ပါတီတွင်း အာဏာသိမ်းမှုအား ၂၀၁၅ ရွေးကောက်ပွဲကြောင့် သည်းခံခဲ့ဟု သူရဦးရွှေမန်း ပြော

Photo by Thura U Shwe Mann's Facebook

ရန်ကုန်၊ ဧပြီ ၂၇

ပါတီဌာနချုပ်တွင် အာဏာသိမ်းပြီးနောက် မိမိအပါအ၀င် ပါတီဝင်အချို့အား ပါတီအကြီးအကဲ ရာထူးမှ သာမန် ပါတီဝင်အဖြစ်သို့ ပြောင်းလဲ တာဝန်ထမ်းဆောင်စေခဲ့မှုအား ၂၀၁၅ ရွေးကောက်ပွဲ အောင်မြင်စွာ ဖြစ်မြောက်ရေးအပါအ၀င် အချက်လေးချက်ကြောင့် စိတ်ရှည်သည်းခံ ဆောင်ရွက်ခဲ့ရခြင်းဖြစ်ကြောင်း ထုတ်ပယ်ခံ သူရဦးရွှေမန်းနှင့် လက်ရှိ ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေးကော်မရှင်မှ ကြံ့ခိုင်ရေးပါတီဝင်များက ဧပြီလ ၂၇ ရက်တွင် ကြေညာချက်ထုတ် ပြောဆိုလိုက်သည်။

၂၀၁၅ ခုနှစ် သြဂုတ်လ ၁၂ ရက် ညပိုင်းက နေပြည်တော်ရှိ ကြံ့ခိုင်ရေးပါတီဌာနချုပ်တွင် လုံခြုံရေးအဖွဲ့များ အသုံးပြုကာ စီးနင်းနေရာယူ သိမ်းပိုက်ရှာဖွေပြီးနောက် ပါတီဗဟို အလုပ်အမှုဆောင်ကော်မတီအား ပြန်လည် ပြင်ဆင်ဖွဲ့စည်းခဲ့ပြီး ယင်းကာလက ပါတီဥက္ကဋ္ဌအဖြစ် တာဝန်ယူနေသည့် သူရဦးရွှေမန်းအား သာမန်ပါတီဝင်အဖြစ်သို့ ပြောင်းလဲ တာဝန်ပေးခဲ့ခြင်း ဖြစ်သည်။

ယင်းသို့ လုပ်ဆောင်ခဲ့ခြင်းနှင့် ပတ်သက်၍ သူရဦးရွှေမန်းနှင့် ပါတီဝင် လွှတ်တော်ကိုယ်စားလှယ်များက (က) ၂၀၁၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲ ချောမောအောင်မြင်စွာဖြစ်မြောက်ရေး (ခ) ရွေးကောက်ပွဲ ရလဒ်များအရ လွှတ်တော်များ ပေါ်ပေါက်ရေး၊ နိုင်ငံတော်သမ္မတ ရွေးချယ်တင်မြှောက်ရေးနှင့်အစိုးရအဖွဲ့ဖွဲ့စည်းရေး (ဂ) သြဂုတ်လ(၁၂)ရက် ညအချိန်ဖြစ်စဉ်တွင် တည်ဆဲဥပဒေနှင့် ပါတီ ဖွဲ့စည်းပုံ အခြေခံစည်းမျဉ်းကိုဖောက်ဖျက်ခဲ့သည့် လူပုဂ္ဂိုလ်များ၏ ဂုဏ်သိက္ခာနှင့် အခြားထိခိုက်နစ်နာမှုမဖြစ်စေရေး (ဃ) နိုင်ငံတော်နှင့် နိုင်ငံသားအကျိုးစီးပွားကို တစ်နည်းမဟုတ်တစ်နည်း ထိခိုက် နစ်နာဆုံးရှုံးမှုများမဖြစ်စေရေး စသည့်အချက်များကြောင့် စိတ်ရှည်သည်းခံ ဆောင်ရွက်ခဲ့ခြင်းဖြစ်ကြောင်း ထုတ်ပြန်ကြေညာချက်တွင် ပါရှိသည်။

သူရ ဦးရွှေမန်းအပါအ၀င် ပါတီဝင်အချို့အား ၂၀၁၆ ခုနှစ် ဧပြီလ ၂၂ ရက်တွင် ပါတီမှ အနားပေးကြောင်း အကြောင်းကြားစာကို ကြံ့ခိုင်ရေးပါတီမှ ပေးပို့ခဲ့ခြင်းဖြစ်ပြီး ယင်းရက်တွင်ပင် သမ္မတဟောင်း ဦးသိန်းစိန်က ပါတီဥက္ကဋ္ဌအဖြစ် ပြန်လည်နေရာယူကာ ပါတီလုပ်ငန်းများ စတင် ဆောင်ရွက်ခဲ့ခြင်းလည်း ဖြစ်သည်။

