့တန်းပြန် တပ်မတော်သားများအား ကြိုဆိုခိုင်းခဲ့ခြင်းမှာလည်း တိုက်ဆိုင်လျက် ရှိသည်။

အောက်ချင်းသစ္စာ သတင်းအေဂျင်စီ
Read more »

(ထွဏ်းမောင်၊ လွဏ်းမောင် ဆွေးနွေးခန်း)


ရန်ကုန်၊ အောက်တိုဘာ ၂၉

ထွဏ်းမောင် - ဗျို့…ကိုရင်လွဏ်းမောင်...အခုတစ်လော ပျောက်လှချည်လားဗျ…။

လွဏ်းမောင် - သြော်…ကိုထွဏ်းမောင်ရယ်…ပျောက်ဆိုလည်း ပျောက်လို့ပဲ ပြောရမယ်ဗျ…။ အခုတစ်လော ပွတ်လောထနေတဲ့ ကိစ္စနဲ့ ပတ်သက်လို့ ကွန်ပျူတာရှေ့ ငုတ်တုပ်ထိုင်ပြီး မွှေနေ နှောက်နေတာနဲ့ ပြင်ပလောကနဲ့ အဆက်ပြတ်နေတယ်ပဲ ဆိုပါစို့။

ထွဏ်းမောင် - အယ်…ဘယ်ကိစ္စတုန်း ကိုလွဏ်းမောင်ရဲ့၊ ပွတ်လောထတယ်ဆိုတာ။ ကျုပ်တို့ကိုလည်း မျှပါဦးဗျ။

လွဏ်းမောင် - သြော်…ကျုပ်တို့ရဲ့ နိုင်ငံတော်အတိုင်ပင်ခံကြီး ပြီးခဲ့တဲ့ အပတ်တုန်းက နေပြည်တော်မှာ လုပ်ခဲ့တဲ့ စီးပွားရေးလုပ်ငန်းရှင်တွေ၊ မိတ်ဖက်တွေနဲ့ တွေ့တဲ့ပွဲလေဗျာ။

ထွဏ်းမောင် - သိပြီ သိပြီ။ ဟို တပ်ချုပ်ဟောင်းကြီးရဲ့ မြေးတော်လေးတောင် ပွဲတက်လာလို့ လူမှုကွန်ရက်ပေါ် အတော်လေးကို ပွတ်လောရိုက်သွားသေးတယ် မဟုတ်လားဗျ။ ဒါနဲ့ အဲဒီကိစ္စနဲ့ ပတ်သက်ပြီးတော့ ခင်ဗျား အလုပ်များနေတာလားဗျ။

လွဏ်းမောင် - မဟုတ်ရပေါင်ဗျာ။ ကျုပ်က NLD က ချမှတ်လုပ်ကိုင်နေတဲ့ စီးပွားရေးမူဝါဒနဲ့ ပတ်သက်လို့ အတွေးများနေတာပါ။ အဲဒီပွဲမှာ အတိုင်ပင်ခံကြီးကလည်း တိုင်းပြည်က မျှော်လင့်သလောက် စီးပွားရေး မတိုးတက်ခဲ့ပါဘူးဆိုပြီး ၀န်ခံသွားတယ်လေဗျာ။

ထွဏ်းမောင် - ဟုတ်ပါ့ ကိုလွဏ်းမောင်ရယ်။ ကျုပ်လည်း အဲဒီကိစ္စ ကြားလိုက်တယ်။ ဒါနဲ့ ပတ်သက်လို့ ကိုရင်က ဘာတွေများ အတွေးများနေရတာလဲဗျ။

လွဏ်းမောင် - ကျုပ်က NLD က ထုတ်ထားတဲ့ စီးပွားရေးမူဝါဒနဲ့ ပတ်သက်လို့ ဆက်စပ်တွေးမိတာလေးတစ်ခု ရှိလို့ပါဗျ။ အတိုင်ပင်ခံကြီးက တစ်ဖက်က စီးပွားရေးက မတိုးတက်ပါဘူးလုိ့ ပြောနေပေမယ့်လည်း သူတို့ ချမှတ်ထားတဲ့ စီးပွားရေးမူဝါဒ မျှော်မှန်းချက်က နည်းနည်းလွဲနေသလားဆိုပြီး သံသယရှိလို့ပါဗျ။ ဘာလို့ဆိုရင် သူတို့ မူဝါဒ မျှော်မှန်းချက်မှာက “အမျိုးသားပြန်လည်သင့်မြတ်ရေးကို အထောက်အကူရှိစေရန် ဦးတည်၍” ဆိုပြီးပါနေတယ်လေ။ မူဝါဒ ၁၂ ချက်မှာတော့ စီးပွားရေးနဲ့ ဆက်စပ်တာတွေ ပါပေမယ့်လည်း မူဝါဒ မျှော်မှန်းချက်ကိုက အမျိုးသား ပြန်လည်သင့်မြတ်ရေးဆိုတော့ လွဲနေသလားဆိုပြီးတော့လေ။

ထွဏ်းမောင် - အဲ…ဒါလည်း ဟုတ်နေသလိုပဲဗျ။ စီးပွားရေးမူဝါဒက ခင်ဗျားပြောသလို အမျိုးသား ပြန်လည်သင့်မြတ်ရေး၊ ငြိမ်းချမ်းရေးနဲ့ ဆက်စပ်နေတာတော့ တစ်မျိုးပဲ။ နောက်ပြီး အခု အစိုးရအဖွဲ့ကို ဦးဆောင်နေတဲ့ အတိုင်ပင်ခံကလည်း ဒီကိစ္စကိုချည်း တွန်းလုပ်နေတယ်ဆိုတော့ ခင်ဗျား တွေးလည်း တွေးစရာပေါ့ဗျာ။
ကမ္ဘာ့ဘဏ်ကလည်း မြန်မာပြည် စီးပွားရေး တက်တယ်လို့သာ ပြောနေပေမယ့် ပြည်တွင်းက စီးပွားရေးဘာသာရပ် လေ့လာကျွမ်းကျင်သူတွေ၊ လုပ်ငန်းရှင်တွေ၊ နောက်ဆုံး အတိုင်ပင်ခံကတောင် စီးပွားရေးမတိုးတက်ဘူးလို့ ပြောနေ၊ ဆိုနေ၊ ၀န်ခံနေကြပြီလေ...
လွဏ်းမောင် - အဲဒါပြောတာဗျ။ အခု ကမ္ဘာ့ဘဏ်ကလည်း မြန်မာပြည် စီးပွားရေး တက်တယ်လို့သာ ပြောနေပေမယ့် ပြည်တွင်းက စီးပွားရေးဘာသာရပ် လေ့လာကျွမ်းကျင်သူတွေ၊ လုပ်ငန်းရှင်တွေ၊ နောက်ဆုံး အတိုင်ပင်ခံကတောင် စီးပွားရေးမတိုးတက်ဘူးလို့ ပြောနေ၊ ဆိုနေ၊ ၀န်ခံနေကြပြီလေ။ ဒီကြားတည်း ထူးတာတစ်ခုက အရင်အစိုးရ လက်ထက်ကထက်ကို စီးပွားရေးတိုးတက်နှုန်း ကျလာတယ်လို့ ပြောနေ ဆိုနေကြတာပဲ။

ထွဏ်းမောင် - ဟုတ်သဗျ။ တိုင်းပြည်က နိုင်ငံရေးနဲ့ စီးပွားရေး အင်ဂျင်နှစ်လုံးပေါင်းမှ တိုးတက်တာဆိုတော့လည်း ခက်ပြန်ကော မဟုတ်လားဗျ။ ဒါနဲ့ အရင်အစိုးရတုန်းကလည်း ငြိမ်းချမ်းရေးကိစ္စတွေ လုပ်ခဲ့ပေမယ့် စီးပွားရေးတိုးတက်တယ်ဆိုတော့ တစ်မျိုးချည်း ဖြစ်မနေဘူးလားဗျ။

လွဏ်းမောင် - အဲဒါပြောတာပေါ့ဗျ။ အရင်အစိုးရက တကယ်တော့ ပြည်သူလက်သင့်ခံခဲ့တဲ့ အစိုးရမဟုတ်ပေမယ့် သူတို့လည်း ငြိမ်းချမ်းရေးလည်း လုပ်၊ စီးပွားရေးကိုလည်း လက်သင့်ရာ စားတော်ခံနည်းနဲ့ လုပ်ခဲ့ပေမယ့် တိုင်းပြည် စီးပွားတိုးတက်တာ ရှိနေသေးတော့ ကျုပ်တို့ အခု လက်ရှိ အစိုးရက မူဝါဒမှာ အားနည်းနေတာလား၊ ဒါမှမဟုတ် ဘာကြောင့်လဲဆိုတာကို အဖြေရှာမရ ဖြစ်နေတာဗျ။ ဒါကြောင့် NLD အစိုးရရဲ့ စီးပွားရေးမူဝါဒမှာ အချက်အလက်တွေက ရှင်းရှင်းလင်းလင်း မပါပေမယ့်လည်း မူဝါဒ မျှော်မှန်းချက်ထဲကိုက “အမျိုးသားပြန်လည်သင့်မြတ်ရေးကို ဦးတည်” ဆိုတဲ့ စဉ်းစားချက်များမှာ လွဲနေသလားလို့ပါဗျာ။ နောက်ပြီး အခုနောက်ပိုင်း အတိုင်ပင်ခံကိုယ်တိုင်က စီးပွားရေးဆိုတာထက် အမျိုးသားပြန်လည်သင့်မြတ်ရေးကိုချည်း ဖိလုပ်နေတာတွေ့ရတော့ စီးပွားရေးမူဝါဒတွေ အောင်မြင်ပါ့တော့မလားလို့တောင် တွေးတွေးမိလာတာပါပဲဗျာ။

ထွဏ်းမောင် - ကိုရင်လွဏ်းရေ…ခင်ဗျားပြောသလိုဆိုရင်တော့ ကျုပ်တို့လည်း ရှာဖွေ မွှေနှောက် ဖတ်ရှုရတော့မယ့် အခြေအနေ ရောက်ပြီ ထင်ပါ့။ တိုင်းပြည် မငြိမ်သက်ရင် ပြည်ပက ရင်းနှီးမြှုပ်နှံမှု မလာ၊ မလာတော့ တိုးတက်မှု နှောင့်နှေးဆိုတာကတော့ စဉ်းစားရမယ့်အချက်ဆိုပေမယ့်လည်း တွေးစရာတွေက များလာပြီလို့ ပြောရမယ်ဗျ။ တကယ်တော့ ဒီကိစ္စဆိုတာမျိုးက တစ်ပြိုင်နက်တည်း လုပ်မှ ရမယ့်ကိစ္စလို့တော့ ကျုပ်တော့ ထင်တာပါပဲဗျာ။ ဒါရမှ ဒါဖြစ်မယ်ဆိုတာကတော့ နည်းနည်းလေ လွဲနေသလားလို့ပဲဗျာ။

လွဏ်းမောင် - သေချာပါပကော ကိုရင်ထွဏ်းရယ်။ ကျုပ်အသိ လက်နက်ကိုင်ခေါင်းဆောင် တစ်ဦးပြောတာရှိသေးသဗျ။ NCA ဆိုတာ စားပွဲဝိုင်းမှာ လူကြီးတွေ ထိုင်နေချိန် နောက်တန်းက စစ်သားက သေနတ်ပြောင်းတိုက်ချိန် ရတာပေါ့ဆိုတဲ့ စကားကို သွားသတိရမိရဲ့။ ငြိမ်းချမ်းရေးပွဲတွေ လုပ်နေပေမယ့် သေနတ်သံက တဂျိန်းဂျိန်းဆိုတော့ ဒါကို ဦးတည်တဲ့ စီးပွားရေးမူဝါဒကလည်း တကယ် အလုပ်ဖြစ်ပါ့တော့မလားလို့ တွေးရင်း တွေးရင်းပါပဲဗျာ…။

အောက်ချင်းသစ္စာ သတင်းအေဂျင်စီ
Read more »

Photo : Pu Thla Hre (ချင်းပြည်နယ် စည်ပင်သာယာရေးကော်မတီ ညွှန်ကြားရေးမှူး) Facebook
ကလေး၊ အောက်တိုဘာ ၂၇

ချင်းပြည်နယ်အတွင်းရှိ မြို့နယ်အလိုက် စည်ပင်သာယာရေး ကော်မတီဝင်များကို ရွေးချယ်ခဲ့ပြီးနောက် ကော်မတီဥက္ကဋ္ဌအား လျှို့ဝှက်မဲပေး ရွေးချယ်ခြင်းအား အောက်တိုဘာလ ၂၇ ရက်က ဟားခါးမြို့တွင် ပြုလုပ်ခဲ့ရာ မြို့နယ်အလိုက် စည်ပင်သာယာရေးကော်မတီဥက္ကဋ္ဌများ ထွက်ပေါ်လာပြီ ဖြစ်သည်။

အဆိုပါ လျှို့ဝှက်ဆန္ဒမဲပေး ရွေးချယ်ခြင်းကို “ချင်းပြည်နယ်အတွင်းရှိ မြို့နယ် စည်ပင်သာယာရေးကော်မတီများနှင့် ချင်းပြည်နယ်အစိုးရအဖွဲ့ ၀န်ကြီးချုပ်၏ လမ်းညွှန်သြ၀ါဒခံယူပွဲနှင့် ကတိသစ္စာ ခံယူပွဲအခမ်းအနား” တွင် ပြုလုပ်ခဲ့ခြင်းဖြစ်ပြီး မဲဆန္ဒတူဖြင့် သက်တမ်းတစ်ဝက်စီသာ အုပ်ချုပ်ရမည့် မြို့နယ်တစ်ခုလည်း ပါဝင်ခဲ့သည်။

အဆိုပါ မြို့နယ်မှာ ဟားခါးမြို့ဖြစ်ပြီး မဲရရှိမှုရလဒ် တူညီသဖြင့် ဦးခင်မောင်ဝင်းနှင့် ဦးငွန်ဝုန်းတို့ ဥက္ကဋ္ဌရာထူးအား သက်တမ်းတစ်ဝက်စီ ပြုလုပ်ရမည်ဖြစ်ကာ ဖလမ်းတွင် ဦးဒါရ်လျန်အုပ်၊ ထန်တလန်တွင် ဦးရမ်ခါရ်၊ ပလက်ဝတွင် ဦးထွန်းလင်း၊ မင်းတပ်တွင် ဦးတိုင်းလင်း၊ မတူပီတွင် ဦးလိန်းလော၊ တီးတိန်တွင် ဦးဒမ်ခိုဇမ်းတို့ ရွေးချယ်ခံခဲ့ရသည်။

အခြားမြို့နယ်များဖြစ်သည့် တွန်းဇန်တွင် ဦးနိန်းခင်းပေါင်၊ ကန်ပက်လက်တွင် ဦးလှေ့နိုင်၊ ကျီခါးတွင် ဦးဝုံးလမ်ထွန်း၊ ရိဒ်ခေါဒရ်တွင် ဦးရန်ကမ်၊ ရေဇွာတွင် ဦးခိုင်ခူးနှင့် ဆမီးတွင် ဦးခိုလန်းတို့ ရွေးချယ်ခံရသည်။

ပြည်သူတို့၏ မဲပေးမှုဖြင့် ရွေးချယ်ခံခဲ့ရသည့် မြို့နယ်စည်ပင်ဥက္ကဋ္ဌနှင့် ကော်မတီအဖွဲ့ဝင်များမှာ နိုဝင်ဘာလ ၁ ရက်မှစတင်ကာ တာဝန်ထမ်းဆောင်ကြရမည်ဖြစ်ပြီး အစိုးရလစာကို တရားဝင် ခံစားခွင့်ရရှိတော့မည် ဖြစ်သည်။

အောက်ချင်းသစ္စာ သတင်းအေဂျင်စီ
Read more »

နတ်မတောင်
Photo : bestindochinatour.net
ဟားခါး၊ အောက်တိုဘာ ၂၅

ပြည်နယ်တွင်း ခရီးသွားလုပ်ငန်း ဖွံ့ဖြိုးတိုးတက်ရေးအလို့ငှာ အရေးပါသည့် ဟိုတယ်များ ဆောက်လုပ်နိုင်ရန်အတွက် စိတ်ပါဝင်စားသူ လုပ်ငန်းရှင်များအနေဖြင့် အစိုးရထံ နိုဝင်ဘာလ ၇ ရက် နောက်ဆုံးထား၍ အဆိုပြုလွှာများ လျှောက်ထားနိုင်ကြောင်း ချင်းပြည်နယ်အစိုးရအဖွဲ့က အောက်တိုဘာလ ၂၅ ရက်တွင် ကြေညာထားသည်။

ချင်းပြည်နယ်၏ မြို့နယ်ခြောက်ခုဖြစ်သော ဟားခါး၊ ဖလမ်း၊ တီးတိန်၊ ပလက်ဝ၊ မတူပီနှင့် ခိုင်ကမ်းမြို့များတွင် ဟိုတယ်ဆောက်လုပ်လိုသော တိုင်းရငးသားလုပ်ငန်းရှင်များကို ဖိတ်ခေါ်ထားခြင်းဖြစ်ပြီး အဆိုပြုလွှာများအား ဟားခါးမြို့ရှိ ချင်းပြည်နယ်အစိုးရအဖွဲ့၊ စည်ပင်သာယာရေး၊ လျှပ်စစ်နှင့် စက်မှုလက်မှုဝန်ကြီးရုံးသို့ လိပ်မူ လျှောက်ထားရမည် ဖြစ်သည်။

ချင်းပြည်နယ်အတွင်း ကန်ပက်လက်မြို့နယ်တစ်ခုတွင်သာ ဟိုတယ်၊ မိုတယ်နှင့် တည်းခိုရိပ်သာစာရင်းဝင် အဆောက်အအုံ ၃ ခုသာ ရှိပြီး ယင်းသုံးခုတွင် အခန်းပေါင်း ၆၇ ခန်းသာ ပါဝင်သည်ဟု ၂၀၁၅ ခုနှစ်က ဟိုတယ်နှင့် ခရီးသွားလုပ်ငန်းဝန်ကြီးဌာနမှ ထုတ်ပြန်သည့် ကိန်းဂဏန်းများတွင် ဖော်ပြထားသည်။

အဆိုပြုလွှာ ခေါ်ထားသည့် မြို့များတွင် ကန်ပက်လက်နှင့် မင်းတပ်မြို့ မပါဝင်ရခြင်းနှင့် ပတ်သက်၍ “hotel ရှိပြီးဖြစ်ပါတယ်။ လောလောဆယ် လုံလောက်မှုရှိလို့၊ တစ်နှစ်နှစ်နှစ်အတွင်း အသစ် ထပ်မဆောက်သေးဘူးလားလို့ စဉ်းစားလို့ပါ” ဟု ချင်းပြည်နယ်၊ စည်ပင်သာယာရေး၊ ခရီးသွား၊ လျှပ်စစ်နှင့် စက်မှုလက်မှုဝန်ကြီး ဆလိုင်းအိုက်ဇက်ခင်က လူမှုကွန်ရက် Facebook ပေါ်မှတစ်ဆင့် မေးမြန်းထားမှုများအပေါ် ပြန်လည် ဖြေကြားထားသည်။

လာမည့် ငါးနှစ်တာကာလအတွင်း ကဏ္ဍသုံးရပ်အား မဟာဗျူဟာချမှတ်၍ အကောင်အထည်ဖော်သွားမည်ဖြစ်ကြောင်း ၀န်ကြီး ဆလိုင်းအိုက်ဇက်ခင်က မီဒီယာများသို့ ပြောဆိုထားပြီး ယင်းကဏ္ဍသုံးရပ်မှာ ကုန်သွယ်ရေး၊ အသေးစားအလတ်စား စီးပွားရေးလုပ်ငန်းနှင့် ခရီးသွားလုပ်ငန်းတို့ ဖြစ်သည်။