ပါတီအာဏာသိမ်းခြင်းပြီး ရက်ပိုင်းအတွင်း ပါတီအလုပ်အမှုဆောင် ကော်မတီ ပြန်လည် ဖွဲ့စည်းခြင်းနှင့် ပတ်သက်၍လည်း “ပါတီ ညီလာခံနှင့် ပါတီဗဟိုကော်မတီက ရွေးချယ်တင်မြှောက်ထားသည့် ဗဟိုအလုပ်အမှုဆောင် ကော်မတီဝင်များကို ဖယ်ရှားပြီးရက်ပိုင်းအတွင်းမှ ပါတီဝင်ဖြစ်လာသူများနှင့် သာမန် ပါတီဝင်အချို့တို့ကို ပါတီဗဟို အလုပ်အမှုဆောင်ကော်မတီဝင်အဖြစ် တိုက်ရိုက်ခန့်အပ်ခြင်းတို့သည် တည်ဆဲဥပဒေနှင့် ပါတီ၏ဖွဲ့စည်းပုံအခြေခံစည်းမျဉ်းကို ချိုးဖောက်ခြင်း ရှိ/မရှိ အလွယ်တကူ သိမြင်နိုင်မည်ဖြစ်ပါသည်” ဟုလည်း ထုတ်ပြန်ချက်တွင် ဖော်ပြထားသည်။

နေပြည်တော်တွင် သတင်းစာရှင်းလင်းပွဲ ပြုလုပ်နေစဉ်။ Photo by Thura U Shwe Mann's Facebook

ထိုသို့ အသစ်ပြန်လည်ဖွဲ့စည်းသည့် အလုပ်အမှုဆောင်ကော်မတီတွင် သမ္မတရာထူး ယူထားသည့် ဦးသိန်းစိန်အား ဥက္ကဋ္ဌအဖြစ်နှင့် ဒုဥက္ကဋ္ဌ ဦးဌေးဦးတို့အား ပူးတွဲဥက္ကဋ္ဌအဖြစ် ထားရှိဖွဲ့စည်းခဲ့ခြင်း ဖြစ်သည်။

ပါတီတွင်း အာဏာသိမ်းမှုနှင့် ပတ်သက်၍ ပါတီ၏ လုပ်ဆောင်မှုများ ဥပဒေစည်းမျဉ်းနှင့် ညီညွတ်ရေးအတွက် ပထမအကြိမ် ပါတီညီလာခံမှ ရွေးချယ်တင်မြှောက်ထားသည့် ဗဟိုကော်မတီဝင် ထက်ဝက်ကျော်က အရေးပေါ် ညီလာခံ ခေါ်ယူရေးအတွက် လက်မှတ်ရေးထိုး တောင်းဆိုထားမှုများ ရှိကြောင်းနှင့် ယခုဖြစ်စဉ်များမှာ ပါတီနှင့်သာ သက်ဆိုင်သော်လည်း နိုင်ငံ့အကျိုးစီးပွားကို တစ်နည်းမဟုတ် တစ်နည်းဖြင့် သက်ရောက်မှု ရှိလာနိုင်သည်ဟု ယူဆကြောင်း၊ ယင်းအတွက် ဥပဒေအထက်တွင် မည်သူမျှ မရှိစေရေး၊ တရားဥပဒေစိုးမိုးရေးနှင့် ပြည်သူတို့ လိုလားသည့် ဒီမိုကရေစီစနစ် ဖြစ်ပေါ်ရေးအတွက် အားလုံး ၀ိုင်းဝန်း ပူးပေါင်းဆောင်ရွက်ကြရန် လိုအပ်ကြောင်း ထုတ်ပြန်ချက်တွင် ဖော်ပြထားသည်။

ယင်းထုတ်ပြန်ချက်မတိုင်မီကလည်း နေပြည်တော်၌ သူရဦးရွှေမန်း အပါအ၀င် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေးကော်မရှင်မှ ထုတ်ပယ်ခံ ကြံ့ခိုင်ရေးပါတီဝင် တစ်ဖြစ်လည်း ကော်မရှင်အဖွဲ့ဝင်များက သတင်းစာရှင်းလင်းပွဲတစ်ရပ် ပြုလုပ်ခဲ့သေးသည်။

အောက်ချင်း သတင်းအေဂျင်စီ