ယင်း ခရီးသွားလုပ်ငန်း ဖွံ့ဖြိုးရေးအတွက် မဟာဗျူဟာလုပ်ငန်းစဉ် ၁၃ ရပ် ချမှတ်ထားပြီးဖြစ်ကာ တစ်နှစ်လျှင် ရပ်ရွာအခြေပြုခရီးသွားလုပ်ငန်း (Community Based Tourism – CBT) အတွက် တစ်နှစ်လျှင် ကျေးရွာသုံးရွာ ဖော်ထုတ်သွားရန်ကိုလည်း မဟာဗျူဟာတစ်ရပ်အနေဖြင့် သတ်မှတ်ထားသည်။

၂၀၁၆ ခုနှစ်အတွက် ရွေးချယ်ထားသည့် CBT ကျေးရွာများမှာ ကန်ပက်လက်မြို့နယ်မှ ဆော်လောင်းကျေးရွာ၊ ဖလမ်းမြို့နယ်မှ တာရွှန်းကျေးရွာနှင့် တီးတိန်မြို့နယ်မှ လိုင်လိုးကျေးရွာတို့ ဖြစ်သည်။

ချင်းပြည်နယ်တွင် Eco Tourism လုပ်ငန်း လုပ်ဆောင်ရန်အတွက် ခေါနုသုန် (ခ) နတ်မတောင် အမျိုးသားဥယျာဉ်ကို ၁၉၉၄ ခုနှစ်က သတ်မှတ်ထားပြီဖြစ်ကာ အဆိုပါ အမျိုးသားဥယျာဉ်မှာ ကန်ပက်လက်၊ မင်းတပ်နှင့် မတူပီ မြို့နယ်သုံးခုစလုံးနှင့် ချိတ်ဆက်နေကာ ဧက ၁၇၆၃၀၀၀ ကျယ်ဝန်းသည်။

အောက်ချင်းသစ္စာ သတင်းအေဂျင်စီ
Read more »

Photo : Myanmar State Counsellor Office
ရန်ကုန်၊ အောက်တိုဘာ ၂၃

စီးပွားရေးကဏ္ဍ ဖွံ့ဖြိုးရေးအလို့ငှာ မူဝါဒ ၁၂ ချမှတ်လုပ်ကိုင်ခဲ့သော်လည်း အစိုးရသက်တမ်း ခြောက်လအတွင်း မျှော်လင့်သလောက် စီးပွားရေးမတိုးတက်ခဲ့ကြောင်း နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က ၀န်ခံလိုက်ပြီ ဖြစ်သည်။

အောက်တိုဘာလ ၂၂ ရက်က နေပြည်တော်တွင် ပြုလုပ်သည့် စီးပွားရေးလုပ်ငန်းများ၊ ဖွံ့ဖြိုးမှုမိတ်ဖက်များ တွေ့ဆုံပွဲ အဖွင့်မိန့်ခွန်းတွင် ဒေါ်အောင်ဆန်းစုကြည်က ယခုကဲ့သို့ ၀န်ခံလိုက်ခြင်း ဖြစ်သည်။

“ကျွန်မတို့ မျှော်မှန်းသလောက် ပထမ ၆ လဟာ စီးပွားရေးဘက်မှာ မြန်မြန်ဆန်ဆန် တိုးတက်မှု မရှိခဲ့ဘူးဆိုတာ ပွင့်ပွင့်လင်းလင်းပဲ ၀န်ခံချင်ပါတယ်။ ဒီလိုမရှိခဲ့ရတဲ့ အကြောင်းတွေက တော်တော်များများ ရှိပါတယ်” ဟု နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောဆိုလိုက်ခြင်း ဖြစ်သည်။

ယခုကဲ့သို့ ပြောဆိုလိုက်ခြင်းမှာ စီးပွားရေးမူဝါဒနှင့် ပတ်သက်၍ နိုင်ငံတော်အဆင့် တာဝန်ရှိသူတစ်ဦးက ဦးဆုံး ဖွင့်ပြောလိုက်ခြင်းလည်း ဖြစ်သည်။

NLD အစိုးရလက်ထက်တွင် ဦးတည်လုပ်ကိုင်မည့် စီးပွားရေးမူဝါဒ ၁၂ ချက်ကို ဇူလိုင်လ ၂၉ ရက်က ထုတ်ပြန်ထားပြီးဖြစ်သော်လည်း မူဝါဒများမှာ ယေဘူယျဆန်ပြီး တိကျရှင်းလင်းသည့် အဓိပ္ပာယ်ဖွင့်ဆိုချက်များ မပါဝင်သည့်အတွက် မည်သို့ လုပ်ဆောင်ရမည်ကိုပင် မသိတော့ကြောင်း စီးပွားရေးနှင့် ဘဏ်လုပ်ငန်းရှင်များက ဝေဖန်ထားကြပြီး မူဝါဒနှင့် ပတ်သက်၍ ဖြေကြားခဲ့ခြင်းများကိုလည်း မိမိကိုယ်တိုင် ကျေနပ်မှုမရှိကြောင်း နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ယခုကဲ့သို့ ပြောဆိုထားသေးသည်။
နိုင်ငံရဲ့ ဖွံ့ဖြိုးတိုးတက်မှုအတွက် အရေးအကြီးဆုံးအချက်က ကျွန်မတို့ ပြည်သူပြည်သားများရဲ့ အရည်အချင်းတန်ဖိုးကို မြှင့်တင်ရေးပဲ။ အဲဒါကို အခြေခံပြီးမှသာ ကျွန်မတို့ဟာ ရေရှည်တည်တံ့ခိုင်မြဲနိုင်မယ့် ဖွံ့ဖြိုးတဲ့ စီးပွားရေးစနစ်တစ်ခုကို ထူထောင်နိုင်မှာပါ။ ပြည်သူပြည်သားတွေရဲ့ အစွမ်းအစ အရည်အချင်းကို အဓိက အားကိုးတဲ့ စနစ်မျိုးသာလျှင် ရေရှည် တည်တံ့ခိုင်မြဲနိုင်မယ်...
“ဘာတွေကို ကျွန်မတို့ ဦးစားပေးမှာလဲ၊ ဘယ်မူဝါဒ တွေကို ဦးစားပေးမှာလဲ၊ ဘယ်အချက်အလက်တွေကို အရေးကြီးအနေနဲ့ မြင်သလဲဆိုပြီး မေးတဲ့အခါမှာ ကျွန်မက ဒီမေးခွန်းတွေကို ဖြေဖို့ စဉ်းစားပါတယ်။ စဉ်းစားပြီးတော့လည်း ဖြေခဲ့ပါတယ်။ ဒါပေမဲ့ အမှန်ပြောရရင် ကျွန်မပေးတဲ့ အဖြေတွေကို ကျွန်မမကျေနပ်ဘူး။ သေသေချာချာ ပြန်ပြီးတော့ စဉ်းစားတယ်။ ကျွန်မတို့ နိုင်ငံအတွက် တကယ့်အရေးကြီးကိစ္စက ဘာလဲ။ ကျွန်မတို့ နိုင်ငံရဲ့ ဖွံ့ဖြိုးတိုးတက်ရေး အတွက် အဓိကထားရမယ့် အချက်တစ်ချက်တည်း ပြောပါဆိုရင် ဘယ်အချက်ကို ပြောမလဲဆိုတာ ကျွန်မ သေသေချာချာ စဉ်းစားကြည့်တဲ့အခါ ကျွန်မ ခေါင်းထဲမှာ ပေါ်လာတာက တကယ်ကျွန်မတို့ နိုင်ငံရဲ့ ဖွံ့ဖြိုးတိုးတက်မှုအတွက် အရေးအကြီးဆုံးအချက်က ကျွန်မတို့ ပြည်သူပြည်သားများရဲ့ အရည်အချင်းတန်ဖိုးကို မြှင့်တင်ရေးပဲ။ အဲဒါကို အခြေခံပြီးမှသာ ကျွန်မတို့ဟာ ရေရှည်တည်တံ့ခိုင်မြဲနိုင်မယ့် ဖွံ့ဖြိုးတဲ့ စီးပွားရေးစနစ်တစ်ခုကို ထူထောင်နိုင်မှာပါ။ ပြည်သူပြည်သားတွေရဲ့ အစွမ်းအစ အရည်အချင်းကို အဓိက အားကိုးတဲ့ စနစ်မျိုးသာလျှင် ရေရှည် တည်တံ့ခိုင်မြဲနိုင်မယ်လို့ ကျွန်မခေါင်းထဲမှာ ဒီလိုပဲရောက်လာပါတယ်” ဟု ဒေါ်အောင်ဆန်းစုကြည်က ပြောဆိုခဲ့သည်။

အဆိုပါ တွေ့ဆုံပွဲသို့ ပြည်တွင်း စီးပွားရေးလုပ်ငန်းရှင်များ၊ ဘဏ်လုပ်ငန်းရှင်များအပြင် ပြည်ပမှ စီးပွားရေးမိတ်ဖက် အဖွဲ့အစည်းများမှ တာဝန်ရှိသူများလည်း တက်ရောက်ခဲ့သည်။ ထို့ပြင် အနားယူသွားပြီဖြစ်သည့် ကာကွယ်ရေးဦးစီးချုပ်ဟောင်း ဗိုလ်ချုပ်မှူးကြီး (ငြိမ်း) ဦးသန်းရွှေ၏ မြေးဖြစ်သူ ဖိုးလပြည့်လည်း အဆိုပါပွဲသို့ တက်ရောက်ခဲ့သည်။

ပြီးခဲ့သည့် အစိုးရသက်တမ်းအဆက်ဆက်တွင် အာဏာပိုင်များနှင့် နီးစပ်ကာ စီးပွားရေး အခွင့်အလမ်းများ ရယူခဲ့ကြသည့် ခရိုနီ စီးပွားရေးလုပ်ငန်းရှင်များနှင့် ပတ်သက်၍လည်း ဒေါ်အောင်ဆန်းစုကြည်က - “ဒီအစိုးရမတက်ခင်ကတည်းက အားလုံးသိနေတဲ့၊ အင်္ဂလိပ်ဘာသာစကားကို မကျွမ်းကျင်ဘူး ဆိုပေမယ့် သိနေတဲ့ အသုံးအနှုန်းတစ်ခုရှိပါတယ်။ "ခရိုနီ"ဆိုတဲ့ အသုံးအနှုန်းဖြစ်ပါတယ်။ ကျွန်မတို့နိုင်ငံ တစ်နိုင်ငံလုံးမှာ ပြန့်ပွားနေတဲ့ ခရိုနီ၊ စီးပွား ရေး အောင်မြင်ကျော်ကြားနေတဲ့သူတွေက ခရိုနီတွေ၊ ပြောရမယ်ဆိုရင် အစိုးရနဲ့ အာဏာရှိတဲ့ပုဂ္ဂိုလ်များနဲ့ ပင်းပြီးတော့ သူတို့ရဲ့အောင်မြင်မှုအတွက်လုပ်တာ တရားဥပဒေ ဘောင်အတွင်းက လုပ်တာမဟုတ်ဘူး။ အများပြည်သူအတွက် လုပ်တာ မဟုတ်ဘူး ဆိုပြီး ဝေဖန်ချက်တွေရှိပါတယ်။ ဒီလိုဝေဖန်ချက်တွေ ကြားရတဲ့အခါမှာ ကျွန်မ စိတ်မကောင်းပါဘူး။ စိတ်မကောင်းဘူးဆိုတာ ပြည်သူ ပြည်သားများ အချင်းချင်း ဘာလို့ ဒီလောက် စိတ်ဝမ်းကွဲနေကြပါသလဲ။ ကိုယ့်အတွက်ပဲ လုပ်မယ်ဆိုတဲ့ လုပ်ငန်းရှင်ကြီးများ နိုင်ငံမှာများနေသလား၊ ကိုယ်ကျိုးအတွက်ပဲကြည့်မယ်ဆိုတဲ့ ပုဂ္ဂိုလ်တွေကျွန်မတို့နိုင်ငံမှာ များနေသလား။ ဒီလိုမျိုးတွေရှိနေတယ် ဆိုရင် နိုင်ငံ့အတွက် အင်မတန်မှဝမ်းနည်းစရာဖြစ်ပါတယ်။ ဒါပေမဲ့ ကျွန်မယုံကြည်ချက်တစ်ခုက အတိတ်ဆိုတာဟာ ကိုယ့်ကိုကိုယ် ချည်နှောင်ထားဖို့ မဟုတ်ဘူး။ သင်ခန်းစာယူပြီးတော့ ရှေ့ကိုဆက်သွားနိုင်ရမယ်၊ တစ်ချိန် တစ်ခါတုန်းက ကိုယ့် အတွက်ပဲလုပ်ခဲ့တဲ့ ပုဂ္ဂိုလ်တွေက နောင်တစ်ချိန်တစ်ခါမှာ အများအတွက်မလုပ်နိုင်ဘူးလား။ အများအတွက်လုပ်နိုင်တဲ့အရည်အချင်းတွေသူတို့မှာ မရှိဘူးလား။ ကိုယ့်အစုအဖွဲ့၊ ကိုယ့်ရဲ့လုပ်ငန်း၊ ကိုယ့်ရဲ့ပတ်ဝန်းကျင်၊ ကိုယ့်ရဲ့မိသားစု အတွက်ပဲ စဉ်းစားခဲ့တဲ့ ပုဂ္ဂိုလ်များဟာ အမြင်ကျယ်လာပြီးတော့ တစ်တိုင်းပြည်လုံး အတွက် စဉ်းစားနိုင်တဲ့ အရည်အချင်းတွေ မမွေးမြူနိုင်ဘူးလားဆိုတာကို ကျွန်မစဉ်းစား ခဲ့ပါတယ်။ ကျွန်မကတော့ ဖြစ်နိုင်တယ်လို့ ယုံကြည်ပါတယ်၊ ဖြစ်နိုင်ဖို့အတွက်ကိုလည်း အခွင့်အရေးတွေပေးပါ့မယ်” ဟုလည်း ပြောဆိုခဲ့သေးသည်။

အောက်ချင်းသစ္စာ သတင်းအေဂျင်စီ
Read more »

နယူးဒေလီမြို့တွင် ကားပေါ်တင် မုဒိန်းကျင့် သတ်ဖြတ်ခံရမှုအား ထိရောက်စွာ အရေးယူဆောင်ရွက်ပေးမှု မရှိသည့်အပေါ် ပြည်သူများက ဆန္ဒဖော်ထုတ်စဉ်။ ယင်းဆန္ဒဖော်ထုတ်မှုအား အာဏာပိုင်များက အကြမ်းဖက် ဖြိုခွင်းခဲ့သည်။
Photo : www.foxnews.com
ရန်ကုန်၊ အောက်တိုဘာ ၂၃

လမ်းမပေါ် လျှောက်နေတဲ့ အမျိုးသမီးကို ကားပေါ်ဆွဲတင်၊ မုဒိန်းကျင့်ဖို့ ကြိုးစားရင်း ရုန်းကန်တာကြောင့် ဓားနဲ့ ထိုးပြီး လမ်းပေါ် ပစ်ချခဲ့မှုတစ်ရပ် ရန်ကုန်မြို့၊ မင်္ဂလာဒုံမြို့နယ်မှာ အောက်တိုဘာလ ၂၂ ရက်က ဖြစ်ပွားခဲ့ပါတယ်။ ကံကောင်းစွာနဲ့ပဲ ဓားနဲ့ ထိုးခံရတဲ့ အမျိုးသမီးငယ် အသက်ရှင်နေသေးတာကြောင့် ဖြစ်ပျက်ပုံ ဖြစ်ပျက်နည်းတွေကို သိခဲ့ရတာပါ။

နှစ်ပေါင်း ၁၀ စုနှစ်ကျော် မကြားခဲ့ဖူးတဲ့ မှုခင်းဖြစ်ရပ်တစ်ခုလို့ ဆိုရမှာပါ။

ဒီ့မတိုင်ခင်ကလည်း လေးလောင်းပြိုင်၊ သုံးလောင်းပြိုင် လူသတ်မှု၊ နေ့ခင်းကြောင်တောင် အိမ်ပေါ်တက် လူသတ် လုယက်မှုတွေ၊ ရိုက်နှက်လုယက်မှုတွေ၊ ဓားထိုးမှုတွေ၊ တကယ့်ကို စုံစုံလင်လင်ပဲ ရန်ကုန်မြို့မှာ ဖြစ်ပွားခဲ့ဖူးပါတယ်။ အထင်ကရဖြစ်တဲ့ လေးလောင်းပြိုင်၊ သုံးလောင်းပြိုင် လူသတ်မှု တရားခံတွေကိုတော့ အခုထိ မမိသေးပါဘူး။

တာဝန်ရှိသူတွေက စုံစမ်းဆဲ၊ တရားခံ ဖမ်းမိဖို့အရေး လုပ်ဆောင်နေဆဲ၊…ဆဲ ပေါင်းများစွာနဲ့ပဲ ရှင်းလင်းခဲ့ပါတယ်။ ဒါပေသိ တရားခံတွေကတော့ လွတ်မြောက်နေဆဲပါ။

မှတ်မှတ်သားသား ကိန်းဂဏန်းတွေအရ ပြောရရင် NLD အစိုးရသစ် တက်လာပြီးနောက်မှာ ရန်ကုန်မြို့မှာ မှုခင်းဖြစ်ရပ်တွေ များလာတာကို တွေ့နေရပါတယ်။ တစ်ဖက်ကလည်း မှုခင်း ကျဆင်းရေးဆိုပြီး လုပ်ဆောင်နေပါတယ်၊ ရဲဝန်ထမ်း မလုံလောက်တာကြောင့်ပါဆိုတဲ့ လက်သုံး စကားကို အာဏာပိုင်တွေက တွင်တွင်ကျယ်ကျယ် သုံးနေဆဲပါ။

မင်္ဂလာဒုံမှာ ဖြစ်ခဲ့တဲ့ ကားပေါ်တင် မုဒိန်းကျင့်ဖို့ ကြိုးစားတာ လက်မခံလို့ ဓားနဲ့ထိုး လမ်းပေါ် ပစ်ချခဲ့တဲ့ ဖြစ်ရပ်မျိုး အိန္ဒိယနိုင်ငံ၊ နယူးဒေလီမြို့မှာ ၂၀၁၂ ခုနှစ်က ဖြစ်ခဲ့ဖူးပါတယ်။ ဒီဖြစ်ရပ်နဲ့ ပတ်သက်လုိ့ တာဝန်ယူမှု မရှိတဲ့ အစိုးရအဖွဲ့ဝင်တွေ၊ နယူးဒေလီက မြို့တော်ဝန်တွေ၊ ဒေသဆိုင်ရာ အာဏာပိုင်တွေကို ပြည်သူတွေက ဆန္ဒပြခဲ့တဲ့ ဖြစ်ရပ်ကလည်း ဟိုးလေး တကြော်ကြော် ဖြစ်ခဲ့ပါတယ်။

နယူးဒေလီမြို့တွင် ကားပေါ်တင် မုဒိန်းကျင့် သတ်ဖြတ်ခံရမှုအား ထိရောက်စွာ အရေးယူဆောင်ရွက်ပေးမှု မရှိသည့်အပေါ် ပြည်သူများက ဆန္ဒဖော်ထုတ်စဉ်။ ယင်းဆန္ဒဖော်ထုတ်မှုအား အာဏာပိုင်များက အကြမ်းဖက် ဖြိုခွင်းခဲ့သည်။ Photo : www.cnn.com
ဒေသဆိုင်ရာ အာဏာပိုင်တွေက ရဲဝန်ထမ်း မလုံလောက်လို့ပါဆိုတဲ့ ဖြေရှင်းချက်ကို မီဒီယာနဲ့ ပြည်သူတွေက ဘယ်လို တုံ့ပြန်သလဲဆိုရင် “ရဲဝန်ထမ်း မလုံလောက်ပေမယ့် အစိုးရလူကြီး တစ်ယောက်ဆီတိုင်းအတွက် ရဲဝန်ထမ်း ၂၁ ဦးထားတာကကော ဘာကြောင့်လဲ”၊ “လမ်းပေါ် ပစ်ချခံရတဲ့ တက္ကသိုလ်ကျောင်းသူကို ပြည်သူက သတိပေးရဲ့သားနဲ့ ဘာကြောင့် နာရီပေါင်းများစွာ ကြာအောင် လာပြီး သယ်ယူ ကုသမပေးတာလဲ” စသဖြင့် စုံလို့ပါပဲ။

ဒီဖြစ်ရပ်ရဲ့ နောက်ဆက်တွဲအဖြစ် အိန္ဒိယနိုင်ငံ ဒေသအသီးသီးက ကိုယ့်သားသမီး မုဒိန်းကျင့်ခံရလို့ အာဏာပိုင်ကို တိုင်ပေမယ့် အရေးယူမှု မပေးတဲ့ ကိစ္စတွေ၊ အရေုးယူဖို့ နှောင့်နှေးတဲ့ ကိစ္စတွေလည်း တစ်ပါတည်း ပေါ်လာပါတော့တယ်။ နောက်ဆုံး ပြည်သူလူထုနဲ့ မီဒီယာရဲ့ ဖိအားတွေကြောင့် တက္ကသိုလ်ကျောင်းသူ ကားပေါ်တင် မုဒိန်းကျင့်ခံခဲ့ရတဲ့ ဖြစ်ရပ်နဲ့ ပတ်သက်လို့ ကျူးလွန်သူတွေကို ဖမ်းဆီးနိုင်ခဲ့ပါတယ်။ ဒါပေမဲ့လည်း မုဒိန်းကျင့်ခံခဲ့ရတဲ့ တက္ကသိုလ်ကျောင်းသူ ကတော့ ပြစ်မှုကျူးလွန်သူတွေရဲ့ လက်ချက်ကြောင့် ကိုယ်တွင်းကလီစာတွေ ပျက်ဆီးပြီး အသက် ပေးခဲ့ရပါတယ်။ ကံကောင်းထောက်မစွာပဲ အလားတူ ဖြစ်ခဲ့တဲ့ မြန်မာပြည်က ဖြစ်ရပ်မှာတော့ အသက်မပေးခဲ့ရသလို အရှက်လည်း မကွဲခဲ့ရပါဘူး။

နယူးဒေလီမြို့တွင် ကားပေါ်တင် မုဒိန်းကျင့် သတ်ဖြတ်ခံရမှုအား ထိရောက်စွာ အရေးယူဆောင်ရွက်ပေးမှု မရှိသည့်အပေါ် ပြည်သူများက ဆန္ဒဖော်ထုတ်စဉ်။ ယင်းဆန္ဒဖော်ထုတ်မှုအား အာဏာပိုင်များက အကြမ်းဖက် ဖြိုခွင်းခဲ့သည်။ Photo : www.vesti.ru
ဒါပေမဲ့ တစ်ခုရှိတာကတော့ ကားပေါ်တင်ပြေး၊ မုဒိန်းကျင့်၊ လမ်းပေါ် ပစ်ချဆိုတဲ့ မှုခင်းက စလို့ လာပါပြီ။ လမ်းပေါ်လျှောက် ပြည်သူတွေရဲ့ ဘ၀က မလုံခြုံတော့ဘူးဆိုတဲ့ လက္ခဏာပါ။ ရန်ကုန်မြို့မှာ မှုခင်းပေါင်းစုံက တဂျိန်းဂျိန်း ဖြစ်နေသလို ပြည်သူတွေရဲ့ ဘ၀က အိမ်ထဲနေရင်းတောင် မလုံခြုံတဲ့ဘ၀ ရောက်လို့ နေပါပြီ။ ဒါပေမဲ့လည်း တရားဥပဒေ စိုးမိုးရေးနဲ့ မှုခင်းကျဆင်းရေးအပိုင်းမှာတော့ ဖြစ်နေတဲ့ မှုခင်းအရေအတွက်အရ အားနည်းသထက် နည်းလာ နေတယ်ဆိုတာကို ပြဆိုနေပါတယ်။

ဝန်ကြီးချုပ်က ဟိုပွဲတွေ တက်၊ ဒီပွဲတွေ တက်နဲ့ အလွှာတစ်ခုကြားမှာပဲ အချိန်ကုန်နေပေမယ့် လူထုကတော့ မှုခင်းထူပြောတဲ့ အနေအထားမှာ ကိုယ့်အသက်ကို ဖက်နဲ့ ထုပ်ပြီး နေနေရပါတယ်။ ရန်ကုန်မြို့ လှိုင်သာယာလို မြို့နယ်ဆိုရင် ညရေးညတာတောင် တစ်ယောက်တည်း မသွားရဲဘူးလို့ ဆိုလာတဲ့ သူတွေတောင် ရှိပါတယ်။ ထို့နည်းတူ လူသူထူပေါတဲ့ မြို့လယ်ခေါင်အိမ်တွေမှာတောင် နေ့ခင်းနေ့လယ်ဆို အိမ်ကို တံခါးပိတ်ရုံတင်မက တိုက်ခန်းဆိုရင် မြေညီထပ်က လှေကား တံခါးကိုပါ ပိတ်ထားရတဲ့ အဆင့်ထိ ဖြစ်နေပါပြီ။ အခု ဖြစ်ရပ်အရဆိုရင် လမ်းမပေါ် လျှောက်နေရင်တောင် မလုံခြုံဘူးဆိုတာ ပြနေပါပြီ။

ဒါပေမဲ့လည်း ဒီကိစ္စနဲ့ ပတ်သက်လို့ အစိုးရပိုင်းက ဘာတွေ လုပ်နေသလဲဆိုတာ သတင်းစာမှာ ပါသလောက်၊ အစိုးရပိုင် မီဒီယာမှာ ပြောသလောက်နဲ့ပဲ ကျေနပ်နေရပါတယ်။ အစိုးရလုပ်လို့ ထင်သာတဲ့ ထိရောက်မှုဆိုရင် ပြည်သူ့လုံခြုံရေးကို တာဝန်ယူရမယ့် ရဲတပ်ဖွဲ့ဝင်တွေ စိုက်တဲ့ သစ်ပင်တွေပဲ ရှိပါတယ်။ မှုခင်းကျဆင်းမှုဆိုတာဟာ လုံးလုံး မတွေ့ရသေးပါဘူး။

ဒါကြောင့် မှုခင်းကျဆင်းရေးနဲ့ ပြည်သူ့ဘ၀ လုံခြုံရေးနဲ့ ပတ်သက်လို့ လုပ်နေပါတယ်၊ ရဲဝန်ထမ်း မလုံလောက်သေးလို့ပါဆိုတဲ့ စကားရပ်တွေထက် ထိရောက်တဲ့ လုပ်ဆောင်မှုတွေ လုပ်ပြဖို့ အချိန် တန်နေပါပြီ။ ဒီကိစ္စနဲ့ ပတ်သက်လို့ တိကျတဲ့ အဖြေတစ်ခု ထုတ်ပေးဖို့ ပုစ္ဆာတွေက ရှိနေပါပြီ။ ဒီပုစ္ဆာကို မဖြေရှင်းနိုင်ဘူးဆိုရင်တော့ဖြင့် နောက်နောက် ဆက်ဖြစ်လာနိုင်တဲ့ ကိစ္စတွေနဲ့ ပတ်သက်လို့ ပြည်သူကို ရှင်းပြဖို့ လုံလောက်တဲ့ အဖြေတစ်ခု ရှိဖို့ လိုအပ်နေပြီဖြစ်ပါကြောင်း သက်ဆိုင်ရာအာဏာပိုင်များကို သတိပေးခေါင်းလောင်း ထိုးလိုက်ပါကြောင်း။

ထွဏ်းမောင်
Read more »

အိန္ဒိယ-မြန်မာ နယ်စပ်ကုန်သွယ်ရေးပမာဏ နှစ်အလိုက် တိုးတက်လာမှု
ရန်ကုန်၊ အောက်တိုဘာလ ၂၀

မြန်မာနှင့် အိန္ဒိယနိုင်ငံကြား နယ်စပ်ကုန်သွယ်မှု ပမာဏမှာ ၂၀၁၁-၂၀၁၂ ခုနှစ်က ရှိခဲ့သည့် ကုန်သွယ်မှုပမာဏဖြစ်သည့် အမေရိကန်ဒေါ်လာ ၁၅ သန်းကျော်ရှိခဲ့ရာ ၂၀၁၅-၂၀၁၆ ခုနှစ်တွင် လေးဆကျော် မြင့်တက်လာခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ကိန်းဂဏန်းများက ဖော်ပြလျက်ရှိသည်။

လွန်ခဲ့သည့် ၂၀၁၁-၂၀၁၂ ခုနှစ် နယ်စပ်ကုန်သွယ်မှု ပမာဏမှာ ပို့ကုန်တန်ဖိုး ၈.၈၆၉ သန်းနှင့် သွင်းကုန်တန်ဖိုး ၆.၅၄၀ သန်း၊ စုစုပေါင်း ကုန်သွယ်မှုပမာဏ ကန်ဒေါ်လာ ၁၅ သန်းကျော်သာ ရှိခဲ့ရာ ၂၀၁၅-၂၀၁၆ တွင်မူ ပို့ကုန်တန်ဖိုး ၅၃.၀၂၇ သန်းနှင့် သွင်းကုန်တန်ဖိုး ၁၈.၆၇၁ သန်း၊ စုစုပေါင်း ကုန်သွယ်မှုပမာဏ ၇၁.၆၄၄ သန်းအထိ ရှိခဲ့ရာ ငါးနှစ်တာကာလအတွင်း လေးဆကျော် မြင့်တက်ခဲ့ခြင်း ဖြစ်သည်။

စီးပွား/ကူးသန်းမှ ထုတ်ပြန်ထားသည့် အဆိုပါကိန်းဂဏန်းများမှာ အကောက်ခွန်ဦးစီးဌာနမှ အပတ်စဉ်အလိုက် ရရှိသည့် ကုန်သွယ်မှုကိန်းဂဏန်းများအပေါ် အခြေခံပြုစုထားခြင်းဖြစ်သည်။

မကြာသေးမီ ရက်ပိုင်းအတွင်းက အိန္ဒိယနိုင်ငံသို့ သွားရောက်ခဲ့သည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် အိန္ဒိယနိုင်ငံ အစိုးရတာဝန်ရှိသူများနှင့် တွေ့ဆုံခဲ့စဉ်ကလည်း နှစ်နိုင်ငံ စီးပွားရေးဆိုင်ရာ ကိစ္စရပ်များကိုလည်း ဆွေးနွေးခဲ့ကြသေးသည်။

စီးပွားရေးအပါအ၀င် အခြားသော ကိစ္စရပ်များဖြင့် ကုန်းလမ်းကြောင်းမှတစ်ဆင့် လွယ်ကူချောမွေ့စွာ သွားလာနိုင်ရေးအတွက် တမူး-မိုရေး၊ ရိဒ်-ရိခေါတာ နယ်စပ်ဖြတ်သန်းဂိတ်များတွင် နယ်စပ်နှစ်ဖက်စလုံး၌ လူဝင်/လူထွက် စိစစ်ရေးရုံးများ ထားရှိရန်၊ နှစ်နိုင်ငံ ကုန်သွယ်မှုနှင့် ရင်းနှီးမြှုပ်နှံမှု အပြည့်အ၀ဆောင်ရွက်နိုင်ရန် အတားအဆီးများအား ဖယ်ရှားရန်၊ ပင်လယ်သမုဒ္ဒရာအခြေပြု အပြာရောင်စီးပွားရေး Blue Economy တိုးတက်ရေးနှင့် ဘင်္ဂလားပင်လယ်အော်တွင် ပင်လယ်ရေကြောင်း ပူးပေါင်းဆောင်ရွက်မှုနှင့် အနာဂတ် ပူးပေါင်းဆောင်ရွက်မှုများအတွက် နည်းလမ်းများချမှတ်ရန် နီးကပ်စွာ ပူးပေါင်းဆောင်ရွက်လိုကြောင်း ကိစ္စရပ်များကို သဘောတူညီခဲ့ကြသည်။

အောက်ချင်းသစ္စာ သတင်းအေဂျင်စီ
Read more »

India and Myanmar Border Trade Area
Photo : Mapio.net
ရန်ကုန်၊ အောက်တိုဘာ ၁၈

ချင်းပြည်နယ်၊ ရိဒ် နယ်စပ်ကုန်သွယ်ရေးစခန်းမှ ကုန်ပစ္စည်းအမျိုးမျိုး ကုန်သွယ်မှုပမာဏမှာ ကာလတူနှိုင်းယှဉ်ချက်များအရ အမေရိကန်ဒေါ်လာ ငါးသန်းကျော် မြင့်တက်လာခဲ့ကြောင်း စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနမှ ထုတ်ပြန်သော ကိန်းဂဏန်းများက ဖော်ပြလျက် ရှိသည်။

ဧပြီလ ၁ ရက်မှ အောက်တိုဘာလ ၁၄ ရက်အထိ ၂၀၁၅ ခုနှစ်နှင့် ၂၀၁၆ ခုနှစ် နှိုင်းယှဉ်ချက်များအရ ၂၀၁၅ ခုနှစ်အတွင်း ပို့ကုန်တန်ဖိုး ကန်ဒေါ်လာ ၈ ဒသမ ၄၆၄ သန်း၊ သွင်းကုန်တန်ဖိုး ၂ ဒသမ ၆၆၅ သန်း၊ စုစုပေါင်း ကုန်သွယ်မှုပမာဏ ကန်ဒေါ်လာ ၁၁ ဒသမ ၁၂၉ သန်းရှိခဲ့ရာ ၂၀၁၆ ခုနှစ်တွင်မူ ပို့ကုန်တန်ဖိုး ၁၁ ဒသမ ၁၈၀ သန်းနှင့် သွင်းကုန်တန်ဖိုး ၅ ဒသမ ၂၀၈ သန်း၊ စုစုပေါင်း ကုန်သွယ်မှု ပမာဏ ၁၆ ဒသမ ၃၈၈ သန်း ရှိခဲ့ရာ ကွာခြားမှုပမာဏမှာ ကန်ဒေါ်လာ ငါး ဒသမ ၂၅၉ သန်း ရှိခြင်း ဖြစ်သည်။

အလားတူ စစ်ကိုင်းတိုင်း၊ တမူးမြို့ရှိ နယ်စပ်ကုန်သွယ်ရေးစခန်းတွင်လည်း ကာလတူ ကုန်သွယ်မှုပမာဏမှာ အမေရိကန်ဒေါ်လာ ၁၉ သန်းကျော် မြင့်တက်ခဲ့ကြောင်း စီးပွား/ကူးသန်း ၀န်ကြီးဌာန ကိန်းဂဏန်းများက ဖော်ပြလျက် ရှိသည်။

၂၀၁၅ ခုနှစ်က ပို့ကုန်တန်ဖိုး ၁၂ ဒသမ ၇၉၁ သန်းနှင့် သွင်းကုန်တန်ဖိုး ၅ ဒသမ ၃၆၃၊ စုစုပေါင်း ၁၈ ဒသမ ၁၅၄ သန်းသာ ရှိခဲ့ရာ ၂၀၁၆ ခုနှစ်တွင်မူ ပို့ကုန်တန်ဖိုး ၂၈ ဒသမ ၇၅၆၊ သွင်းကုန်တန်ဖိုး ၈ ဒသမ ၇၇၉၊ စုစုပေါင်း ၃၇ ဒသမ ၅၃၅ သန်း ရှိခဲ့ရာ ကန်ဒေါ်လာ ၁၉ ဒသမ ၃၈၁ သန်းအထိ မြင့်တက်ခဲ့ခြင်း ဖြစ်သည်။

အဆိုပါ ကိန်းဂဏန်းအချက်အလက်များမှာ အကောက်ခွန်ဦးစီးဌာနမှ အပတ်စဉ်ရရှိသည့် ကုန်သွယ်မှုကိန်းဂဏန်းများအပေါ် အခြေခံပြုစု ဖော်ပြထားခြင်းလည်း ဖြစ်သည်။

အောက်ချင်းသစ္စာ သတင်းအေဂျင်စီ
Read more »

နှစ်နိုင်ငံ အစိုးရအဖွဲ့ဝင်များ တွေ့ဆုံနေကြစဉ်
Photo : http://www.statecounsellor.gov.mm
ရန်ကုန်၊ အောက်တိုဘာ ၁၈

မြန်မာနိုင်ငံ၊ ရခိုင်ပြည်နယ်တွင် ဖြစ်ပေါ်လျက်ရှိသည့် ကိစ္စရပ်များနှင့် ပတ်သက်၍ ကောင်းစွာ နားလည်သဘောပေါက်ကြောင်းနှင့် အပြုသဘော ကူညီဆောင်ရွက်သွားမည်ဖြစ်ကြောင်း တရုတ်သမ္မတ မစ္စတာ ရှီကျင့်ဖျင်က ပြောဆိုလိုက်သည်။

အိန္ဒိယနိုင်ငံ၊ ဂိုအာမြို့ရှိ Hotel Leela တွင် မြန်မာနိုင်ငံ၏ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အောက်တိုဘာလ ၁၇ ရက်က တွေ့ဆုံစဉ် နိုင်ငံတော်အတိုင်ပင်ခံက ငြိမ်းချမ်းရေးလုပ်ငန်းစဉ်နှင့် ရခိုင်ပြည်နယ် မြောက်ပိုင်းဒေသ နောက်ဆုံးဖြစ်ရပ်များနှင့် ဆက်စပ်၍ ရှင်းလင်းပြီးနောက် “တရုတ်သမ္မတ မစ္စတာ ရှီကျင့်ဖျင်က ကောင်းစွာ နားလည်သဘောပေါက်ကြောင်းနှင့် အပြုသဘော ကူညီဆောင်ရွက်သွားမည်ဖြစ်ကြောင်း ပြန်လည် ပြောကြားသည်” ဟု နိုင်ငံတော်အတိုင်ပင်ခံရုံးက ထုတ်ပြန်ထားသည်။

အဆိုပါ တွေ့ဆုံပွဲသို့ တရုတ်နိုင်ငံ သမ္မတ မစ္စတာ ရှီကျင့်ဖျင်အပါအ၀င် တရုတ်ပြည်သူ့သမ္မတနိုင်ငံ ၊ ပါတီဗဟိုကော်မတီ နိုင်ငံရေး ဗျူရိုအဖွဲ့ဝင်နှင့် မူဝါဒရေးရာ သုတေသနရုံး အကြီးအကဲ Mr.Wang Huning ၊ ပါတီ ဗဟိုကော်မတီနိုင်ငံရေးဗျူရိုအဖွဲ့ဝင်နှင့် ပါတီအတွင်းရေးမှူးရုံးအဖွဲ့ဝင် Mr. Li Zhanshu ၊ တရုတ်ပြည်သူ့သမ္မတနိုင်ငံ နိုင်ငံတော်ကောင်စီဝင် Mr. Yang Jiechi နှင့် တရုတ်ပြည်သူ့သမ္မတနိုင်ငံ အစိုးရအဖွဲ့ဝင် ၀န်ကြီးများ တက်ရောက်ခဲ့ကြပြီး မြန်မာနိုင်ငံဘက်မှ ပြည်ထောင်စုဝန်ကြီး ဦးကျော်ဝင်း၊ ဒုတိယ၀န်ကြီး ဦးကျော်တင်နှင့် တာဝန်ရှိသူများ တက်ရောက်ခဲ့သည်။

ယင်းတွေ့ဆုံမှုအတွင်း နှစ်နိုင်ငံနယ်စပ်ဒေသများ၏ လုံခြုံရေးနှင့် တည်ငြိမ်အေးချမ်းရေးအတွက် ပိုမိုတိုးမြှင့်ဆောင်ရွက်ရေး ဆွေးနွေးညှိနှိုင်းမှုများ စတင်ရေး အပါအ၀င် အခြားသော ကိစ္စရပ်များကိုလည်း ဆွေးနွေးခဲ့ကြကြောင်း နိုင်ငံတော်အတိုင်ပင်ခံရုံးက ထုတ်ပြန်ထားသည်။

အောက်ချင်းသစ္စာ သတင်းအေဂျင်စီ
Read more »

Photo : World Tourism Day
လူမျိုးတစ်မျိုးကို သတ်မှတ်ရာမှာ ရိုးရာပွဲတော်တွေကလည်း တိုင်းတာတဲ့ အချက်တွေထဲမှာ တစ်ခုအပါအ၀င် ဖြစ်ပါတယ်။ ဗမာတိုင်းရင်းသားတွေမှာ လအလိုက် ပွဲတော်တွေ ရှိသလို ကချင်မှာဆိုရင် မနောပွဲ၊ ထို့နည်းတူ ချင်းတိုင်းရင်းသားတွေမှာလည်း ပွဲတော်တွေ ရှိပါတယ်။ အဲဒါကတော့ ခွါဒိုပွဲတော်ပါပဲ။

ချင်းတိုင်းရင်းသားတွေမှာ နိုင်ငံရေးအရ ချင်းအမျိုးသားနေ့ ပွဲတော် ရှိသလို ရိုးရာဓလေ့ကို အခြေခံတဲ့ ခွါဒိုပွဲတော်၊ ရှောလ်ဆောင်းမ်ပွဲတော်တို့လည်း ရှိပါတယ်။ ခွါဒိုပွဲတော်ကိုတော့ ရိုးရာနှစ်ကူးပွဲတော်လို့လည်း တချို့က ခေါ်ဝေါ်သုံးနှုန်းကြပါတယ်။

မျိုးနွယ်စုကွဲများစွာ ရှိတဲ့ ချင်းတိုင်းရင်းသားတွေထဲမှာ ရိုးရာခွါဒိုပွဲတော်ကို ကျင်းပပုံတွေကလည်း မတူညီကြပါဘူး။

Khuado - Tedim,Tonzang

Tho Puai - Haka leh Khualsim

Thaithar Puai - Thantlang leh Zahau

Fanger Puai - Laizo (Falam)

Dongpi Puai - Zanniat

Nampui pwe - Kanpalet

Chavang Kut - Thadou leh Lusei ဆိုပြီး မျိုးနွယ်စုအလိုက်၊ ဒေသအလိုက် ကျင်းပကြတာကို မှတ်သားမိပါတယ်။

Photo :ActiveTravel ASIA
ခွါဒိုပွဲတော်၏ အဓိပ္ပာယ်

ခွါဒိုပွဲတော်ရဲ့ အဓိပ္ပာယ်က ချင်းစကားဖြစ်တဲ့ Khua နှင့် Do နှစ်လုံးပေါင်းထားတာ ဖြစ်ပြီး -

ခွါ = Khuazing= နတ်၊ မကောင်းဆိုးဝါး

Khuavak=ဘုရား၊

ဒို = ကြိုဆို၊ ဧည်ခံ

= နှင်ထုတ်၊ တိုက်ခိုက်ခြင်း လို့ အဓိပ္ပာယ် ရပါတယ်။

ထို့ကြောင့် ခွါဒိုပွဲတော်ကို ရိုးရာနှစ်ကူးပွဲ၊ ကောက်ရိတ်သိမ်းပွဲ၊ မကောင်းဆိုးဝါး နှင်ထုတ်ပြီး ကံကောင်းခြင်းနှင့် မင်္ဂလာရှိမှုကို ကြိုဆိုခြင်းပွဲတော် စသဖြင့် အနက်အဓိပ္ပာယ် အမျိုးမျိုး ထွက်ပေါ်စေပါတယ်။

ကျင်းပပုံမတူညီကြတဲ့ ခွါဒိုပွဲနဲ့ ပတ်သက်လို့ ချင်းပြည်နယ်၊ တီးတိန်နှင့် တွန်းဇံမြို့နယ်က ချင်းတိုင်းရင်းသားမျိုးနွယ်စုတွေရဲ့ ပွဲတော်ကျင်းပမှု ပုံစံကို လေ့လာမိသလောက် ဖြန့်ဝေပါရစေ။

နောက်ခံသမိုင်း

ချင်းသမိုင်းသုတေသန ပညာရှင်တွေရဲ့ တွေ့ရှိချက်အရ ခွါဒိုပွဲတော်ကို ကျိမ်နွဲ့ရွာသူကြီး ပူတွကြောင်ခေတ် အေဒီ ၁၄၀၀ ပတ်ဝန်းကျင်တွင် စတင်ကျင်းပသည်ဟု ခန့်မှန်းမှုများ ရှိခဲ့ရာ ရက်အတိအကျ မသိရပေမယ့် ခန့်မှန်ချက်များအရ နှစ်ပေါင်း (၆၀၀) ကျော်ရှိခဲ့ပြီလို့ သိရှိရပါတယ်။

ခွါဒိုပွဲတော် ကျင်းပတဲ့ရက်ဟာ တိကျတဲ့ သတ်မှတ်ချက် မရှိဘဲ ကျေးရွာဒေသ အလိုက် တောင်ယာသီးနှံ ရိတ်သိမ်းပြီးခြင်းအပေါ် အမှီပြု၍ ကျေးရွာခေါင်းဆောင်တွေနဲ့ တိုင်ပင်ပြီး စက်တင်ဘာလနဲ့ အောက်တိုဘာလကြား အဆင်ပြေဆုံးရက်ကို ရွေးချယ် ကျင်းပကြခြင်း ဖြစ်ပါတယ်။

ရှေးဓလေ့ထုံးတမ်းအရ ခွါဒိုပွဲတော်ကို ငါးရက်တာ ကျင်းပလေ့ရှိကြောင်း ၁၉၉၄ ခုနှစ်၊ ရန်ကုန်မြို့၊ ဇိုမီးကျောင်းသားများ ဦးဆောင်ထုတ်ဝေသည့် ကျိမ်နွဲ့မဂ္ဂဇင်းတွင် ဦးဂင့်ခန့်ဆွမ်း၏ ရေးသားချက်မှာ ပါရှိပါတယ်။

ပွဲတော်အကြို (ပထမနေ့) မှာ ပွဲတော်အတွက် ပြင်ဆင်ခြင်းများ စတင် လုပ်ဆောင်ကာ မီးပုံပွဲအတွက် ထင်းရှူးသားများ စုဆောင်းခြင်းကို ပြုလုပ်ကြပါတယ်။ ဒုတိယနေ့မှာတော့ မကောင်းဆိုးဝါး (နတ်) နှင်ထုတ်ခြင်းများ ပြုလုပ်ကာ တတိယနေ့ကတော့ ပျားအုံယူတဲ့နေ့ ဖြစ်ပါတယ်။

ပျားအုံကို ရိုးရာ မောင်းနှင့် ဗုံများ တီးခတ်အသုံးပြုပြီး ယူဆောင်ခြင်းဖြစ်ကာ ပွဲတော် စတုတ္ထမြောက်နေ့မှာတော့ ကျန်ရှိတဲ့ရွာသားတွေက ဘယ်ကိစ္စနဲ့မှ အိမ်အပြင် မသွားတော့ဘဲ မိမိတို့ရဲ့ ဆောမ်း Sawm တွေမှာ နေထိုင်ကြရပါတယ်။ ပွဲတော် နောက်ဆုံးရက်ဖြစ်တဲ့ ငါးရက်မြောက်နေ့မှာတော့ ကာလသားများအချင်းချင်း တစ်အိမ်တက် တစ်အိမ်ဆင်း လည်ပတ်ကြကာ ညပိုင်းမှာတော့ ရိုးရာဗုံ၊ မောင်းတွေတီးလို့ တေးသီချင်းတွေ သီဆိုကြရင်း ပွဲတော်ကို ပိတ်သိမ်းလေ့ ရှိပါတယ်။

Photo : NatGeoTravel - Tumblr
အမည်ကွဲများနဲ့ ခွါဒိုပွဲ

နှစ်သစ်ကူးပွဲတော် - ခွါဒိုပွဲတော်ကို ချင်းရိုးရာနှစ်သစ်ကူးပွဲတော်လို့လည်း ခေါ်ဆိုနိုင်ပြီး ရှေးဘိုးဘေးများသည် ပွဲတော်ကို နှစ်ကို ပိုင်းခြားသည့် ပွဲတော်အဖြစ်လည်း သတ်မှတ်ခဲ့ကြပါတယ်။

ပျားပွဲတော် - ခွါဒိုပွဲ ကျင်းပပြုလုပ်နေတဲ့အချိန်မှာ ရှေးဘိုးဘေးတွေဟာ ပျားအုံတွေကိုယူပြီး ရိုးရာယစ်ပုရောဟိတ်တွေက ယူလာတဲ့ ပျားအုံကို ကြည့်ပြီး နောက်နှစ်သစ်မှာ ဖြစ်လာမည့် အကြောင်းများကို ဗေဒင်ဖတ်ကြရပါတယ်။ ပျားအုံကို ကြည့်ပြီး လာမည့်နှစ်တွင် အစား အသောက်လုံလောက်မှုအခြေအနေ၊ ကျန်းမာရေး အခြေအနေ စတာတွေကို ကြိုတင်ခန့်မှန်းကြပါတယ်။

ရိတ်သိမ်းပွဲ - တောင်ယာခုတ်ခြင်းနဲ့ အဓိကအသက်မွေးရတဲ့ ရှေး ချင်းလူမျိုးတွေဟာ ကိုယ်စိုက်ပျိုးထားတဲ့ ပြောင်းဖူး၊ ဆပ်ဆန်နဲတွေကို သြဂုတ်လကုန်နဲ့ စက်တင်ဘာလဆန်းပိုင်းတွေမှာ ရိပ်သိမ်းကြလေ့ ရှိပါတယ်။ ခွါဒိုပွဲအမီ သီးနှံရိပ်သိမ်းလို့ မပြီးသေးတဲ့သူရှိရင်လည်း ပွဲတော်အမီ ရိပ်သိမ်းနိုင်ဖို့ ရွာသားတွေက ၀ိုင်းဝန်းကူညီကြခြင်း ဖြင့် တစ်ဦးနဲ့ တစ်ဦး ကူညီဖေးမလေ့ ရှိပါတယ်။ အဲဒီလို ရိပ်သိမ်းပြီးရင် သီးနှံတွေအတွက် Pasian လို့ ခေါ်တဲ့ ဘုရားသခင်ကို ကျေးဇူးတော်ချီးမွှမ်းခြင် (ကောက်ရိပ်သိမ်းပွဲ) ကို ကျင်းပကြတာ ဖြစ်ပါတယ်။ ချင်းတိုင်းရင်းသားတွေကြားမှာ ခရစ်ယာန်ဘာသာ မပြန့်ပွားခင် ရှေးဘိုးဘေးတွေဟာ Pasian လို့ ခေါ်တဲ့ တန်ခိုးကြီးဘုရား ရှိကြောင်းနဲ့ နတ်ဆိုးတွေ ရှိတယ်လို့ ယုံကြည် သက်ဝင်ခဲ့ကြတယ်လို့ မှတ်သားရပါတယ်။

မီးထွန်းပွဲ - ခွါဒိုပွဲတော် ဒုတိယနေ့မှာ အကြိုနေ့က ပြင်ဆင်ထားတဲ့ ထင်းရှူးသားတွေကို မီးထွန်းပြီး ရွာအပြင်ဘက်က သတ်မှတ်ထားတဲ့ တစ်နေရာကနေ ရွာထဲသို့ တန်းစီပြီး ၀င်ရောက်ကြခြင်းဖြင့် မီးထွန်းပွဲတော်ကို ကျင်းပကြပါတယ်။ ဒီလို လုပ်ရတဲ့ ရည်ရွယ်ချက်ကတော့ မကောင်းဆိုးဝါး (နတ်ဆိုး) တွေကို ရွာထဲကနေ နှင်ထုတ်ခြင်း ဖြစ်ပါတယ်။ ဒါကြောင့် ခွါဒိုပွဲတော်ကို မီးထွန်းပွဲတော်အဖြစ်လည်း အသိအမှတ် ပြုကြပါတယ်။

ဒီကနေ့ခေတ်နဲ့ ခွါဒိုပွဲတော်

အစဉ်အလာ အယူအဆတွေ ရှိတဲ့ ခွါဒိုပွဲတော်ကို ဒီကနေ့ခေတ်မှာလည်း ဆက်လက်ကျင်းပပေမယ့် ခွါဒိုပွဲတော်ရဲက တကယ့်အနှစ်သာရတွေ ပျောက်ဆုံးကုန်ပြီလို့ ဆိုသူတွေလည်း ရှိလာပါတယ်။ ခွါဒိုပွဲတော်ကို တချို့ တောင်ပေါ်ကျေးရွာအချို့မှာဆိုရင် ကလေးတွေက အသားစားတဲ့နေ့ ဒါမှမဟုတ် ၀က်သက်တဲ့နေ့လို့ မှတ်ယူတာတွေ ရှိလာပြီဖြစ်လို့ ရိုးရာခွါဒိုပွဲတော်ရဲ့ အနှစ်သာရတွေကို ထိန်းသိမ်းဖို့ လိုလာနေပါပြီ။

ရှေးဘိုးဘေးတွေက ခွါဒိုပွဲတော်ကို ရွာကွင်းပြင်တွေမှာ စုပေါင်းလုပ်ဆောင်ကြတာ ဖြစ်ပြီး ပွဲတော်အတွင်း ဆုတောင်းခြင်းတွေ၊ အတီးအမှုတ်၊ ရိုးရာဓလေ့ ခေါင်ရည်တည်ခြင်းတွေ ပါဝင်ပါတယ်။ ဒါပေမဲ့လည်း ဒီကနေ့ခေတ်မှာတော့ ပွဲတော်ကို မိသားစုလိုက် လုပ်တာတွေ၊ ညနေပိုင်းတွေမှာ မိမိကိုးကွယ်ရာ ဘာသာအလိုက် ဘုရားကျောင်းတွေမှာ ၀တ်ပြုဆုတောင်းခြင်းတွေ လုပ်ဆောင်လာခြင်းဖြင့် ရိုးရာဓလေ့ အခြေခိုင်ခဲ့တဲ့ ခွါဒိုပွဲတော်ရဲ့ သရုပ်သကန်ဟာ မှေးမှိန်လို့ လာနေပါပြီ။

Photo :Adventurizer.com
ဒါ့အပြင် ခွါဒိုပွဲတော်ဟာ လူငယ်လူရွယ်တွေအတွက် ကောက်ရိပ်သိမ်းခြင်း အထိမ်းအမှတ်၊ ရိပ်သိမ်းလို့ မပြီးသူကို ရိပ်သိမ်းပြီးသူများက ကူညီခြင်း အထိမ်းအမှတ်၊ စည်းလုံခြင်း အထိမ်းအမှတ်အဖြစ် ရိုးရာခေါင်ရည် တည်ကြခြင်း ဖြစ်ပါတယ်။ ဒါပေမဲ့ ဒီကနေ့ခေတ်မှာတော့ ခွါဒိုပွဲတော်ကို အကြောင်းပြပြီး ရိုးရာခေါင်ရည် အစား အရက်၊ ဘီယာ၊ မူးယစ်ဆေးဝါးများ အလွန်အကျွံ သုံးစွဲခြင်း၊ စည်းလုံခြင်း သရုပ်သကန်ထက် လူငယ်လူရွယ် အမျိုးသား၊ အမျိုးသမီးငယ်များအကြား လူမှုရေးပျော်ပါးမှုများက မူလ ခွါဒိုပွဲတော်ရဲ့ အနှစ်သာရကို ချိုးနှဲ့နေပါပြီ။

ငွေကြေးအပါအ၀င် အထွေထွေကျပ်တည်းမှုတွေကလည်း ခွါဒိုပွဲတော်ရဲ့ အနှစ်သာရ အဓိပ္ပာယ်ကို ထိခိုက်လာစေပါတယ်။ အရင်က ငါးရက်တာ ကျင်းပလေ့ရှိတဲ့ ခွါဒိုပွဲတော်ဟာ သူ့ရက်နဲ့ သူ အဓိပ္ပာယ် အနှစ်သာရတွေ ရှိပေမယ့် အခုအခါမှာတော့ ငွေကြေးတတ်နိုင်သူက ရက်ကြာကြာ ပြုလုပ်သလို ငွေကြေးမတတ်နိုင်သူတွေက ရက်အနည်းငယ်သာ ကျင်းပလာခဲ့ကြပါတယ်။ အထွေထွေကျပ်တည်းမှုကြောင့် ရုပ်ပျက်လာတဲ့ ခွါဒိုပွဲတော်ကို ရှေးလူကြီးအဆက်ဆက်က ဒီယဉ်ကျေးမှု ဓလေ့ထုံးတမ်းနဲ့ ပတ်သက်ပြီး လူငယ်တွေကို လက်ဆင့်ကမ်းမှု အားနည်းတာကလည်း ပိုလို့တောင် ထိခိုက် စေလာပါပြီ။

မည်သို့ပင် ဆိုစေ။ ပွဲတော်သည် လူမျိုးအတွက် အထိမ်းအမှတ်ဖြစ်သလို အနှစ်သာရ မပျောက်ပျက်ရေးကလည်း ကိုယ့်လူမျိုးမှာပဲ တာဝန်ရှိတယ်လို့ ဆိုရင် မှားမယ် မထင်ပါဘူး။ ထို့နည်းတူ ခေတ်စနစ်နဲ့ အထွေထွေသော အနေအထားတွေအရ ချင်း တိုင်းရင်းသားတွေရဲ့ ခွါဒိုပွဲတော်ကို အခုဆိုရင် ချင်းပြည်နယ် နေရာအနှံ့အပြားမှာ ကျင်းပနေကြပါပြီ။

လူမျိုးရှိရင် ပွဲတော် ရှိတယ်၊ ပွဲတော်ရှိရင် စည်းလုံးတယ်ဆိုတဲ့ အခြေခံသဘော တရားတွေက အစဉ်အလာနဲ့ အဓိပ္ပာယ်ပြည့်ဝတဲ့ ခွါဒိုပွဲတော်ကို ဆက်လက်ထိန်းသိမ်းဖို့က လူကြီးတွေမှာ တာဝန်ရှိသလို လူငယ်တွေမှာလည်း တာဝန်ရှိတယ်ဆိုတာကို မီးမောင်းထိုး ဖော်ပြပါရစေ။

ခွါဒိုပွဲတော်ဟာ ချင်းတိုင်းရင်းသားတွေရဲ့ သမိုင်းကို ဖော်ပြတဲ့ ပွဲတော်ဖြစ်သလို ဆက်လက်ထိန်းသိမ်းရမယ့် ရိုးရာဓလေ့လည်း ဖြစ်တာမို့ မူလ အနှစ်သာရ မပျောက်ပျက် အောင် ထိန်းသိမ်းကြပါစို့လို့ တိုက်တွန်းလိုက်ရပါတယ်။

အောက်ချင်းသစ္စာ သတင်းအေဂျင်စီ
Read more »
Subscribe to: Posts (Atom)